Kiselis tlatiochiualistli para yejuan kitlakaita niman kitlakamatis toTEKO
26
’Maka xkinmochijchiuilikan ídolos,
nion tlaixkopinaltin.
Ipan nemopaís maka nenkitelketsaskej itlaj tetl yejuan nenkimauistiliskej,
nion temej yejuan ipan nenkixneskayotiskej tlajtlamach* para nenkimauistiliskej.
Maka imixpan nemotlakuantelketsaskej,
pampa nejua ninemoTEKO Dios.
2 Xtlakaitakan notonaluan sabádos,
niman xtlakaitakan noyektabernáculo.
Nejua nemoTEKO nemechnauatia.
3 ’Tla nenkintlakamatij noleyes,
niman nenkejeuaj notlanauatiluan,
niman nenkichiuaj on tlen nikijtoua,
4 nejua nikchiuas para ma kiaui ipan nemotlal ijkuak noneki kiauis.
Niman on tlajli kuajli tlatlakitis,
niman on kojtin* no kuajli tlakiskej.
5 Nenkipiyaskej trigo hasta ijkuak nenkitekiskej uvas,
niman nenkipiyaskej uvas hasta ijkuak nenkitôkaskej trigo.
Nenkikuaskej tlakuajli hasta kuajli nenmixuiskej,
niman xikan nemojtijli nennemiskej ipan nemopaís.
6 Nejua nikchiuas para nemoyolika xnemikan.
Niman ijkuak nenkochiskej xitlaj* nenkimakajsiskej,
pampa nejua nemechmanauis ipan on país.
Nikchiuas para nochi yolkej yejuan tekuanimej ma poliuikan,
niman no xok onyas guerras.
7 Nemejuamej nenkintotokaskej nemotlauelikniuan niman nenkinmiktiskej ika nemoespada.
8 Makuiltimej de nemejuamej nenkintojtokaskej 100 nemotlauelikniuan.
Niman 100 de nemejuamej nenkintojtokaskej 10 mil nemotlauelikniuan.
Niman nenkinmiktiskej ika nemoespada.
9 Nejua nemechtiochiuas niman nemechmiyekilis.
Niman nopacto* nochipa nikpiyas nemouan.
10 Nemejuamej sanken* nenkikuaskej on trigo yejuan youejkau yejtikaj,
niman nonekis nenkixtiskej de nemokueskonuan para nenkeuaskej on trigo yejuan yenkuik.
11 ’Nejua nichantis nemouan ipan noTabernáculo niman xnemechtlauelkauas.
12 Nochipa ninemis nemouan.
Nejua ninemoDios yes niman nemejuamej nenyeskej nokoneuan.
13 Nejua ninemoTEKO Dios yejuan onemechkixti ipan on país Egipto para maka sa xnemikan esclavos de yejuamej.
Nejua onemechkixtilij on kojtli* yetik itoka yugo yejuan onkatka nemokechpan ken on uakaxtin yejuan tlaxoponiaj*.
Nejua onikchiu para xok nemopachojtiaskej ken ijkuak nenesclavos katkaj.
Yej aman nentlamakaualtin,
niman nenmelajkatlachixtiuij.
On castigo para yejuan xkitlakamati toTEKO
14 ’Pero tla nemejuamej xnenkitlakamatij niman xnenkichiuaj nochi notlanauatiluan,
15 niman yej xipan nenkitaskej niman xnenkinekiskej nenkakiskej on tlen nemechijlia,
niman ipan nenchojcholoskej on pacto* yejuan onikchiu nemouan,
16 tla ijkon,
nejua no nemechchiuilis in yejuan sanoyej temojtij.
Nemechtitlanilis:
kokolistli yejuan mechkokoxkamiktis kayolik,
chikauak totonalistli*,
kokolistli ipan nemixtololojuan,
niman kouajsiuistli ipan nemotlalnakayo.
Niman maski nentôkaskej ipan nemotlal,
sanenkaj yes,
pampa nemotlauelikniuan kikuaskej on tlakyotl.
17 Nejua ninochiuas nemotlauelikniu.
Nemotlauelikniuan nikinkauilis ma mechtlanikan.
Kemaj yejuamej mechtlankapiyaskej.
Niman nemontlatlaksaskej ikan nemojtijli maski xakaj mechtojtoka.
18 ’Niman tla sanken* xnenechtlakamatij maski yonemechtitlanilij nochi in tlen sanoyej xkuajli,
tla ijkon,
nikmiyekilis nemocastigo chikomepa más chikauak ipampa nemotlajtlakoluan.
19 Nikpopolos nemoueyimatilis.
Nejua nikchiuas para maka sa ma kiaui,
niman on tlajli maka sa ma tlatlakiti.
20 Sanenkaj nemosiauiliskej,
pampa on tlajli xitlaj* kitlakitis nion on kojtin* xok tlakiskej.
21 ’Tla sanken* nennechixnamikij niman xnenkinekij nennechtlakamatiskej,
nejua oksejpa nikmiyekilis nemocastigo okse chikomepa más ipampa nemotlajtlakoluan.
22 Nikintitlanis tepeyolkej temojtij tekuanimej para kinmajasiskej niman kinkuaskej nemokoneuan.
Niman no kinmajasiskej nemoyolkauan niman kinkuaskej.
Ijkon tej,
xok nenmiyekej yeskej hasta xok yakaj kistinemis ipan nochi ojtli niman ojtsitsimej.
23 “Maski tla nochi yejua in yonemechchiuilij,
sanken* xnenmokuektlaliaj niman xnenkichiuaj on tlen nejua nikneki niman yej sanken* nennechixnamikij,
24 nejua no ninochiuas nemotlauelikniu niman nikmiyekilis nemocastigo chikomepa más ipampa nemotlajtlakoluan.
25 Nikinuajtitlanis nemotlauelikniuan ma mechtlakuepiltikan pampa nenkichojcholouaj on pacto* yejuan onikchiu nemouan.
Niman tla nenchojcholoskej niman nemoniyanaskej ipan nemokalpanuan,
tla ijkon,
nikchiuas ma mechajsi sen kokolistli yejuan temiktia.
Kemaj nemotlauelikniuan mechtlaniskej.
26 ’Kemaj nejua nikchiuas ma tlami on tlen nenkikuaj.
Ijkuakon majtlaktli siuamej kikxitiskej pan san ipan se horno.
Kemaj san nenkipouaskej on pan niman nenkimoxexelouiliskej semi achijtsin yejuan cada se de nemejuamej nenkuaskej niman xnemixuiskej.
27 ’Niman maski tla nochi in yonemechchiuilij,
sanken* xnennechtlakamatij,
yej sanken* nennechixnamikij,
28 nejua no nemechixnamikis.
Niman ikan tlauejli nikmiyekilis nemocastigo chikomepa más ipampa nemotlajtlakol.
29 Niman pampa sanoyej nenmayanaskej,
hasta nemokoneuan tlakamej niman siuamej nenkinkuaskej.
30 Nejua nikinxoxotonis kampa nenkimauistiliaj nemodioses ikuapan tepemej.
No ijki,
nikintetlajtlapanas nemotlaixpanuan* kampa nenkitlatiaj kopajli.
Nemotlalnakayouan nikintepayolos ipan on nemoídolos yejuan no xyoltokej.
Sanoyej nikualanis nemotechkopa.
31 Nikinxoxotonis nemokalpanuan niman nemotiopanuan,
niman xok nikselis inajuiyalis nemouen yejuan nikuelitaya.
32 ’Nikxoxotonis nemopaís,
niman nemotlauelikniuan yejuan uajlaskej uajchantiskej tlamojkaitaskej ken tlaixpolijtos.
33 Niman nemejuamej nemechtotokatinemis ika sen espada niman nemechchajchayauas nochiuiyan imanian naciones.
Nemopaís nokauas ken sen xalpatlajkan,
niman nemokalpanuan momoxiuiskej hasta ipan tlajli.
34-35 Kemaj on tlajli kiselis on neseuijli yejuan nemejuamej xonenkimakakej cada chikomej xipan ijkuak nenchantiyaj ompa.
On tlajli noseuis chika nemejuamej nennemiskej ken esclavos ipan on tlaltin de nemotlaluelikniuan.
Melauak nenkajteuaskej on tlajli niman yejua kipiyas neseuijli chika nennemiskej ipan imintlal nemotlauelikniuan.
36 ’Niman nemejuamej yejuan sanken* nennemiskej ipan imintlal nemotlauelikniuan,
nikchiuas para sanoyej xmojkamikikan hasta sen xojtli uaki ijkuak nenkakiskej chapanis nemontlatlaksaskej ken yakaj mechtojtokaskia ikan sen espada,
niman nenuejuetstiaskej maski xakaj mechtojtokas.
37 Hasta nemoxixinijtiaskej se iuan okse ken nenchojcholoskiaj de sen guerra maski xakaj mechtojtoka.
Yejua ika,
nion se de nemejuamej xuelis kimixnamikis nemotlauelikniuan.
38 Niman ompa nenmijmikiskej intsajlan on naciones de nemotlauelikniuan.
Nemotlauelikniuan de on país tlamiskej mechpopoloskej.
39 Niman nemejuamej yejuan sanken* nennemiskej ipan intlal nemotlauelikniuan,
nenmikiskej ipampa nemoxompayejyeualis,
niman nenmikiskej san seknek iuan nemotajuan ipampa iminxompayejyeualisa.
40 ’Pero tla nemoyolkuitiskej niman nennechijliskej nochi nemotlajtlakoluan,
niman on tlajtlakojli yejuan okichijkej nemoachtojtauan ika nixkooyejyejkej niman ika onechixnamikkej,
41 niman yejua ika nejua no onemechchixnamik,
niman onemechuikak ipan iminpaís nemotlauelikniuan,
niman ompa on xkuajli nemonemilis nenkitaskej ika xitlaj* kijtosneki,
42 tla ijkon,
nejua nikelnamikis on pacto* yejuan onikchiu iuan Abraham,
Isaac niman iuan Jacob.
Niman no nikelnamikis ika onikintlajtolmakak para nikinmakas yejuamej niman iminuejkakoneuan on tlajli Canáan.
43 Pero achtoj,
nochimej on tlakamej nonekis kisaskej ipan on tlajli.
Kemaj on tlajli kiselis on neseuijli yejuan nemejuamej xonenkimakakej cada chikomej xipan ijkuak nenchantiyaj ompa.
Pero nemejuamej ika onkaj nenmoyolkokoskej ipampa nemotlajtlakoluan niman pampa xonenkitlakamatkej notlanauatiluan,
nion xonenkinekej onenkiselijkej noleyes.
44 ’Pero maski nenkichiuaskej miyek tlajtlakojli niman nennemiskej ipan imimpaís nemotlauelikniuan,
nejua nemechelnamikis.
Xnemechtlauelkauas,
nion xtlamis nemechmiktis nemochimej*,
nion xnikelkauas on pacto* yejuan onikchiu inmiuan nemoachtojtauan pampa nejua ninemoTEKO Dios.
45 Yej,
nikelnamikis on pacto* yejuan onikchiu iminuan nemoachtojtauan ijkuak onikinkixtij Egipto imixpan on oksekimej naciones,
para oninochiu iminDios.
Nejua nemoTEKO nikijtoua.”
46 In yejua leyes,
tlanauatiltin,
niman tlamachtiltin yejuan toTEKO okimakak Moisés ipan on tepetl Sinaí para on israelitas.