Tlatiochiualistli para yejuan kitlakamatij ileyes toTEKO
28
’Niman kemaj Moisés okinmijlij on israelitas:
“Tla melauak nenkitlakamatiskej nemoTEKO Dios niman nenkichiuaskej nochi itlanauatiluan yejuan aman nemechnauatia,
tla ijkon,
toTEKO kichiuas para más nenuejueyixtiaskej xken nochimej on oksekimej naciones ipan in tlaltikpaktli.
2 Niman no nemopan uajlas niman nokauas nochi in tlatiochiualistin,
pampa nenkitlakamatij nemoTEKO Dios.
3 ’Nentlatiochijtin yeskej ipan on ueyikalpan niman ipan on campo.
4 ’Nentlatiochijtin yeskej ikan miyekej nemokoneuan,
ikan miyek nemotlatok,
inkoneuan nemouakaxuan,
inkoneuan nemoborregos niman inkoneuan nochimej on sekimej nemoyolkauan.
5 ’Nentlatiochijtin yeskej ika miyek tlakuajli yejuan onyas ipan nemochikiu niman ipan nemokuejxon.
6 ’Niman nemejuamej nentlatiochijtin yeskej ipan nochi on tlen nenkichiuaskej nemochan,
ipan campo,
niman nochiuiyan.
7 ’ToTEKO mechinmaktilis nemotlauelikniuan ijkuak mechuijsokiskej.
Yejuamej kuajli uajtekpantiaskej ijkuak uajlaskej nemotech,
pero nochajchayauaskej niman ontlatlaksaskej sa kanika.
8 ’ToTEKO kitiochiuas nochi on tlajtlamach* yejuan nenkichiuaskej,
niman kuajli kintemitis nemokueskonuan.
Niman kintiochiuas nemotlaluan yejuan mechmakas para ompa nennemiskej ikan miyek pakilistli.
9 ’Tla nenkichiuaskej itlanauatiluan niman nenkitokaskej iojui,
nemoTEKO Dios mechpiyas ken ikoneuan nentlakauiltin itech,
ijkon ken omechtlajtolmakak.
10 Kemaj nochimej on tlaltikpaktlakamej ipan in tlatikpaktli kitaskej ika nemejuamej nemochiuaj ikoneuan toTEKO Dios,
niman nochimej mechmakajsiskej niman mechtlakaitaskej.
11 ToTEKO mechititis ika mechtlajsojtla yejua ika mechinmakas miyekej nemokoneuan,
niman nemoyolkauan kimpiyaskej miyekej inkoneuan.
Niman kichiuas para nenkipiyaskej miyek tlakyotl ipan on tlajli yejuan okintlajtolmakak ika itokatsin nemoachtojtajuan ika mechmakas.
12 ToTEKO kitlapos on cielo kampa kejeua on kiautli para kuajtitlanis on kiautli ijkuak on nemotlal kinekis.
Niman mechtiochiuas ipan nochi tekitl yejuan nenkichiuaskej.
Uelis nenkintlanejtiskej tlakuajli oksekimej naciones,
pero nemejuamej xnonekis yakaj nenkitlaneuiliskej itlaj.
13 ToTEKO nochipa mechtlalis ken tlayekankej intech on oksekimej naciones,
niman yejuamej xkaman mechyekanaskej.
Nochipa nenricos yeskej niman nenkojtijkej yeskej,
niman xkaman nennemiskej mayankej niman xnenkojtikej.
ToTEKO ijkon kichiuas tla nenkitlakamatiskej niman nenkichiuaskej itlanauatiluan yejuan aman mechnauatia.
14 Maka kaman nenkinkauaskej in tlanauatiltin para yej nenkinneltokaskej oksekimej dioses,
nenkinmauistiliskej niman nenkintekipanoskej.
Tlauelijli para on yejuan xkitlakamatis toTEKO
15 ’Kemaj Moisés okinmijlij:
‘Pero tla xnenktlakamatij nemoTEKO Dios,
nion xnenkichiuaj nochi itlanauatiluan niman ileyes on yejuan aman yomechnauatij,
uajlas nemopan nochi in tlaueliltin:
16 ’Nentlaueliltin yeskej ipan ueyikalpan,
niman ipan campo.
17 ’Tlauelijli yes on tlakuajli yejuan onyas ipan nemochikiu niman ipan nemokuejxon.
18 ’Nentlaueliltin yeskej yejua ika xuelis nenkimpiyaskej miyekej nemokoneuan,
nion itlakyo nemotlatok,
nion inkoneuan nemouakaxuan,
nion inkoneuan nemoborregos nion nochimej nemoyolkauan.
19 ’Niman nentlaueliltin yeskej ipan nochi on tekitl yejuan nenkichiuaskej.
20 ’ToTEKO mechajtitlanilis tlauelijli niman popolouilistli niman ajmantli ipan on tlen nenkichiuaskej,
niman amanaman mechpopolos pampa onenkichijkej on tlen sanoyej xkuajli niman onenkitlalkauijkej toTEKO.
21 ToTEKO mechajtitlanilis miyek kokolistli yejuan mechmiktis ne ipan on tlajli kampa nenchantiskej.
22 No ijki,
mechajtitlanilis kokolistin yejuan temiktia,
uakatlatlajxistli,
tatapachiuilistli yejuan temojtij,
totonalistli* yejuan teijyomiktia,
tlauatsalistli,
niman miyek chauistli ipan nemotlatok.
Nochi in tlajtlamach* kokolistli mechajsis hasta kaman mechixpoloua.
23 Xkiauis niman nemotlal chikauak yes ken tepostli.
24 Yej ken kiautli,
toTEKO kuajtitlanis ajakaxajli niman ajakatlalteutli hasta kaman nenmijmikij.
On israelitas xtetlaniskej tla tlajtlakouaj
25 ’ToTEKO mechtemaktilis para ma mechtlanikan nemotlauelikniuan.
Ijkuak nenyaskej ipan guerra kualtsin nentekpantiaskej,
pero ijkuak mechixnamikiskej,
sa kanika nemontlatlaksaskej.
Niman nochimej on tlakamej ipan in tlaltikpaktli nomojtiskej ika on tlen nochiuas nemotech.
26 On totomej niman on tepeyolkej tekuanimej mechkuaskej ijkuak yonenmikkej,
niman xakaj nemis ompa para kinmomojtis.
27 ’ToTEKO mechtlajyouiltis ikan tlaxuistin yejuan najayochpilouaj ijkon ken okinchiuilij on egipcios.
No ijki,
kichiuas para ma mechajsi sauatl,
niman on kokolistli yejuan sanoyej kekexkik,
niman xuelis nempajtiskej.
28 No ijki,
toTEKO kichiuas xajakayouakan,
xixpajpayatikan,
niman xtlamachilispoliuikan.
29 Ijkuak tlakualispan nenmajmayautinemiskej ken se yejuan xtlacha.
Nochi tlen nenkichiuaskej xitlaj* kuajli kisas.
Mojmostla mechtlajyouiltiskej niman mechtlachtekiliskej,
niman xakaj mechpaleuis.
30 Nenkijtlaniskej sen siuatl para nenkimonamiktiskej,
pero okse tlakatl iuan notekas.
Nenkimochijchiuiliskej nemokal,
pero xipan nenchantiskej.
Nenkitôkaskej uvas,
pero xnenkimatiskej ken uelik itlakyo.
31 Nemixpan kechkoyoniskej nemouakax,
pero nemejuamej xnenkikuaskej inakayo.
Mechkuiliskej nemopoloko* niman xok mechkuepiliskej.
Nemoborregos mechichtekiliskej nemotlauelikniuan,
niman xakaj mechpaleuis para oksejpa mechinkuepiliskej.
32 Nemokoneuan tlakamej niman siuamej kinuikaskej ipan oksekimej naciones.
Maski sanoyej nenkintejtemoskej,
xuelis nenkinnextiskej.
33 Tlakamej yejuan xnenkinmixmatij kikuaskej itlakyo nemotlatok,
niman on tlen nenkitlaniskej ipan nemotekiu nochi para yejuamej yes.
Niman nochipa nentlajyouiskej,
niman mojmostla nemokanauiltiskej.
34 Ijkuak nenkitaskej nochi in tlajtlamach*,
nentlamachilispoliuiskej.
35 ToTEKO mechtlajyouiltis ikan nayochpiloualistli ipan nemoteteponuan niman ipan nemometskojyouan.
Niman mechnokentis ipan nochi nemotlalnakayo desde nemokxipalko hasta nemokuanepantlaj,
niman xuelis nenpajtiskej.
36 ’ToTEKO kichiuas para nemejuamej niman nemorey ma mechuikakan ipan sen nación yejuan nemejuamej niman nemoachtojtajuan xonenkixmatkej.
Niman ompa nenkinmauistiliskej on dioses yejuan tlachijchijtin de kojtli* niman de tetl.
37 On tlakamej sanoyej nomojtiskej ijkuak mechitaskej ken nentlajyouiyaj.
Niman yejuamej mechuejuetskiliskej,
niman nemoka sanoyej kamanaloskej ipan nochi on kalpantin kampa mechuikas toTEKO.
38 ’Nenkitôkaskej miyek xinachtli pero nenkipixkaskej san achijtsin,
pampa kikuaskej on chapolimej.
39 Nenkitôkaskej uvas niman kuajli nenkuidaroskej,
pero xnenkitekiskej itlakyo,
nion xnenkoniskej vino pampa nochi on uvas kikuaskej okuilimej.
40 Nenkimpiyaskej olivo kojtin* nochiuiyan ipan nemotlal,
pero xuelis nemochauaskej ikan iminaceite,
pampa itlakyo selikaxinis.
41 Nenkipiyaskej nemotelpochuan niman nemochpochuan,
pero xuelis nemiskej nemouan pampa kinmajajsiskej niman kinuikaskej ipan oksekimej países.
42 On chapolimej kitlamiskej nochi on kojtin* niman nochi nemotlatok.
43 On xchanejkej yejuan chantij ipan nemotlal más miyekixtiaskej niman más kipiyaskej poder,
niman nemejuamej yej nenachijtsintitiaskej niman nenkipolojtiaskej nemopoder.
44 Yejuamej uelis mechtlanejtiskej,
pero nemejuamej xitlaj* nenkipiyaskej para nentetlanejtiskej.
Yejuamej tlayekanaskej,
pero nemejuamej nentlatokatiaskej.
45 ’Nochi in tlauelililtin nemopan uetsis niman mechtokatinemis hasta kaman mechpopoloua,
pampa xonenkinekkej onenkitlakamatkej nemoTEKO Dios nion xonenkichijkej itlanauatiluan niman ileyes yejuan otlanauatij yejua.
46 Nochi in tlajtlamach* tlaueliltin,
yejua yes sen señal ika toTEKO mechcastigaros nemejuamej niman nemouejkakoneuan para nochipa.
47 Pampa xonenkitekipanoj nemoTEKO Dios ikan pakilistli ijkuak miyek tlajtlamach* omechmakak,
48 nenkintekipanoskej nemotlauelikniuan yejuan toTEKO kintitlanis nemotech.
Nenkipanoskej mayantli,
amiktli,
xnenkipiyaskej nemotlaken niman sanoyej tlamach mechpolos.
ToTEKO kichiuas para nemochiuaskej esclavos de on nemotlauelikniuan hasta kaman mechpopolouaj.
49 ToTEKO kuajtitlanis nemotech sen nación yejuan sanoyej uejka ualeuas ken sen kuaktli ijkuak amanaman uajnopilojtikisa para kajsi on yolki yejuan kikua.
Sen nación yejuan xnenkintlajtolkakiskej.
50 On tlakamej yeskej sanoyej xkuajkualtin,
niman xkintlakaitaskej on ueuentsitsimej,
nion xkinmikneliskej yejuan kokonej.
51 Yejuamej kinkuaskej inkoneuan nemouakaxuan niman on tlen tlakis ipan nemotlal,
hasta kaman nochi mechtlamiliskej.
Yejuamej xmechkauiliskej trigo,
nion vino,
nion aceite de olivo,
nion ikoneuan nemouakaxuan,
nion ikoneuan nemoborregos.
Ijkon nenmikiskej ikan apistli.
52 Kinyejyeualoskej nemoueyikalpanuan yejuan kipiyaj tepanchinantin,
niman kinuijsokiskej hasta kaman xixinij on tepanchinantin yejuan ueuejkapanmej niman sanoyej kojtikej yejuan nemejuamej nenkuitiayaj inka nemomanauiskiaj.
Kemaj,
melauak kinyejyeualoskej nochimej on oksekimej uejueyikalpanmej niman kinuijsokiskej imanian on nemopaís on yejuan toTEKO omechmakak.
53 Chika nemotlauelikniuan ipan nemiskej kixoxotoniskej nemoueyikalpanuan,
sanoyej nenkipiyaskej ueyi mayantli hasta nemokoneuan nenkinkuaskej.
Nenkinkuaskej nemokoneuan tlakamej,
niman nemokoneuan siuamej yejuan nemoTEKO Dios omechinmakak.
54 Hasta sen tlakatl yejuan más teikneliani,
noso más nomaluiya niman yolyemanki*,
xkiknelis ikniu nion isiuau maski sanoyej kitlajsojtla,
nion ikoneuan yejuan sanken* nemij.
55 Nion xitlaj* kinmakas innakayo ikoneuan yejuan kikuas pampa yejua no xkajxilis tlen kikuas.
Ijkon yes on ajmantli yejuan nenkipiyaskej ijkuak nemotlauelikniuan mechyejyeualoskej ijtik nemouejueyikalpanuan.
56 Hasta sen siuatl yejuan más yolyemanki* niman teikneliani,
hasta xkuelita kicholos tlajli,
nokuepas xompatik.
Maski kitlajsojtlaya* iueuentsin,
xok kiknelis,
nion ikoneuan tlakamej niman siuamej.
57 Yejua,
ijkuak kinemitis ikonetsin,
niyanas para kikuas on konetsintli,
sanken* iuan iuikal.
Xkimakas iueuentsin* nion ikoneuan pampa xok onyas itlaj okse para kikuas ijkuak nemotlauelikniuan kinyejyeualoskej nemouejueyikalpanuan.
58 ’Tla xnenkichiuaskej nochi in tlanauatiltin yejuan tlajkuilolnestikaj ipan in amamoxtli*,
nion xnenkitlakaitaj itokatsin toTEKO Dios yejuan sanoyej ueyixtikaj,
59 yejua mechajtitlanilis nemejuamej niman nemouejkakoneuan uejueyi niman temojti kokolistin yejuan xonkaj tlinon ika pajtiskej.
60 ToTEKO kuajtitlanis on temojtij kokolistin yejuan okinmajsika on Egipcios,
yejuan sanoyej onenkimakaskej.
Niman on kokolistin nochipa mechtlajyouiltis.
61 No ijki,
mechajtitlanilis ok seki kokolistin niman chauistin yejuan xtlajkuilolnestikaj ipan in amamoxtli* de tlamachtijli.
Niman nentlajyouiskej hasta kaman nenmikiskej.
62 Maski nemejuamej israelitas sanoyej nenmiyekej katkaj ken sitlalimej ipan cielo,
nemokauaskej sa nenkeskimej pampa xonenkitlakamatkej nemoTEKO Dios.
63 ’Ijkon ken toTEKO opak para omechchiuilij tlen kuajli niman omechmiyekilij,
no ijki pakis para mechtlaxoxotonilis,
niman mechmiktis.
Sano yejua mechkixtis ipan on tlajli yejuan aman nenkiseliaj ken nemoyaxka*.
64 ToTEKO mechsesemanas imanian naciones desde ipeuyan in tlaltikpaktli hasta itlamiyan.
Niman ompa nenkinmauistiliskej dioses,
dioses yejuan tlachijchijtin ikan kojtli* niman ikan tetl yejuan nemejuamej nion nemoachtojtajuan xonenkimixmatkej.
65 Niman chika nennemiskej ipan on naciones,
xnempakiskej,
nion xnenkinextiskej sen tlajli kampa uelis nemoseuiskej,
pampa toTEKO kichiuas para xnemikan ikan nemojtijli.
Yejua kichiuas para xajmankanemikan ika on nemoajmankaixtololojuan,
niman nesis ika ipan nemoyojlo sanoyej nenmajmanaj.
66 Nochipa itlaj nemopan nochiuasnekis para mechmiktisnekis.
Ipan tonajli niman ipan yeuajli nemojkanemiskej niman xkaman nemoyolika nennemiskej
67 ipampa on tlen temojtij nenkitaskej.
Sanoyej nemomojtiskej hasta nenkijtoskej ijkuak kualkan ‘¡Niknekiskia ma tlayouatitetsi!’
Niman ijkuak tlayoua nenkijtoskej:
‘¡Niknekiskia ma tlanestetsi!’
68 Niman maski toTEKO omechijlij ika xokaman oksejpa nenmokuepaskej ipan on ojtli de Egipto,
yejua mechuikas oksejpa ipan barcos.
Niman ompa nemotetejtekiuiltiskej para ma mechkouakan ken esclavos intech nemotlauelikniuan,
pero xakaj kinekis mechkouas.”