Ipacto* toTEKO iuan Israel ipan on tlajli Moab
29
In yejua pacto* yejuan toTEKO okinauatij Moisés kichiuas iminuan on israelitas ipan on tlajli Moab,
aparte de on achtoj pacto* yejuan yokichijka iminuan ipan on tepetl Sinaí.
2 Moisés okinsentlalij nochimej on israelitas niman okinmijlij:
“Sa no nemejuamej onenkitakej nochi on tlen toTEKO okichiuilij on rey Egipto niman nochimej itekitkauan niman nochi ipaís.
3 Sa no ika nemixtololojuan onenkitakej nochi on uejueyi milagros,
tlamajuisoltin niman chauistin yejuan toTEKO okichiu para okiteititij iueyipoder.
4 Pero hasta aman toTEKO xe mechmaka kajsikamatilistli para nenkimatiskej on tlen kijtosneki nochi on tlajtlamach* yejuan onenkitakej ika nemixtololojuan niman onenkakej ika nemonakasuan.
5 Nejua onemechyekan 40 xipan ipan on xalpatlajkan,
niman ipan nochi on xiutin xoijsoliu nemotlaken,
nion nemokakuan.
6 Xonenkipixkej pan para nentlakuaskej,
nion vino,
noso itlaj okse tlaonijli yejuan tlaxokoliji para nenkoniskej,
para ijki nenkimatiskej ika toTEKO yejua nemoDios.
7 ’Ijkuak otejkokej ipan in tlajli,
Sehón on rey de Hesbón,
niman Og on rey de Basán,
okiskej para otechuijsokiko,
pero otikintlankej.
8 Niman otitoyaxkatijkej iminueyitlalpan niman otikinmakakej itribu* Rubén,
niman itribu* Gad niman on itlajkotribu* Manasés.
9 Yejua ika tej,
xchiuakan nochi in tlanauatiltin de in pacto* para ijki nochi tlen nenkichiuaskej kuajli kias.
10 ’Aman nemochimej* nikan nennemij ixpan nemoTEKO Dios:
on tlayekankej ipan cada tribu,
on uejueyixtokej tlakamej,
on uejueyitekiuajkej,
nochimej on oksekimej tlakamej israelitas,
11 nemokoneuan,
nemosiuauan,
on xchanejkej yejuan nemij nenmouan yejuan mechajkuiliaj kojtli* para tlajtla niman on yejuan mechajkuiliaj atl.
12 Nochimej nennemij nikan ixpan toTEKO Dios para nenkiseliskej sen pacto* yejuan nemoTEKO Dios aman kichiua nemouan ika sen tlajtolmakalistli ika itokatsin.
13 Aman ika on pacto* yejua mechteneua melauak ken nenikoneuan,
niman ika yejua nemoTEKO Dios ken okintlajtolmak ika itokatsin nemoachtojtajuan Abraham,
Isaac niman Jacob ika ijkon kichiuas.
14 Pero toTEKO xsan nemouan nemejuamej kichiua in pacto* niman in tlajtolmakalistli ika itokatsin,
15 yej no kichiua iminuan nochimej on yejuan aman xe tlakatij nemouejkakoneuan.
16 ’Nemejuamej kuajli nenkimatij kenijki tinemiyaj Egipto niman kenijki otipanokej ipan sekimej naciones yejuan tikinnextiayaj ipan toojui.
17 Otikintakej on xkuajkualtin ídolos yejuan tetlajyelojkej tlachijchijtin ikan kojtli,
tetl,
plata niman oro yejuan on tlakamej kinmauistiliaj.
18 Kuajli xkitakan para maka nion sen tlakatl,
nion sen siuatl,
nion sen familia,
nion sen tribu* kinekis kejkuanis iyojlo itech toTEKO Dios,
niman peuas kinmauistilis imindioses on oksekimej naciones.
Maka semej nemejuamej yes ken sen kojtlakijlotl yejuan chichik ineluayo niman tepajmiktia.
19 ’Tla ijkuak yotlan nenkakij in tlajtolmakalistin ika itokatsin,
semej nemejuamej kijtos ika yejua sanoyej kuajli tlakatl,
niman xkaman ipan uetsis on tlaueliltin maski nouikas ipan xkuajli on ojtli,
tla ijkon,
san ipampa nochimej kiseliskej tlajyouilistli.
20 ToTEKO xkitlapojpoluis yejuan ijkon kichiuas.
Yej sanoyej kualanis itechkopa on tlakatl,
niman nochi on tlaueliltin yejuan tlajkuilolnestikaj ipan in amamoxtli* ipan uetsis.
Niman toTEKO kimpopolos nochimej iuejkakoneuan ipan in tlaltikpaktli.
21 ToTEKO kejkuanis on tlakatl intech nochimej itribus on israelitas niman kichiuas ipan ma uetsi nochi on tlaueliltin de on pacto* yejuan tlajkuilolnestikaj ipan in amamoxtli* de in tlanauatiltin.
22 ’Nochimej nemouejkakoneuan yejuan tlakatitiaskej sakin*,
niman on xchanejkej yejuan ualeuaj ipan oksekimej países,
kitaskej nochi on chauistin niman on kokolistin yejuan toTEKO kuajtitlanis ipan in tlajli.
23 Kitaskej ika nochi in tlajli san kipiya azufre,
istatl niman tlajli yejuan tlatlak.
Xitla uelis kitôkaskej ipan on tlajli pampa on tlajli xuelis kiyolitis nion sen xojtli.
No ijki,
onyas ken onochiu yeuejkaui ijkuak toTEKO okintlatij on uejueyimej kalpanmej Sodoma,
Gomorra,
Adma niman Zeboim.
24 ’Kemaj nochimej naciones tetlajtoltiskej:
‘¿Tline ijkin okichiuilij Dios on tlajli?
¿Tline hasta ijkin okualan iminTEKO?’
25 ’Niman ijkin kiminankiliskej:
‘Pampa okitlalkauijkej on pacto* yejuan iminTEKO Dios okichiu iuan inachtojtajuan ijkuak okinkixtij ne Egipto.
26 Niman yej okinmauistilikej niman onotlakuantelketskej imixpan oksekimej dioses yejuan xkinmixmatiyaj,
nion yejuan iminTEKO xokinmakak para kinmauistiliskej.
27 Yejua ika,
toTEKO okualan impampa in chanejkej ipan in tlajli,
niman okichiu ma uetsi impan nochi tlaueliltin yejuan tlajkuilolnestikaj ipan in amamoxtli*.
28 Niman Dios okinkixtij de in tlajli ikan miyek tlauejli niman okinchajchayau ipan oksekimej naciones ken aman nochijtikaj.’
29 ’Onkaj tlajtlajmach yejuan toTEKO xkineki ma tikmatikan,
yej san yejua kimati.
Pero on ileyes niman itlanauatiluan yejuan otechimpanextilij tejuamej niman touejkakoneuan,
yejua kineki para nochipa ma tikintlakamatikan.