Kenijki on israelitas oksejpa kiseliskej tlatiochiualistli
30
’Ijkuak nemopan uajlas nochi in tlatiochiualistin niman in tlaueliltin yejuan nemechtlalilia aman,
niman nenkinemiliskej tlinon kijtosneki on tlatiochiualistin niman on tlaueliltin ipan on naciones kampa nemoTEKO Dios mechchajchayauas,
2 tla nemejuamej niman nemokoneuan nemokuepaj itech toTEKO Dios niman nenkitlakamatij ikan nochi nemoyojlo niman nochi nemoalma ken nejua aman nemechnauatia,
3 tla ijkon,
nemoTEKO Dios oksejpa mechpaleuis,
niman mechiknelis,
niman mechkixtis intech nemotlauelikniuan.
Yejua mechsentlalis oksejpa.
Mechonanas nochiuiyan impan on naciones kampa omechsesemanka.
4 Maski nennemiskej kampa más uejka ipan in tlaltikpaktli nemoTEKO Dios hasta nepa yas mechonnanas,
niman oksejpa mechajuikas.
5 ToTEKO mechuikas oksejpa ipan on tlajli yejuan nemoachtojtajuan okinoyaxkatijkaj*,
niman nemejuamej oksejpa nemoyaxkatiskej.
Niman kichiuas para kuajli ma kisa nemotekiu,
niman más kinmiyekilis nemokoneuan xken inkoneuan nemoachtojtajuan.
6 NemoTEKO Dios kichiuas para ika nochi nemomoyojlo niman iminyojlo nemouejkakoneuan uelis nenkinekiskej nenkintlakamatiskej itlanauatiluan on pacto*.
Ijkon nenkitlajsojtlaskej ika nochi nemoyojlo niman ika nochi nemoalma,
niman nochipa nennemiskej ipan nemotlal.
7 ’NemoTEKO Dios kichiuas para ma uetsi nochi in tlaueliltin impan nemotlauelikniuan yejuan mechtlaueltotokatinemij.
8 Niman nemejuamej nenuajlaskej itech nemoTEKO Dios niman nenkitlakamatiskej niman nenkichiuaskej nochi in tlanauatiltin yejuan nejua nemechnauatia aman.
9 Kemaj toTEKO kichiuas para ma kisa kuajli nochi tlen nenkichiuaskej ipan nemotekiu.
Kichiuas para xpiyakan miyekej nemokoneuan,
niman kichiuas para ma kipiyakan miyekej inkoneuan nemoyolkauan.
Niman no kichiuas para sanoyej ma tlaki nemotlatok.
Kemaj,
nemoTEKO Dios oksejpa pakis ika on tlen kuajli mechchiuilis,
ken achtoj pakiya ijkuak kinchiuiliaya tlen kuajli nemoachtojtajuan.
10 Ijkon kichiuas tla nenkitlakamatiskej nemoTEKO Dios,
niman nenkichiuaskej nochi itlanauatiluan niman ileyes yejuan tlajkuilolnestikaj ipan in amamoxtli* de in ley,
niman tla nenmokuepaskej itech yejua ika nochi nemoyojlo niman ika nochi nemoalma.
11 ’In tlanauatijli yejuan aman nemechnauatia xsanoyej ouijtikaj* para nenkasikikamatiskej nion para nenkichiuaskej.
12 In tlanauatiltin xonkaj ne ipan cielo para nenkijtoskej:
‘¿Akinon uelis tlejkos ne ipan cielo para techajkuilis itlanauatiluan toTEKO,
niman techmachtis para uelis tikintlakamatiskej?’
13 No ijki,
xonkaj ne ipan on okse lado de on mar para nenkijtoskej:
‘¿Akinon uelis kipanos on mar para techajkuilis itlanauatiluan toTEKO niman techmachtis para uelis tikintlakamatiskej?’
14 Yej on tlanauatijli onkaj sanoyej nisiu de nemejuamej.
Onkaj ipan nemokamak niman ipan nemotlamachilis para uelis nenkintlakamatiskej.
15 ’Xkitakan,
aman niktlalia nemixpan on tlen kuajli niman on tlen xkuajli.
Niktlalianemixpan nemilistli niman mikilistli.
Aman tej,
xtlapejpenikan katlejua nenkitokaskej.
16 Tla nenkintlakamatij in tlanauatiltin yejuan aman nemechnauatia niman nenkitlajsojtlaj* nemoTEKO Dios niman nenkitokaj iojui,
niman nenkichiuaj itlanauatiluan niman ileyes niman itemachtiluan,
tla ijkon,
uelis nennemiskej niman nenkipiyaskej miyekej nemokoneuan.
Ijkon nemoTEKO Dios mechtiochiuas ipan on tlajli kampa nenkalakiskej para nemoyaxkatiskej.
17 Pero tla ipan nemoyojlo nenkitlalkauiskej toTEKO niman xnenkintlakamatiskej nochi in tlanauatiltin,
niman yej oksekimej dioses mechixkajkayauaskej niman imixpan nemotlakuantelketsaskej para nenkinmauistiliskej,
18 kuajli xmatikan,
amantsin nemechijlia ika melauak nenmikiskej,
niman ika xuejkauis nennemiskej ipan on tlajli yejuan nenkimoyaxkatiskej ijkuak yonenkipanokej on río Jordán.
19 ’Ipan in tonajli nikintlalia ken testigos on yejuan chantij ne iluikak niman ipan in tlaltikpaktli,
ika nemechmakatikaj tlinon nenkitlapejpeniskej:
tla nemilistli noso mikilistli,
tlatiochiualistli noso tlauelijli.
Aman tej,
xtlapejpenikan nemilistli para xnemikan nemejuamej niman nemouejkakoneuan.
20 Xtlajsojtlakan nemoTEKO Dios.
Xtlakamatikan niman nochipa yejua xtokakan pampa yejua mechmaka nemilistli,
niman yejua kichiuas para nennemiskej miyek xipan ipan on país yejuan toTEKO okintlajtolmakak ika itokatsin ika kinmakas nemoachtojtajuan,
Abraham,
Isaac niman Jacob.”