Josué okiselij itekiu Moisés
31
Moisés oksejpa okinminots nochimej on israelitas,
niman ijkin okinmijlij:
2 ’Nejua ye nikpiya 120 xipan niman xok niuelis nemechyekanas.
No ijki,
toTEKO yonechijli ika xnikpanos on río Jordán.
3 Pero nemoTEKO Dios mechyekanas ijkuak nenkipanoskej on río.
Yejua tlamis kinmiktis nochimej on naciones kampa nempanotiaskej para nemoyaxkatiskej imintlal.
Josué yes nemotlayekankau ijkon ken yokijtoj toTEKO.
4 ToTEKO no ijki kinchiuilis on tlakamej ken okichiuilij Sehon niman Og reyes de on amorreos yejuan okinxoxotonilij nochi imimpaíses.
5 Niman ijkuak toTEKO kichiuas para on naciones nenkintlaniskej,
xkinchiuilikan nochi on tlen onemechnauatij nenkichiuaskej.
6 Xmokojtilikan niman xmoyolchikauakan.
Maka xmomojtikan,
nion maka xmojkamikikan imixpan pampa nemoTEKO Dios yau nemouan,
niman xmechkauas,
nion xmechtlalkauis.”
7 Kemaj Moisés okinots Josué niman okijlij imixpan nochimej on israelitas:
“Xmokojtili niman xmoyolchikaua,
pampa tejua tikinuikas in tlakamej ipan on kuajli tlajli yejuan toTEKO okintlajtolmakak ika itokatsin ika kinmakas nemouejkatajuan.
Niman tejua yes yejuan tikinxelouilis niman tikinmakas on tlajli ken iminherencia.
8 ToTEKO,
sano yejua mitsyekanas niman nemis mouan.
Xmitskauas,
nion xmitstlalkauis.
Yejua ika,
maka xmomojti,
nion maka timoyolmajxalos.”
On ley para on xipan ijkuak kitlapojpoluiskej nochi teuikilistin
9 Moisés okijkuiloj in tlanauatiltin yejuan onkaj ipan in amamoxtli*,
niman okinmakak on tiopixkej levitas yejuan kiktiyaj on yekcaja ika on pacto*,
niman nochimej on uejueyixtokej tlayekankej intech on israelitas.
10 Niman no okinmijlij in tlanauatijli:
“Cada chikome xipan,
noneki nenkimomachtiskej ixpan nochimej on israelitas in tlanauatiltin ijkuak ajsis on xipan para nochimej on israelitas kintlapojpoluiskej on teuikilistin.
Xchiuakan ipan on semana ijkuak nenkichiuaskej on iluitl ijkuak nochijchiuaj kalmatsitsimej.
11 Xchiuakan ijkuak nochimej nemosentlaliskej ixpan nemoTEKO Dios kampa yejua kitlapejpenis.
12 ’Xkinsentlalikan nochimej on tlakamej,
siuamej,
kokonej niman xchanejkej yejuan chantij ipan nemokalpanuan para ma kakikan,
niman ma kitlakaitakan nemoTEKO Dios,
niman kintlakamatiskej nochi on tlanuatiltin.
13 Ijkon tej,
nemokoneuan yejuan xitlaj* kimatij de in tlanauatiltin,
uelis kakiskej niman kejekoskej kitlakaitaskej nemoTEKO Dios ipan nochi innemilis ipan on tlajli yejuan nemejuamej nenkimoyaxkatiskej sakin* ijkuak yonenkipanokej on río Jordán.”
Isakintlanauatil toTEKO para Moisés
14 Kemaj toTEKO okijlij Moisés:
“Xkaki,
ye ajsitikaj* on tonajli ijkuak timikis.
Aman tej,
xnotsa Josué,
niman xuiya ipan on tabernáculo* kampa ninemi para nikalaktis ipan itekiu ken tlayekanketl.”
Moisés niman Josué oyajkej ipan on tabernáculo* kampa nemi Dios,
15 niman ompa ononextij toTEKO ipan sen moxtli mimiltik yejuan onotlalito kampa ikalakiyan on tabernáculo.
16 Kemaj toTEKO okijlij Moisés:
“Ye nisiu para timikis.
Niman in israelitas nechkauaskej niman xok kitlakamatiskej on pacto* yejuan yonikchiu iminuan.
Ijkon ken se siuatl kitlalkauiya iueuentsin* niman noteka iuan okse tlakatl,
on israelitas nechtlalkauiskej niman kinmauistiliskej on yejuan xmelauak dioses.
17 Ijkuak ijkon kichiuaskej,
nejua sanoyej nikualanis iminuan yejuamej.
Nikintlalkauis niman niniyanas kampa xuelis nechnextiskej.
Xok nikinkakis,
niman on tlakamej tlamis kinmiktiskej.
Sanoyej miyek tlajyouilistli impan uajlas hasta notlajtoltiskej:
‘¿Manin xmelauak nochi in tlajyouilistli topan uajlau ika toTEKO Dios xok touan nemi?’
18 Pero ijkuakon nejua niniyanas más de yejuamej ipampa nochi on tlen xkuajli kichiuaj niman pampa okinmauistilijkej oksekimej dioses.
19 ’Aman tej,
xkijkuilokan in kuikatl niman xkinmachtikan on israelitas para ma nokuikatikan niman nochiuas ken sen testigo inka yejuamej.
20 Xkijkuilokan in kuikatl pampa nejua yonikchiu ma kalakikan ipan on tlajli yejuan onikintlajtolmakak ika notokatsin iminuejkatajuan.
Tlajli kampa sanoyej tlatlaki niman xitlaj* poliui.
Niman ijkuak yotlakuajkej kuajli hasta kaman ixuiskej niman tomauiskej,
kemaj yaskej intech on oksekimej dioses niman kinmauistiliskej.
Nejua xok nechnekiskej niman xkitlakamatiskej on pacto* yejuan onikchiu iminuan.
21 Pero ijkuak impan uajlas miyek tlajtlamach* tlajyouilistli,
nokuikatiskej in kuikatl.
Niman in kuikatl nochiuas ken sen testigo yejuan kinmixkomakas,
niman kinmachistis on tlen xkuajli kichiuaj.
Niman ijki inuejkakoneuan kelnamikiskej in kuikatl niman nokuikatiskej.
Maski xe nikinkalaktia ipan on tlajli yejuan onikintlajtolmakak ika notokatsin,
nejua ye nikmatstikaj kuajli tlinon kinemiliaj kichiuaskej.”
22 On tonajli Moisés okijkuiloj in kuikatl niman okinmachtij nochimej on israelitas para ma uelikan ma nokuikatikan.
23 ToTEKO ijkin okinauatij Josué,
ikoneu Nun:
“Xmokojtili niman xmoyolchikaua pampa tejua tikinuikas in israelitas ipan on tlajli yejuan yonikintlajtolmakak ika notokatsin niman nejua ninemis mouan.”
24 Ijkuak Moisés otlan kijkuiloua nochi in leyes ipan sen amamoxtli*,
25 okinnauatij on levitas yejuan kipiyayaj on tekitl para kiktij on yekcaja ika on ipacto* toTEKO:
26 “Xkiktikan in amamoxtli* ika ileyes toTEKO,
niman xtlalikan inakastlan on yekcaja yejuan kipiya ipacto* nemoTEKO Dios para ompa ma onya ken testigo nemoka nemejuamej israelitas.
27 ’Ijkon xchiua pampa nejua nikmatstikaj ika nemejuamej israelitas nentsotekonchikajkej niman nenyoltechikajkej.
Niman tla aman ijkuak sanken* ninemi nemouan xipan nenkitaj toTEKO,
¿tlinon xnenkichiuaskej sakin* ijkuak yonimik?
28 Xkinuajuikakan nikan nochimej on uejueyixtokej tlayekankej niman intlayekankauan cada tribu* para nejua uelis nikinmijlis in tlajtlamach* niman nikintestigojtlalis on yejuan chantij iluikak niman ipan in tlaltikpaktli,
inka yejuamej.
29 Ijkin nikchiuas pampa nejua melauak nikmatstikaj ika sakin* ijkuak yonimik nenkichiuaskej xkuajli niman nenkitlalkauiskej on ojtli yejuan yonemechnauatij xtokakan.
Niman no nikmatstikaj ika sakin* nemopan uajlas tlajyouilistli,
pampa nenkichiuaskej on tlen sanoyej xkuajli ixpan toTEKO niman yejua sanoyej nenkualaniskej.”
On kuikatl yejuan okijkuiloj Moisés
30 In yejua kuikatl yejuan okixochiijtoj Moisés desde ipeuayan hasta itlamiyan,
imixpan nochimej on israelitas yejuan ompa nemiyaj: