32
“Xkaki cielo*,
niman xkaki on tlaltikpaktli on tlen nejua nikijtos.
2 ’Notemachtil xinis ken kiautli.
Notlajtol yes ken ajuichtli,
ken tlapayautli ipan sakatl yejuan selik,
niman ken atsintli yejuan xini ipan on tlaselistli.
3 ’Nejua nikueyiteneuas itokatsin toTEKO.
¡Xkixmatikan iueyilis toTEKO Dios!
4 Yejua sen ueyixtika temanauijketl.
Nochi kuajli kisa itekiu.
Melajki nochi on tlen kichiua.
Yejua Dios yejuan nochipa kichiua on tlen kijtoua.
Yejua xkaman kichiua itlaj yejuan xmelajki.
Yejua kichiua on tlen melajki niman kuajli.
5 ’On israelitas okichiuilijkej Dios tlen xkuajli.
Aman xok uelis noteneuaskej ikoneuan Dios
pampa sanoyej xompayejyeuamej.
6 ¿Ijkon nenkitlaxtlauilia nemoTEKO,
nemejuamej israelitas yejuan nion xnentlamachilisyejkej niman xnentlamatkej*?
¿Tlen xejua nemotataj yejuan omechtlakatili?
¡Yejua omechchijchiu niman omechmakak nemilistli!
7 ’Xkelnamikikan on tonaltin yeuejkaui kenijki okuajpanotiajkej nemoachtojtajuan.
Xkintlajtoltikan nemotajuan niman on ueuentsitsimej tlayekankej ma mechtlajtlatouilikan nochi.
8 Se tonajli toTEKO yejuan Más Ueyixtikaj,
okinxexeloj tlakamej ipan in tlaltikpaktli para onochijkej sesentlamantikej naciones,
niman okintlalilij nochimej kanon notlalnamikiskej.
Pero on israelitas okinxeloj ikan matlaktli uan ome tribus sano ichkich ken ikoneuan Jacob.
9 Ijkon okichiu pampa yejuamej on israelitas okintlapejpenij para ikoneuan.
Jacob niman iuejkakoneuan yejua iherencia.
10 ToTEKO okiminextij ipan on xalpatlajkan,
ipan on tlajli uaki kampa on ajakatl tlauiteki sanoyej chikauak.
Okinmanauij,
okinmachtij
niman okincuidaroj ikan miyek maluijli
ken yakaj kinmaluiya ixtololouan.
11 Omechcuidaroj ijkon ken sen kuaktli kincuidaroua ikoneuan.
Yejua kuiuixoua itepajsol para kinchiualtia ikoneuan ma patlanikan.
Niman ijkuak kinta ikoneuan siauij,
kimpatlaua imajtlapaluan para ompa ma uetsikan.
Kemaj kinuika ipan itepajsol.
No ijki,
toTEKO okincuidaroj on israelitas.
12 ’ToTEKO iselti okinyekan niman xakaj más.
Niman xakaj dios okipaleuij.
13 ToTEKO okinuikak ken tetlankej ikuapan on tepemej.
Okintlakualtij ika on tlakyotl yejuan más kuajli onkaj ipan campo.
Ipan sen teostotl okixtij nekutli,
niman okinmakak ma konikan.
No ijki,
ipan on olivojkojtin yejuan noscaltiaj ipan on temej,
okinkixtilij aceite de olivo.
14 Okinmakak mantequilla niman leche de iminyolkauan.
Okuajkej innakayo on borreguitos yejuan más kuajkualtin.
Okinkualtij borregos niman chivos yejuan más kuajli de on tlajli Basán.
Okuajkej on trigo yejuan más kuajli,
niman okonikej vino yejuan más kuajli.
15 ’Pero on israelitas sanoyej otekitlakuajkej niman otojtomajkej,
niman kemaj xipan oteitakej.
Sanoyej tojtomajkej katkaj niman onoueyimatkej,
niman okitlalkauijkej iminTEKO Dios yejuan okinchijchiu.
Okajkej on imintemanauijkau niman imintemakixtijkau.
16 On israelitas okichijkej para toTEKO Dios sanoyej ma kualani,
pampa yejua xokixikoj okitak ika okinmauistilijkej dioses yejuan tetlajyelojkej.
17 On israelitas okinmakakej uentli on xkuajkualtin espíritus,
dioses yejuan xejua toDios,
dioses yejuan xkinmixmatiyaj,
dioses yejuan san kemach ononextijkej,
dioses yejuan totajuan xkaman okinmauistilijkej.
18 ’Nemejuamej israelitas,
onenkelkajkej nemotataj yejuan nemotemanauijkau.
Onenkelkajkej on Dios yejuan omechmakak nemilistli.
19 Ijkuak toTEKO okitak tlen okichijkej,
xokinselij on ikoneuan tlakamej niman ikoneuan siuamej
pampa okichiualtijkej ma kualani.
20 Niman toTEKO okijtoj:
‘Nejua niniyanas de yejuamej,
niman nikitas hasta kanon ontlamiskej.
Melauak sanoyej xompayejyeuamej,
niman tekoneuan yejuan xipan teitaj.
21 Onechchiualtijkej para sanoyej ma nikualani
pampa xonikxikoj nikitas ika okinmauistilijkej on dioses yejuan xnejli dioses.
Onechtlauelkuitijkej ika on iminídolos.
Aman nikchiuas para chauatiskej
ijkuak kitaskej ika nikintlajsojtlas* on yejuan xisraelitas.
Nejua nikinkualanis ika sen nación yejuan xkipiyaj tlamachilistli.
22 Notlauel yes ken itlaj tlitl,
niman kauanis hasta ajsis kampa sanoyej uejkatlan.
Tlamis kitlatis nochi tlaltikpaktli niman on tlen tlakis.
Niman no kitlatis hasta ineluayouan on tepemej.
23 Impan yejuamej niktitlanis nochi on tlajtlamach* tlen xkuajli,
impan yejuamej nikintekitiltis nochi notlaminaluan.
24 Mikiskej ikan apistli niman ikan totonalistli*.
Sen xkuajli kokolistli kintlamis.
Nikintitlanilis tepeyolkej yejuan tekuanimej
niman kouamej* yejuan sanoyej pajyojkej.
25 Ipan inojui nemokalpanuan xixiniskej inkoneuan
pampa kinmijmiktiskej ikan espada,
niman inkalijtik onyas miyek nemojtijli.
Telpokamej niman ichpokamej mikiskej.
Ueuentsitsimej niman kokonej yejuan sanken* chichij* no mikiskej.
26 ’Nejua yoniknemilijka nikinsesemanas niman nikimpolos ipan tlaltikpaktli
niman xok yakaj kinmelnamikis.
27 Pero xoniknek para nokauetskaskej notlauelikniuan.
Xnikneki yejuamej ma noueyimatikan,
pampa yejuamej kijtoskiaj:
Tejuamej yotikintlankej ikan topoder.
Xmelauak Dios okincastigaroj.’
28 ’Pero in israelitas xkipiyaj tlamachilistli.
Xuelij nonemiliaj,
¡Xitlaj kajsikamatij!
29 Tla tlamatkej* yeskiaj,
kajsikamatiskiaj
niman kimatiskiaj kanon ontlamiskej.
30 ¿Kenijki ouel san se nemotlauelikniu okintotokak se mil soldados israelitas?
Noso,
¿kenijki san omemej nemotlauelikniuan okintotokak matlaktli mil soldados israelitas
tla toTEKO,
yejuan imintemanauijkau,
xokintekauilij intech yejuamej?
31 ’Totlauelikniuan kuajli kimatij ika imindios xkojtik ken tejuamej toDios.
32 Nemotlauelikniuan kipiyaj palanalistli ken Sodoma niman Gomorra.
Yejuamej ken itlaj uvasyoj yejuan kitlakitiaj uvas pajyoj niman chichik.
33 Iminvino ken iminpajyoj kouamej* yejuan temiktiaj.
34 ’Nochi in nejua nikejtikaj ipan notlamachilis.
Nikejtikaj ken itlaj tesoro,
35 para on tonajli ijkuak nitetlakuepiltis*
niman nikchiuas ma kiselikan on tlen kitocaroua kiseliskej.
Kemaj uetsiskej
pampa xok uejkajtika yes ika ajsis on tonajli ijkuak poliuiskej.
36 ’ToTEKO uajlas niman kinmanauis ikoneuan ijkuak kitas xok kojtikej.
ToTEKO kinmiknelis itekitkauan,
esclavos niman on yejuan tlamanauiltin
ijkuak kitas ika nochimej yokintlalkauijkej.
37 Kemaj kimijlis on israelitas:
¿Kanon nemij nemodioses,
on yejuan temanauiyaj yejuan intech nenmiyanayaj?
38 ¿Kanon nemij nemodioses yejuan kikuayaj ichajka nemouen,
niman koniyaj on vino yejuan nenkinmakayaj ken uentli?
Ma uajlakan para ma mechpaleuikij,
niman ma mechmanauikij.
39 San nejua nikanochi Dios.
Xnemij oksekimej dioses yejuan melauak,
yej san nejua.
Nejua niktemaka nemilistli niman niktekixtilia.
Nejua nitekokoua niman nejua nitepajtia.
¡Xakaj nemi yejuan uelis nomanauis ipan nopoder!
40 Nikuiteua noma ne iluikak,
niman ninotlajtolmaka ika notokatsin ika nejua ninemi para nochipa,
41 ika ijkuak niktentis nopetlankaespada
niman nikchiuas tlen melajki ken kinamiki,
nikintlakuepiltis notlauelikniuan.
¡Nikincastigaros ken kinnamiki on yejuan nechtlauelitaj!
42 Nochi notlaminaluan nikinyejyesyotis ika inyesyo notlauelikniuan.
Niman noespada kintlamis nochimej yejuamej:
iminyesyo on yejuan yomikkej,
niman on yejuan okinmajsikej,
niman on tlayekankej yejuan notlauelikniuan.
43 ’¡Xpakikan,
nemochimej* tlakamej ipan tlaltikpaktli iuan ikoneuan Dios!
Yejua tetlakuepiltis pampa okinmiktijkej itekitkauan.
Melauak,
kintlakuepiltis itlauelikniuan.
Yejua kixtis nochi tlajtlakojli yejuan onkaj ipan ipaís,
niman kintlapojpoluis ikoneuan.”
Isakin tlanauatiluan Moisés
44 Moisés,
iuan Josué ikoneu Nun,
oyajkej imixpan on israelitas.
Kemaj Moisés okixochiijtoj nochi in kuikatl desde ipeuayan hasta itlamiyan para ma kakikan nochimej on israelitas.
45 Ijkuak Moisés otlan kijtoua nochi in kuikatl,
46 okinmijlij on israelitas:
“Kuajli xnemilikan nochi on tlajtlamach* yejuan aman yonemechijli.
Niman xkinnauatikan nemokoneuan ma kichiuakan nochi on tlen kijtouaj in tlanauatiltin,
47 pampa in xejua itlaj yejuan nemejuamej uelis san nenkauilmatiskej.
In tlanauatiltin mechmakas nemilistli.
Niman tla nenkintlakamatiskej uejkauis nennemiskej ipan on tlajli yejuan onkaj ne okse lado de on río Jordán yejuan nemoyaxkatiskej.”
Dios okauilij Moisés ma kita on kuajli tlajli itoka Canaán
48 Sano ipan in tonajli toTEKO okinots Moisés,
niman okijlij:
49 “Xuiya impan on tepemej de Abarim niman xtlejko ipan on tepetl Nebo yejuan onkaj ipan imintlal on moabitas ixpan on ueyikalpan Jericó.
Niman desde ompa xkonta on tlajli Canaán yejuan nikinmakas on israelitas.
50 Ipan on tepetl kampa titlejkos ompa timikis,
ken mokniu Aarón yejuan omik ipan on tepetl Hor.
51 Nemejuamej omemej xonenkichijkej on tlen kuajli notech imixpan on israelitas ijkuak nennemiyaj ipan on atlautli Meriba nisiu Cades ipan on xalpatlajkan Zin.
Xonenkichijkej on tlen kuajli notech pampa xotiktlakaitakej noyektotajtsin inmixpan.
52 Yejua ika aman,
san uejka uelis tikontas on tlajli yejuan nikinmakas on israelitas,
pero xuelis tikalakis ompa.”