Moisés kintiochiua itribus Israel
33
Ijkuak poliuiya achijtsin para mikis Moisés,
itekipanojkau toTEKO Dios,
ijkin okintiochiu on israelitas ika in tlajtojli:
2 “ToTEKO oualeu de on tepetl Sinaí.
Onokuiteu ken on tonaltsintli,
desde on tepetl Seir
niman desde on tepemej de Parán ouajpetlantiaj imimpan ikoneuan.
Ye yejkotikaj iminuan matlaktli mil ángeles,
niman kuajki ipan iyekma on ley yejuan nesi ken sen tlimilinajli.
3 ToTEKO kintlajsojtla on israelitas.
Kinmanauiya on yejuan iyekkoneuan.
Yejuamej notlajkalij mokxitlan,
niman kiseliaj motlanauatiluan.
4 Moisés otechmakak on tlanauatiltin
ken herencia yejuan tiiuejkakoneuan Jacob.
5 ToTEKO yejua onochiu torey ne Jesurún
ijkuak itribus on israelitas onosentlalijkej
san sekan iminuan intlayekankauan.”
6 Ijkin okijtoj Moisés itechkopa itribu* Rubén:
“¡Ma nemi itriubu Rubén niman maka kaman ma miki!
Niman sanoyej ma miyekiyakan iuejkakoneuan.”
7 Ijkin okijtoj Moisés itechkopa itribu* Judá:
“ToTEKO,
xkaki inueyikatsajtsilis iuejkakoneuan Judá.
Xchiua ma nokuepakan oksejpa intech on oksekimej tribus.
Xkinmanaui ika moueyipoder intech intlauelikniuan.”
8 Ijkin okijtoj Moisés itechkopa itribu* Leví:
“Tejua,
toTEKO,
otikpanextij on tlen otiknek itech on Tumim niman Urim
itechkopa on yolmelajkej levitas yejuan otikintlapejpenij para tiopixkej.
Otikintlatlatak ne Masah niman itech on atl de Meriba.
9 On levitas okijtokej de imintajuan:
‘xkaman temechitaj’,
niman de iminikniuan okijtokej:
‘xtemechixmatij’,
niman de iminkoneuan okijtojkej:
‘xtikmatij nenakinomej’.
Pero yejuamej okitlakamatkej motlajtoltsin niman okejekej mopacto*.
10 On levitas kinmachtiaj motlanauatiluan iuejkakoneuan Jacob,
niman moleyes iuejkakoneuan Israel.
Mixpan kitlatiskej kopajli,
niman kinuentlaliskej yolkej yejuan tlatlaskej ipan motlaixpan*.
11 ToTEKO,
xtiochiua iminchikaualis,
niman xkinselili nochi imintekiu tlen kichiuaj ikan paktli.
Xkinnomiyopojposteki imintlauelikniuan,
niman maka sa kaman ma nokuiteuakan.”
12 Ijkin okijtoj Moisés itechkopa itribu* Benjamín:
“On tlakamej yejuan kisaj itech itribu* Benjamín
yejuan toTEKO sanoyej kintlajsojtla
ma nemikan iminyolika,
pampa on yejuan “Más Ueyixtikaj” nochipa nemi iminuan.
Yejua nochipa kinmejeuas.”
13 Ijkin okijtoj Moisés itechkopa itribu* José:
“ToTEKO ma kintiochiua imintlaluan
ika on kualtsin ajuichtli yejuan ualeua ipan cielo,
niman ika on atl yejuan kueponi,
yejuan ualeua kampa tlauejkatlan ijtik in tlaltikpaktli.
14 Niman ma kitiochiua ika on yejuan más kuajli tlakyotl de on xipan
niman on yejuan más kuajli tlaki cada metstli.
15 Niman ma kitiochiua ikan on yejuan nochipa más kuajli tlaki ipan on tepemej,
niman ipan on tlamimiltin yejuan nochipa onkaj.
16 Ma kiselikan on tlen sanoyej kuajli tlakyotl yejuan tlaki ipan in tlajli.
Ma kiselikan itech toTEKO yejuan ikan itetlajsojtlalis*
onechnotitij ipan on tlakotepajsojli yejuan kauantikatka.
Nochi in tlatiochiualistli ma uajla ipan itribu* José,
pampa yejua sen tlayekanketl katka intech ikniuan.
17 Yejua kualtetsin ken iyenkuiyokoneu sen toro ueyi.
¡Sanoyej kojtikej ikuakuauuan ken ikuakuauuan on yolki itoka búfalo!
On kuakuautin kitosneki ikoneu Manasés iuan on miyekej miles de iuejkakoneuan,
niman ikoneu Efraín iuan on matlaktli mil iuejkakoneuan.
Ikan ikuakuauuan,
kinuijsokis nochimej naciones,
hasta kaman kinsentlalia san sekan kampa ontlami in tlaltikpaktli.”
18 Ijkin okijtoj Moisés itechkopa itribu* Zabulón niman itribu* Isacar:
“Xpiyakan paktli neniuejkakoneuan Zabulón kampa nenkistinemij ipan on mar,
niman xpiyakan paktli neniuejkakoneuan Isacar kampa nenkistinemij ne ipan on tlajli.
19 Yejuamej kinotsaskej miyek tlakatla para yaskej ipan tepetl,
niman ompa kinuentlaliskej on uentli yejuan noneki para toTEKO.
Nempakiskej ika on miyek riquezas yejuan onkaj ipan mar,
niman nempakiskej ika on tesoros yejuan iyantikaj ipan on xajli itenko on mar.”
20 Ijkin okijtoj Moisés itechkopa itribu* Gad:
“Ma kiyekteneuakan Dios pampa okueyikatilij iueyitlalpan Gad,
yejuan nopechteka ken sen leona.
Niman ijkuak Gad kajsi sen yolki,
kitlankojkotona imauan niman itsontekon.
21 On tlakamej ipan itribu* Gad,
okitlapejpenikej tlajli yejuan más kuajli.
Okiselijkej miyek ken kitocaroua sen tlayekanki.
Ijkuak intlayekankauan on israelitas onosentlalijkej,
yejuamej okitlakamatkej nochi on tlen melajki yejuan toTEKO tlanauatia.”
22 Ijkin okijtoj Moisés itechkopa itribu* Dan:
“Itribu* Dan ken sen leónkonetl
yejuan uajtsikuini desde ipan itlalpan Basán.”
23 Ijkin okijtoj Moisés itechkopa itribu* Neftalí:
“Iuejkakoneuan Neftalí,
kuajli kiyolpaktiaj toTEKO,
niman kiseliaj sanoyej miyek itlatiochiualis.
Yejua iyaxka* on tlajli itech on mar itoka Galilea hasta ikalakiyan tonaltsintli.”
24 Ijkin okijtoj Moisés itechkopa itribu* Aser:
“Más ma kitiochijkateneuakan itribu* Aser xken oksekimej itribus Israel.
Niman más ma kinekikan ikniuan.
Itribu* Aser no kipiyas miyek kojtin* de olivos ipan itlal.
25 Itsakuijlouan yeskej de tepostli niman de bronce,
niman nochipa kipiyas poder para nomanauis.
26 ’Xakaj okse dios ijki nemi ken iDios Jesurúnb,
yejuan kistinemi ipan moxtli ne tlakpak
ipan cielo ikan nochi ipoder
para ueli mechpaleuiya.
27 On Dios yejuan nochipa nemi,
yejua mitsmanauiya,
niman yejua mitspiya ipan imauan.
Yejua mixpan okintotokak motlauelikniuan,
niman mitsijlia xkinmikti.
28 Aman tej,
Dios nochipa kinmejeuas iuejkakoneuan Israel.
Iuejkakoneuan kuajlotika nemiskej.
Ipan imintlal onyas miyek trigo niman vino.
Nochipa kuajli kiauis.
29 ¡Sanoyej nentlatiochijtin nemejuamej israelitas!
Xakaj ijki ken nemejuamej yejuan omechmakixtij toTEKO.
Yejua mechmanauiya niman mechpaleuiya.
Yejua ken sen espada yejuan mechmanauiya.
Nochimej nemotlauelikniuan notlakuantelketsaskej nemixpan,
niman nenkichiuaskej para ma noknelikan.”