Herencia de on ichpochuan Zelofehad
27
Ipan itribu* Manasés nemiyaj makuiltimej ichpokamej iknijtin yejuan imintoka katka Maala,
Noa,
Hogla,
Milca niman Tirsa.
Yejuamej ichpochuan katkaj Zelofehad,
itelpoch Hefer.
(Hefer itelpoch katka Galaad,
niman Galaad itelpoch katka Maquir,
Maquir itelpoch katka Manasés,
niman Manasés itelpoch katka José.)
2 In makuiltimej ichpokamej iknijtin oyajkej ikalakiyan on tabernáculo* kampa nemi Dios.
Ompa okinotsatoj Moisés,
on tiopixki Eleazar,
niman intlayekankauan on israelitas yejuan ompa nemiyaj.
Niman ijkin okinmijlijkej:
3 “Totataj omik ipan on xalpatlajkan,
pero yejua xnosentlaliaya iuan Coré yejuan okichiu on tlen xkuajli ixpan toTEKO.
Totataj yej omik san ipampa yejua itlajtlakol.
Niman xokipix nion sen itelpoch.
4 ¿Tline tikauilis ma poliui itoka totataj,
san pampa xokimpix itelpochuan?
Xtechkauili no ma tikselikan se parte on tlajli kampa kiseliskej on yejuan ken kinta totataj.”
5 Yejua ika,
Moisés okijlij toTEKO on tlen kixpantiliayaj on siuamej niman on tlen kinekiyaj.
6 Niman toTEKO ijkin okinankilij:
7 “Ichpochuan Zelofehad kuajli tlen kijtouaj.
Xkinmaka on tlen kiseliskia imintataj ipan on tlajli nisiu kampa kiseliskej imintiojuan.
Niman iherencia imintataj yeuajmej ma kiselikan.
8 Xkinmijli nochimej on israelitas,
tla yakaj tlakatl miki niman xkipiya nion sen itelpoch,
on tlajli yejuan kipiya panos intech ichpochuan.
9 Niman tla no xkipiya nion se ichpoch,
tla ijkon,
on tlajli kiminmakas ikniuan yejuan tlakamej.
10 Niman tla xkipiya nion se ikniu yejuan tlakatl,
tla ijkon,
kinkauilijteuas itiojuan.
11 Niman tla xkimpiya itiojuan,
tla ijkon,
on tlajli kiseliskej ifamilias yejuan más nisiu ken kiminta.
In yes sen ley para nochimej on israelitas.
On israelitas ma kichiuakan nochi ken yotimitsnauatij.”
Josué kiselia itekiu Moisés
12 ToTEKO okijlij Moisés:
p —Xtlejko ipan on tepetl itoka Abarim niman xkonta on tlajli yejuan nikinmakas on israelitas.
13 Sakin,
ijkuak yotikontak,
timikis ken mokniu Aarón.
14 Ijkon mopan nochiuas pampa nemejuamej nenomemej xonenkitlakamatkej notlanauatil ipan on xalpatlajkan Zin,
ijkuak on israelitas onechixnamikkej.
Nemejuamej xonenkiteititijkej noueyipoder imixpan on israelitas ijkuak otlajtlankej atl.
Yejua in onochiu itech on amejli Meriba yejuan onkaj nisiu Cades ipan on xalpatlajkan Zin.
15 Niman Moisés okijlij toTEKO:
16 —NoTEKO Dios,
tejua yejuan tikmaka nemilistli nochi tlakatl,
xtlapejpeni sen tlakatl yejuan kinyekanas in israelitas.
17 Xtlapejpeni sen tlakatl yejuan kinyekanas nochiuiyan para xkistinemiskej ken borregos yejuan xkipiyaj intlajpixkau.
18 ToTEKO okinankilij Moisés:
—Xnotsa Josué,
ikoneu Nun.
Yejua sen tlakatl yejuan kipiya noEspíritu yejuan okimakak tlamatkilistli para tlayekanas.
Niman xkintlali momauan ipan itsontekon para kalakis ken ueyi tlayekanketl.
19 Niman ma uajla ixpan on tiopixki Eleazar niman inmixpan nochimej on israelitas.
Niman ompa inmixpan on tlakamej,
xmaktili on tekitl de tlayakanalistli.
20 Xmaka seki on tekiuajyotl yejuan tejua tikpiya para ijki nochimej on israelitas kitlakaitaskej niman kitlakamatiskej.
21 Pero Josué noneki yas ixpan on tiopixki Eleazar para itech kiselis notlanauatil,
yejuan nejua nemoTEKO nikmakas itechkopa on Urim.
Kemaj Josué kinmijlis on israelitas nochi tlinon uelis kichiuaskej noso xkichiuaskej.