Uentli yejuan noneki mojmostla
28
Kemaj toTEKO okijlij Moisés:
2 “Xkinnauati on israelitas ma kuajkikan nochipa uentli ipan on tonajli ken nejua yonitlanauatij.
Noneki kuajkiskej uentli yejuan tlatlas niman no on uentli de pan.
In uentli ajuiyak niman nechyolpaktia.
3 No xkinmijli:
On uentli yejuan nochi tlatla yejuan mojmostla nenkiuentlaliskej para nejua nemoTEKO,
yes ome borreguito yejuan se xijkayomej niman xkanaj tlakokoltin ipan intlakayouan.
4 Noneki se nenkiuentlaliskej kualkan,
niman okse tlapoyajkan.
5 Iuan cada borreguito nenkiuentlaliskej ome kilo harina yejuan más kuajli,
niman tlanelojli yes iuan se litro aceite de oliva.
6 In uentli yejuan nochi tlatlas,
nenkiuentlaliskej momostla,
ijkon ken nejua nemoTEKO otlanauatij ne ipan on tepetl Sinaí.
In uentli yes ajuiyak yejuan kipaktis nejua nemoTEKO.
7 Iuan cada se borreguito nouentlalis uentli de se litro vino.
Yejua in vino noneki nenkitotoyauaskej ijtik on tabernáculo* nixpan nekau nemoTEKO.
8 Kemaj ijkuak tlapoyajkan,
nouentlalis on okse borreguito iuan on uentli de harina niman vino,
no ijki ken onouentlalij ijkuak kualkan.
In sen uentli yejuan nochi tlatla niman yejuan ajuiyak para nejua nemoTEKO.
On uentli yejuan noneki cada semana
9 ’Ipan cada chikueyi tonajli ijkuak sábado,
nenkiuentlaliskej ome borreguito yejuan se xijkayomej niman xkanaj tlakokoltin ipan intlakayo.
Niman no nouentlalis naui kilo de harina yejuan más kuajli,
niman tlanelojli yes iuan aceite.
Niman no,
iuan nouentlalis on uentli de vino.
10 In uentli yejuan tlatlas,
nouentlalis cada sábado ijkuak noseuiskej.
Niman iuan on uentli yejuan tlatlas,
nouentlalis on uentli de vino aparte de on yejuan nenkimakaskej mojmostla.
Uentli yejuan noneki cada metstli
11 ’Ipan on achtoj tonajli de cada metstli nenkiuentlaliskej para nejua nemoTEKO sen uentli yejuan tlatlas,
yejuan yes ome becerro,
sen borrego,
niman chikome borreguito yejuan se xijkayomej niman xkanaj tlakokoltin ipan intlakayo.
12 Niman iuan cada becerro nouentlalis chikuasen kilo harina yejuan más kuajli niman tlanelojli iuan aceite.
Niman iuan on borrego nouentlalis naui kilo harina yejuan más kuajli,
niman tlanelojli iuan aceite.
13 Niman iuan cada borreguito nouentlalis ome kilo harina yejuan más kuajli niman tlanelojli iuan aceite.
Nochi in yes sen uentli yejuan nochi tlatlas,
yejuan ajuiyak yes para nejua nemoTEKO.
14 On uentli de vino yejuan iuan nouentlalia,
yes ome litro para cada becerro,
se litro uan tlajko para on borrego,
niman se litro para cada borreguito.
In yejua nochiuas on uentli yejuan tlatlas,
yejuan nouentlalis cada metstli ipan nochi xipan.
15 No ijki,
ipan on tonajli,
nenkiuentlaliskej sen chivo para sen uentli ipampa tlajtlakojli.
Nouentlalis on chivo aparte de on uentli yejuan tlatlas yejuan nouentlalis mojmostla iuan on uentli de harina niman de vino.
Uentli para on iluitl Pascua
16 ’Ipan on tonajli majtlaktli uan naui de on achtoj metstli,
noneki nenkichiuaskej on iluitl Pascua para nennechmauistiliskej,
nejua nemoTEKO.
17 Niman uajmostla,
nempeuaskej okse iluitl de chikome tonajli,
niman xnenkuaskej nion se pan yejuan kipiya tlaxokolilistli*.
18 Ipan on achtoj tonajli de on chikome,
nemosentlaliskej ikan miyek paktli para nennechmauistiliskej nejua nemoTEKO.
Niman ipan on tonajli maka yakaj kichiuas itlaj tekitl.
19 Niman para uentli yejuan tlatlas,
nennechmakaskej nejua nemoTEKO,
ome becerro,
sen borrego,
niman chikome borreguito yejuan se xijkayomej niman xkanaj tlakokoltin ipan intlakayo.
20 Niman iuan in uentli nennechmakaskej nemoTEKO,
uentli de harina tlanelojli yes iuan aceite.
Xmakakan chikuasen kilo harina para cada becerro,
naui kilo para on borrego,
21 niman ome kilo para cada borreguito.
22 No ijki,
nouentlalis sen chivo para sen uentli ipampa nemotlajtlakoluan.
23 Nochi in nenkiuentlaliliskej nejua nemoTEKO aparte de on uentli yejuan tlatlas yejuan nennechmakaskej mojmostla kualkan.
24 Ijkin nenkichiuaskej mojmostla ipan on chikome tonajli de on iluitl.
In yejua yes uentli yejuan tlatlas para nennechtlakaitaskej nejua nemoTEKO niman ajuiyak yes nixpan,
yejua toTEKO.
Nochi in noneki nennechmakaskej aparte de on uentli tlatlak niman on uentli de vino yejuan nenkimakaj mojmostla.
25 Niman kampa ika chikome tonajli,
no nemosentlaliskej ikan miyek paktli para nennechmauistiliskej nejua nemoTEKO.
Ipan on tonajli xitlaj* tekitl nenkichiuaskej.
Uentli de on achtoj pixkalistli
26 ’Ipan on achtoj tonajli de on iluitl de Pixkalistli yejuan no itoka iluitl de Semanas,
nenkuajkiskej achijtsin on trigo noso cebada yenkuik yejuan achtoj nenkipixkaskej de nemotlatok.
Ipan on tonajli no nemosentlaliskej ikan miyek paktli para nennechmauistiliskej nejua nemoTEKO,
niman xitlaj* tekitl nenkichiuaskej.
27 Niman nennechmakaskej nejua nemoTEKO,
uentli yejuan tlatlas yejuan ajuiyak,
niman on uentli yes:
ome becerro,
sen borrego,
niman chikome borreguito yejuan se xijkayomej.
28 Niman iuan nennechmakaskej uentli de harina tlanelojli iuan aceite.
Chikuasen kilo yes harina para cada becerro,
niman naui kilo para on borrego,
29 niman ome kilo para cada borreguito.
30 No ijki,
nennechmakaskej nejua nemoTEKO sen chivo para sen uentli ipampa nemotlajtlakoluan.
31 Iuan in uentli yejuan tlatlas,
nennechmakaskej nejua nemoTEKO on uentli de trigo noso cebada niman vino.
Nochi in noneki nennechmakaskej,
aparte de on uentli yejuan tlatlas yejuan nennechmakaskej mojmostla.
On yolkej yejuan nennechmakaskej,
noneki xkanaj tlakokoltin yeskej ipan intlalnakayo.