On iluitl de tlapitsaltin
29
“Cada xipan ipan on achtoj tonajli de on ika chikome metstli yejuan nochiua ipan in amatonal israelitas,
nemosentlaliskej ikan miyek paktli para nennechmauistiliskej nejua nemoTEKO,
niman xitlaj* tekitl nenkichiuaskej ipan on tonajli.
On tonajli nenkimpitsaskej tlapitsaltin para temachistiskej ika iluitl.
2 Niman ipan on tonajli nennechmakaskej nejua nemoTEKO uentli yejuan tlatlas,
yejuan ajuiyak para yejua.
Nennechmakaskej sen becerro,
sen borrego,
niman chikome borreguito yejuan se xijkayomej niman xkanaj tlakokoltin ipan intlakayo.
3 Niman iuan on uentli de yolkej no nennechmakaskej uentli de harina tlanelojli iuan aceite.
On harina yes chikuasen kilo para on becerro,
naui kilo para on borrego,
4 niman ome kilo para cada borreguito.
5 No nennechmakaskej sen chivo para sen uentli ipampa nemotlajtlakoluan.
6 Nochi in uentli nennechmakaskej nehua nemoTEKO,
aparte de on uentli yejuan tlatlaskej,
yejuan nennechmakaskej mojmostla niman cada metstli.
San sekan nennechmakaskej iuan on uentli de trigo noso cebada niman on uentli de vino.
In yejua yes uentli yejuan tlatlas para itlakaitalis niman ajuiyak yes para nejua nemoTEKO.
Uentli para on tonajli ijkuak kitlapojpoluiyaj tlajtlakojli
7 ’Ipan majtlaktli tonajli sano ipan on chikome metstli,
oksejpa nemosentlaliskej ikan miyek paktli para nenechmauistiliskej nejua nemoTEKO.
Nemosauaskej niman xitlaj* tekitl nenkichiuaskej.
8 Niman ipan on tonajli nennechmakaskej sen uentli yejuan tlatlas niman ajuiyak yes para nejua nemoTEKO.
Nennechmakaskej sen becerro,
sen borrego,
niman chikome borreguito yejuan se xijkayomej,
niman yejuan xkanaj tlakokoltin ipan intlakayo.
9 Niman iuan on becerro,
on borrego niman borreguitos,
nennechmakaskej sen uentli de harina yejuan más kuajli niman tlanelojli iuan aceite.
On harina chikuasen kilo yes para on becerro,
naui kilo para on borrego,
10 niman ome kilo para cada borreguito.
11 No ijki,
nennechmakaskej sen chivo para on uentli ipampa tlajtlakojli,
aparte de on uentli yejuan tlatlas yejuan nennechmakaskej ipan on Tonajli de Tlapojpoluilistli,
para mechchipauas,
niman aparte de on uentli yejuan tlatlas yejuan nennechmakaskej mojmostla iuan on uentli de trigo noso cebada niman on uentli de vino.
Uentli para on iluitl de kalmatsitsimej
12 ’Ipan on tonajli 15 de on chikome metstli,
oksejpa nemosentlaliskej ikan miyek paktli para nennechmauistiliskej nemoTEKO.
On tonajli xitlaj* tekitl nenkichiuaskej.
Chikome tonajli nenkichiuaskej iluitl para notlakaitalis nejua nemoTEKO.
13 Ipan on achtoj tonajli,
nennechmakaskej sen uentli yejuan tlatlas,
yejuan ajuiyak yes para nejua nemoTEKO.
On uentli yes majtlaktli uan yeyi becerro,
ome borrego,
niman majtlaktli uan naui borreguito yejuan se xijkayomej niman xkanaj tlakokoltin ipan intlalnakayo.
14 Niman iuan on becerros,
borregos niman borreguitos,
nenkimakaskej on uentli de harina yejuan más kuajli niman tlanelojli iuan aceite.
On harina chikuasen kilo yes para cada becerro,
naui kilo para cada borrego,
15 niman ome kilo para cada borreguito.
16 No ijki,
ipan on tonajli nennechmakaskej sen chivo para on uentli ipampa tlajtlakojli,
aparte de on uentli yejuan tlatlas,
yejuan nennechmakaskej mojmostla,
san sekan iuan on uentli de trigo noso cebada niman on uentli de vino.
17 ’Kampa ika ome tonajli de on iluitl,
nennechmakaskej majtlaktli uan se becerro,
ome borrego,
niman majtlaktli uan naui borreguito yejuan se xijkayomej niman xkanaj tlakokoltin ipan intlakayo.
18 Niman iuan on becerros,
borregos niman borreguitos,
nennechmakaskej uentli de trigo noso cebada,
niman uentli de vino.
Nennechmakaskej ichkich kech noneki iuan on becerros,
on borregos niman on borreguitos ken nejua nemoDios yomechnauatij.
19 No ijki,
ipan on tonajli nennechmakaskej sen chivo para on uentli ipampa tlajtlakojli,
aparte de on uentli yejuan tlatlas,
yejuan nennechmakaskej mojmostla,
san sekan iuan on uentli de trigo noso cebada niman on uentli de vino.
20 ’Kampa ika yeyi tonajli ipan on iluitl,
nennechmakaskej majtlaktli uan se becerro,
ome borrego,
niman majtlaktli uan naui borreguito yejuan se xijkayomej niman xkanaj tlakokoltin ipan intlakayo.
21 Niman iuan on becerros,
borregos niman borreguitos,
nennechmakaskej uentli de trigo noso cebada niman de vino.
Nennechmakaskej ichkich kech noneki iuan on becerros,
on borregos niman on borreguitos ken toDios yomechnauatij.
22 No ijki,
ipan on tonajli nennechmakaskej sen chivo para on uentli ipampa tlajtlakojli aparte de on uentli yejuan tlatlas,
yejuan nennechmakaskej mojmostla san sekan iuan on uentli de trigo noso cebada niman on uentli de vino.
23 ’Kampa ika naui tonajli de on iluitl,
nennechmakaskej majtlaktli becerros,
ome borregos niman majtlaktli uan naui borreguitos yejuan se xijkayomej niman xkanaj tlakokoltin ipan intlakayo.
24 Niman iuan on becerros,
borregos niman borreguitos,
nennechmakaskej uentli de trigo noso cebada niman on uentli de vino.
Nennechmakaskej ichkich kech noneki iuan on becerros,
on borregos niman on borreguitos ken nejua nemoDios yonemechnauatij.
25 No ijki,
ipan on tonajli,
nennechmakaskej sen chivo para on uentli ipampa tlajtlakojli aparte de on uentli yejuan tlatlas,
yejuan nennechmakaskej mojmostla san sekan iuan on uentli de trigo,
noso cebada niman on uentli de vino.
26 ’Kampa ika makuijli tonajli de on iluitl,
nennechmakaskej chiknaui becerro,
ome borrego,
niman majtlaktli uan naui borreguito yejuan se xijkayomej niman xkanaj tlakokoltin ipan intlakayo.
27 Niman iuan on becerros,
borregos niman borreguitos,
nennechmakaskej on uentli de trigo noso cebada niman on uentli de vino,
ken nejau nemoDios yonemechnauatij.
28 No ijki,
ipan on tonajli nennechmakaskej sen chivo para on uentli ipampa tlajtlakojli,
aparte de on uentli yejuan tlatlas,
yejuan nennechmakaskej mojmostla san sekan iuan on uentli de trigo noso cebada niman on uentli de vino.
29 ’Kampa ika chikuasen tonajli de on iluitl,
nennechmakasej chikueyi becerro,
ome borrego niman majtlaktli uan naui borreguito yejuan se xijkayomej niman xkanaj tlakokoltin ipan intlakayo.
30 Niman iuan on becerros,
borregos niman borreguitos,
nennechmakaskej uentli de trigo noso cebada niman on uentli de vino.
Nennechmakaskej ichkich kech noneki iuan on becerros,
iuan borregos,
niman on borreguitos ken nejua nemoDios yonemechnauatij.
31 No ijki,
ipan on tonajli,
nennechmakaskej sen chivo para on uentli ipampa tlajtlakojli,
aparte de on uentli yejuan tlatlas,
yejuan nennechmakaskej mojmostla san sekan iuan on uentli de trigo noso cebada niman on uentli de vino.
32 ’Kampa ika chikome tonajli de on iluitl,
nennechmakaskej chikome becerro,
ome borrego niman majtlaktli uan naui borreguito yejuan se xijkayomej niman xkanaj tlakokoltin ipan intlakayo.
33 Niman iuan on becerros,
borregos niman borreguitos,
nennechmakaskej uentli de trigo noso cebada niman on uentli de vino.
Nennechmakaskej ichkich kech noneki iuan on becerros,
iuan borregos,
niman on borreguitos ken nejua nemoDios yomechnauati.
34 No ijki,
ipan on tonajli,
nennechmakaskej sen chivo para on uentli ipampa tlajtlakojli,
aparte de on uentli yejuan tlatlas,
yejuan nennechmakaskej mojmostla san sekan iuan on uentli de trigo noso cebada niman on uentli de vino.
35 ’Kampa ika chikueyi tonajli de on iluitl,
nemosentlaliskej ikan miyek paktli para nennechmauistiliskej,
niman ipan on tonajli xitlaj* tekitl nenkichiuaskej.
36 Ipan on tonajli nennechmakaskej sen uentli yejuan tlatlas yejuan ajuiyak yes para nejua nemoTEKO.
Niman on uentli yes sen becerro,
sen borrego,
niman chikome borreguito yejuan se xijkayomej niman xkanaj tlakokoltin ipan intlalnakayo.
37 Niman iuan on becerro,
borrego niman borreguitos,
nennechmakaskej on uentli de trigo noso cebada niman on uentli de vino.
Nennechmakaskej ichkich kech noneki iuan on becerro,
on borrego niman on borreguitos ken nejua nemoDios yonemechnauatij.
38 No ijki,
ipan on tonajli,
nennechmakaskej sen chivo para on uentli ipampa tlajtlakojli,
aparte de on uentli yejuan tlatlas,
yejuan nennechmakaskej mojmostla san sekan iuan on uentli de trigo noso cebada niman on uentli de vino.
39 ’In yejua uentli yejuan nenechmakaskej nejua nemoTEKO,
ipan on tonaltin yejuan yoniktlalij.
Nennechmakaskej in uentli aparte de okseki uentli yejuan onennechprometerouilijkej yejuan ikatlakajtli noso yejuan nenkitlaliaj ipan nemoyojlo para nennechmakaskej,
tla on uentli yejuan tlatlas,
noso uentli de trigo noso cebada niman de vino,
noso uentli de yoltlalilistli.”
40 Ijkon tej,
Moisés okinmijlij on israelitas nochi in tlanauatiltin yejuan toTEKO okimakak.