Ijkin kichiuas yakaj yejuan kichiua sen promesa itech Dios
30
Moisés okinnots nochimej on tlayekankej de cada tribu* intech on israelitas,
niman ijkin okinmijlij:
“ToTEKO ijkin tlanauatia:
2 Tla yakaj itlaj kiprometerouilia toTEKO,
noso kichiua sen tlajtolmakalistli yejua itech ika kichiuas noso xkichiuas itlaj,
ika onkaj kichiuas nochi ken yokijtoj.
3 ’Ijkuak sen ichpochtli yejuan sanken* nemi itech itataj,
itlaj kiprometerouilia toTEKO,
noso nokalaktia itlaj kichiuas,
4 niman tla itataj kimatis ika itlaj okiprometeroj,
noso itlaj ika onokalaktij kichiuas niman itataj xkikaualtia,
tla ijkon,
on ichpochtli noneki kichiuas nochi on tlen yokijtoj.
5 Pero tla ijkuak itataj kimatis,
xkauilis ma kichiua on tlen yokijtoj,
tla ijkon,
maka kichiuas pampa itataj xkauilia.
Niman toTEKO kitlapojpoluilis on tlen okijtoj pampa itataj xkauilia ma kichiua.
6 ’Niman tla sen ichpochtli itlaj okiprometerouilij toTEKO,
noso okichiu sen tlajtolmakalistli itech Dios,
maski xachtoj kuajli kinemiliaya,
niman kemaj xuejkajtika nonamiktia,
7 niman iueuentsin* kimatis pero xitlaj* kijlis,
tla ijkon,
on ichpochtli ika onkaj kichiuas on tlen yokijtoj.
8 Pero tla iueuentsin* kimatis niman xkaualis ma kichiua,
tla ijkon,
maka kichiuas pampa iueuentsin* xkauilia kichiuas on tlen yokijtoj.
Tla ijkon nochiuas,
toTEKO kitlapojpoluilis on tlen yokijtojka.
9 ’Pero tla sen siuatl yejuan yokaualtik noso okikau iueuentsin* itlaj kiprometerouilia Dios,
ika onkaj kichiuas ken yokijtoj.
10 ’Ijkuak sen siuatl yejuan yononamiktij,
itlaj kiprometerouilia toTEKO,
noso kichiuas sen tlajtolmakalilistli ika itokatsin Dios,
11 niman iueuentsin* kimatis on tlen isiuau okichiu,
niman xkikaualtia,
tla ijkon,
ika onkaj kichiuas on tlen yokijtoj.
12 Pero tla iueuentsin* kimatis niman xkauilis ma kichiua,
tla ijkon,
xkichiuas on tlen yokiprometerouilijka Dios,
pampa iueuentsin* xkauilia.
Niman toTEKO kitlapojpoluilis on tlen yokijtojka.
13 ’Sen teueuentsin uelis kauilis,
noso xkauilis isiuau ma kichiua on tlen okiprometerouilijka Dios,
noso okichijka sen tlajtolmakalilistli ika itokatsin Dios ika nosauas.
14 Tla panoua se tonajli noso ome,
niman on teueuentsin xitlaj* kijlia,
tla ijkon,
kijtosneki ika kauilia ma kichiua nochi on tlen okiprometeroj,
niman on siuatl noneki kichiuas nochi on tlen okiprometerouilij Dios.
15 Pero tla on tlakatl kipanoltis keski tonajli niman sakin* kijtos ika xkauilia ma kichiua,
tla ijkon,
yejua kipiyas tlajtlakojli tla on siuatl xok okichiu on tlen okijtojka kichiuas.”
16 In yejua tlanauatiltin yejuan toTEKO okimakak Moisés para kenijki nouikas sen tlakatl iuan isiuau,
niman sen tajtli iuan ichpoch ijkuak on ichpoch sanken* nemi itech.