On iluimej niman on tonajli para noseuiskej
23
ToTEKO okijlij Moisés:
2 “Ijkin xkinmijli on israelitas:
In yejua on tonaltin yejuan noneki nenkauaskej san para nejua nemoTEKO para nenkichiuaskej iluimej,
niman ipan on tonaltin nemosentlaliskej san sekan ikan miyek paktli para nennechmauistiliskej.
In yejua on tonaltin:
3 Chikuasen tonajli nentekitiskej,
pero ipan on ika chikome tonajli,
xnenkichiuaskej itlaj tekitl.
On tonajli yes san para nemosentlaliskej ikan miyek paktli para nennechmauistiliskej.
San kanon kampa nenchantiskej on tonajli yes de neseuijli para nennechtlakaitaskej,
nejua nemoTEKO.
4 In yejua on tonaltin yejuan noneki nenkauaskej para nenkichiuaskej iluimej kampa nemosentlaliskej ikan miyek paktli para nennechmauistiliskej.
Ijkon tej,
nennechtlakaitaskej,
nejua nemoTEKO.
On iluitl de Pascua
5 ’On iluitl Pascua nenkichiuaskej ijkuak tlapoyajkan ipan on 14 tonajli de on achtoj metstli de on tonalamatl Hebreo para nennechtlakaitaskej,
nejua nemoTEKO.
6 ’Ipan on tonajli 15 de on metstli,
nempeuaskej nenkichiuaskej on iluitl de on pan yejuan xkipiya tlaxokolilistli* para nennechtlakaitaskej nejua nemoTEKO.
Chikome tonajli nenkikuaskej pan yejuan xkipiya tlaxokolilistli*.
7 Ipan on achtoj tonajli de on iluitl nemejuamej nemosentlaliskej ikan miyek paktli para nennechmauistiliskej niman ipan on tonajli xnenkichiuaskej nion sen tekitl.
8 Nochi on chikome tonajli nennechmakaskej uentli yejuan nochi tlatla para nejua nemoTEKO.
Niman kampa ika chikome tonajli,
oksejpa nemosentlaliskej ikan miyek paktli para nennechmauistiliskej,
niman ipan on tonajli xnenkichiuaskej nion sen tekitl.”
On iluitl de on achtoj pixkilistli
9 ToTEKO okijlij Moisés:
10 “Xkinmijli on israelitas in tlanauatiltin:
Ijkuak yonemajsikej ipan on tlajli yejuan nemechmakas niman nenkipixkaskej nemotrigo,
noneki nenkiktiskej itech on tiopixki on achtoj tlasalojli de trigo yejuan nenkitekiskej.
11 Uajmostla ijkuak yopanok on tonajli de neseuijli,
on tiopixki nechixpantilis on tlasalojli de trigo,
niman koolinis yolik nixpan nejua nemoTEKO,
para nejua nemechselilis.
12 Niman sano ipan on tonajli ijkuak nennechmakaskej on tlasalojli de trigo,
no nennechmakaskej sen borrego yejuan se xijkayotl niman xkanaj tlakokojli* ipan itlakayo ken sen uentli yejuan nochi tlatla para nejua nemoTEKO.
13 Niman no nenkuajkiskej naui kilo uan tlajko harina yejuan más kuajli niman yejuan tlanelojli iuan aceite,
para nennechmakaskej nejua nemoTEKO ken sen uentli yejuan nochi tlatla niman yejuan ijnekuistis ajuiyak.
No ijki,
noneki nennechmakaskej se litro vino para sen uentli yejuan nenkitekaskej nixpan.
14 Xuelis nenkikuaskej pan nion trigo yejuan tliuaki,
nion yejuan xoxojki,
hasta ijkuak yonennechajkuilijkej on uentli,
nejua nemoTEKO.
In sen ley yejuan nochipa onyas para nochimej on tatajtin niman iminuejkakoneuan.
Nenkitlakamatiskej san kanon nennemiskej.
On iluitl itoka Pentecostés*
15 ’Tla yopanok on sábado ijkuak onenkuajkikej on tlasalojli de trigo ken uentli yejuan tlaoolinijli,
uajmostla peuas nenkipouaskej chikome semana.
16 Noso uelis nenkipouaskej 50 tonajli noso chikome sábados.
Ijkuakon kuajkiskej okse uentli de trigo yejuan yenkuik para nejua nemoTEKO.
17 Nenkuajkiskej ome pan desde kampa nenchantij para sen uentli yejuan kooliniskej nixpan nejua nemoTEKO.
On pan nenkichijchiuaskej ika naui kilo harina yejuan más kuajli niman kipiyas tlaxokolilistli*.
In yejua nochiuas sen uentli de on achtoj pixkilistli para nennechmakaskej nejua nemoTEKO.
18 Niman san sekan iuan on pan,
no nenkuajuikaskej chikome borreguitos se xijkayomej niman yejuan xkanaj tlakokoltin ipan intlakayo,
sen becerro niman ome borrego para uentli yejuan nochi tlatla para nejua nemoTEKO.
On uentli yejuan nochi tlatla,
niman on uentli de harina,
niman on uentli de vino,
nochiuas sen uentli yejuan sanoyej ajuiyak,
niman nejua nechyolpaktis.
19 No nennechmakaskej sen chivo para sen uentli yejuan notemaka ipampa on tlajtlakojli,
niman ome borreguito yejuan se xijkayomej ken uentli para yoltlalilistli.
20 On tiopixki kinuentlalis on ome borreguito para sen uentli yejuan kooliniaj nixpan,
nejua nemoTEKO san sekan iuan on pan de on achtoj pixkilistli.
In uentli nechuentlaliliskej nejua nemoTEKO,
niman kemaj nenkimakaskej on tiopixki.
21 ’Sano ipan on tonajli nemosentlaliskej ikan miyek paktli para nennechmauistiliskej.
Xuelis nenkichiuaskej nion se tekitl ipan on tonajli.
In sen ley yejuan nochipa onyas para nochimej on tatajtin niman iminuejkakoneuan.
Nenkitlakamatiskej san kanon nennemiskej.
22 ’Ijkuak nempixkaskej ipan nemotlal,
maka nenkipixkaskej hasta tlajtlatenko,
nion maka nenkipejpenaskej yejuan tepejtok ipan tlajli.
On xkauakan para ma kipejpenakan yejuan mayankej niman yejuan xchanejkej.
Nejua nemoTEKO niman nemoDios.”
On iluitl ijkuak kimpitsaj tlapitsaltin
23 ToTEKO okijlij Moisés:
24 “Ijkin xkinmijli on israelitas:
On achtoj tonajli ipan on chikome metstli,
nenkelnamikiskej ken sen yektonajli ijkuak noseuiloyan.
Niman ipan on tonajli nemosentlaliskej ikan miyek paktli para nennechmauistiliskej ijkuak kimpitsaskej on tlapitsaltin para kinnotsaskej ipan on iluitl.
25 Ipan on tonajli xitlaj* tekitl nenkichiuaskej,
niman nenechmakaskej nejua nemoTEKO sen uentli yejuan nochi tlatla.”
On tonajli ijkuak notlapojpoluiya tlajtlakojli
26 No ijki,
toTEKO okijlij Moisés:
27 “Ipan on majtlaktli tonajli de on chikome metstli,
onyas on Tetlapojpoluiltonajli.
Ipan in tonajli nemosentlaliskej ikan miyek paktli para nennechmauistiliskej,
nemosauaskej,
niman nemokneliskej ipampa nemotlajtlakoluan.
Niman nennechmakaskej sen uentli yejuan tlatlas ipan tlitl nixpan nejua nemoTEKO.
28 Ipan on tonajli xnenkichiuaskej nion sen tekitl,
pampa on yes Tetlapojpoluiltonajli ijkuak nenkiseliskej tlapojpoluijli nixpan nejua nemoTEKO Dios.
29 San akinon yejuan xnosauas ipan on tonajli,
ika onkaj kixtiskej intech on israelitas.
30 Niman san akinon yejuan kichiuas itlaj tekitl ipan on tonajli,
nejua nikpopolos intsajlan on israelitas.
31 ’Maka xchiuakan nion sen tekitl.
In sen ley yejuan nochipa onyas para nochimej on tatajtin niman iminuejkakoneuan.
Nenkitlamatiskej san kanon nennemiskej.
32 In yejua nochiuas sen tonajli ijkuak noseuiloyan,
niman nemosauaskej niman nemokneliskej nixpan ipampa nemotlajtlakoluan.
In Tetlapojpoluiltonajli peuas tlapoyajkan ipan on chiknaui tonajli de on metstli niman tlamis hasta uajmostla tlapoyajkan.”
On iluitl ijkuak kinchijchiuaskej kalmatsitsimej
33 ToTEKO okijlij Moisés:
34 “Ijkin xkinmijli on israelitas:
Ipan on kaxtojli* tonajli de on ika chikome metstli,
chikome tonajli nenkichiuaskej iluitl de on kalmatsitsimej para nejua nemoTEKO.
35 Ipan on achtoj tonajli de on chikome tonajli,
nemosentlaliskej ikan miyek paktli para nennechmauistiliskej.
Maka nenkichiuaskej nion sen tekitl ipan on tonajli.
36 Nochi on chikome tonajli,
nennechmakaskej sen uentli yejuan tlatlas para nennechtlakaitaskej nejua nemoTEKO.
Niman no ipan on chikueyi tonajli nemosentlaliskej ikan miyek paktli para nennechmauistiliskej,
nejua nemoTEKO.
Ipan in tonajli de iluitl maka nenkichiuaskej nion sen tekitl.
37 ’In yejua on tonaltin uejueyixtokej ijkuak nemosentlaliskej ikan miyek paktli para nennechmauistiliskej.
Ipan in tonaltin nennechmakaskej miyek uentli para nejua nemoTEKO.
Nennechmakaskej uentli de yolkej yejuan tlatlaskej,
niman uentli de trigo niman cebada,
niman okseki uentli,
niman uentli de vino.
Cada se uentli nennechmakaskej ipan on tonajli ijkuak kitocaroua.
38 Nochi in miyek uentli nochiuaskej aparte de on okseki uentli yejuan nennechmakaskej nejua nemoTEKO cada sábado.
Niman no nenkuajkiskej aparte on okseki uentli yejuan nennechmakaskej ken tetlayokolijli*,
noso yejuan onenkiprometerojkej nixpan ika nennechmakaskej,
noso san katlejua yejuan san nenkixtiaj ipan nemoyojlo para nennechmakaskej.
39 ’Ipan on kaxtojli* tonajli de on ika chikome metstli,
ijkuak nemejuamej yonempixkakej,
neniluichiuaskej chikome tonajli para nejua nemoTEKO.
Niman nemoseuiskej ipan on achtoj tonajli,
niman ipan on chikueyi tonajli.
40 Ipan on achtoj tonajli,
nenkitekiskej itlakyo on kojtlakijlomej yejuan más kuajkualtin,
inmasoyayo palmeras,
niman kuamatli de on kojtin* yejuan kipiyaj ixojyo,
niman kuamatli de auexotl yejuan noskaltia itenko atl.
Niman ipan in chikomej tonaltin nenkiktiskej ipan nemomauan ikan miyek pakilistli nixpan nejua nemoTEKO Dios.
41 Cada xipan nenkichiuaskej in iluitl chikome tonajli ipan on ika chikome metstli para nejua.
In sen ley yejuan nochipa onyas para nochimej on tatajtin niman iminuejkakoneuan.
42 Nochi on chikome tonajli nemochimej* nemejuamej yejuan nenisraelitas nenchantiskej ipan on kalmatsitsimej,
43 para ijki nochimej nemouejkakoneuan ma kimatikan ika ijkuak nejua onikinkixtij nemouejkatajuan ipan on país Egipto,
onikinchantij ipan kalmatsitsimej.
Nejua nemoTEKO Dios nikijtoua.”
44 Moisés ijkin okinmijlij on israelitas de on tonaltin para iluimej yejuan ika kitlaluichiuiliskej toTEKO.