On aceite para on tlauiltin ipan on tabernáculo
24
ToTEKO okijlij Moisés:
2 “Xkinnauati on israelitas ma mitsajkuilikan aceite de oliva yejuan chipauak niman más kuajli para on tlauiltin nochipa ma tlikuitiakan ipan on tabernáculo.
3 Aarón kalakis ipan on tabernáculo* kampa nejua ninemi ne ikuitlapan on yekcortina kampa onkaj on yekcaja.
Ne Tlayekkan ixpan on yekcortina,
itech on lámpara,
Aarón ompa tekitis.
Ompa kintlatlajtlalilis on tlauiltsitsimej de on lámpara para ijkon tlikuitiaskej nochi tlayoua nixpan nejua nemoTEKO.
In sen ley yejuan nochipa onyas para nochimej on tatajtin niman iminuejkakoneuan.
4 Kintlatlajtlalilis on tlauiltsitsimej de on lámpara yejuan nochi de oro para nochipa tlikuitiaskej nixpan nejua nemoTEKO.
On pan yejuan kiteititia ika toTEKO nemi touan
5 ’Xkuikan on harina yejuan más kuajli niman xkikxitikan majtlaktli uan ome pan yejuan cada se yetik yes naui kilo.
6 Niman kemaj xkintlalikan ipan on mesa yejuan nochi de oro.
Xkintlalikan nixpan nejua nemoTEKO,
ipan ome tlatekpantli de chichikuasen pan ipan cada tlatekpantli.
7 Xtlalikan ipan cada tlatekpantli de on pan,
achitsin kopajli yejuan sanoyej kuajli.
In kopajli nochiuas sen uentli yejuan tlatlas ipan on tlaixpan* para ika nennechelnamikiskej,
niman ika nennechtlakaitaskej nejua nemoTEKO.
8 In pan noneki nenkitlaliskej nixpan nejua nemoTEKO ipan cada sábado ken sen pacto* yejuan xkaman poliuis,
yejuan on israelitas nochimej nouan kichiuaj.
9 On pan inyaxka yes Aarón niman iuejkakoneuan para intlakual yejuan kuaskej.
Yejuamej kikuaskej kampa tlayekkan,
pampa in sen uentli yejuan más tlatiochijtli de nochi uentli yejuan tlatla niman yejuan nechmakaj para nechtlakaitaj.
Niman nejua nemoTEKO nikinmaka para ma kikuakan on tiopixkej para nochipa.”
Castigo para on yejuan kuijuikaltia Dios
10-11 Intech on israelitas nemiya sen telpochtli yejuan inanaj israelita katka,
niman itataj katka sen Egipcio.
Inanaj itoka katka Selomit,
yejuan ichpoch katka Dibri yejuan kisa itech iuekakoneuan Dan.
In telpochtli niman okse tlakatl israelita onokualanijkej ipan on campamento.
Niman ijkuak nokualaniayaj,
itelpoch on israelita okuijuikaltij toTEKO.
Kemaj on israelitas okuikakej ixpan Moisés.
12 Niman on telpochtli okitsakukej chika okichixkej toTEKO ma kimijli tlinon kichiuaskej iuan.
13 Niman toTEKO okinots Moisés niman okijlij:
14 “Xkixti ipan on campamento on yejuan onechuijuikaltij.
Niman on yejuan okakkej ijkuak onechuijuikaltij,
ma kintlalikan inmauan ipan itsontekon para kiteititiskej ika on telpochtli kipiya tlajtlakojli.
Kemaj nochimej on israelitas ma kitemojmotlakan hasta kaman miki.
15 Niman nochimej on israelitas ijkin xkinmijli:
“Tla yakaj nechuijuikaltia nejua nemoTeko Dios,
ika onkaj mikis.
16 Nochimej on israelitas san sekan kitemojmotlaskej.
In tlanauatijli yes para on israelitas,
niman para san akinon yejuan xchanej.
Tla yakaj nechuijuikaltia,
ika onkaj nenkimiktiskej.
17 ’No ijki,
tla sen tlakatl kimiktis yakaj,
on tlakatl yejuan otemiktij ika onkaj no nenkimiktiskej.
18 ’Akin kimiktis sen yolki yejuan teyaxka,
ika onkaj kitekuepilis.
Se yolki notekuepilis ika okse yolki yejuan sa no ijki.
19 ’Tla yakaj kokos sen ichanejkau,
ika onkaj no sano ijki nenkokoskej.
20 Tla yakaj kipostekilis yakaj iomiyo,
tla ijkon,
no noneki nenkipostekiliskej iomiyo.
Noso tla se kixtoponaltis yakaj,
tla ijkon,
no nenkixtoponaltiskej.
Noso tla yakaj tetlanteyopeuas,
tla ijkon,
no nenkitlanteyopeuaskej.
Ijkon ken se kitechiuilis itlaj xkuajli,
no ijki nenkichiuiliskej.
21 ’Akin kimiktis sen teyolkau,
ika onkaj kitekuepilis.
Pero yejuan kimiktis sen tlakatl,
yejua no xmiktikan.
22 ’In san no yejua sen ley yes para nochimej on israelitas niman yejuan xchanejkej.
Nejua nemoTEKO Dios nikijtoua.”
23 Ijkuak Moisés ijkon yokiminnots on israelitas,
yejuamej okixtijkej ipan on campamento on telpochtli yejuan okuijuikaltij Dios,
niman ompa okitemojmotlakej hasta kaman omik.
Ijkon tej,
on israelitas okichijkej nochi ken toTEKO okinauatij Moisés.