On xipan ijkuak noseuis on tlajli
25
Ijkuak Moisés sanken* nemiya ipan on tepetl Sinaí,
toTEKO okijlij:
2 “Ijkin xkinmijli on israelitas:
Ijkuak nemejuamej nemajsiskej ipan on tlajli yejuan nemechmakas,
on tlajli noneki noseuis se xipan cada chikome xipan.
Niman ijkon nennechititiskej ika on tlajli noyaxka* nejua,
nemoTEKO.
3 Chikuasen xipan uelis nentlatôkaskej ipan nemotlal,
niman nenkinmaxiniskej nemouvasyoj,
niman nenkitekiskej itlakyo.
4 Pero ijkuak ajsis on ika chikome xipan,
on tlajli noseuis se xipan para nejua nemoTEKO,
niman ijkon nenkiteititiskej ika nennechtlakaitaj.
Maka xtôkakan itlaj xinachtli ipan on xipan,
nion maka xmaxinikan on uvasyoj.
5 Niman no maka nenkitekiskej on trigo yejuan ixuas san iselti ipan nemotlal yejuan tlakis sakin*,
ijkuak yonenkipixkakaj ipan on sa ika nochi xipan.
Nion maka nenkitekiskej itlakyo on uvasyoj yejuan xonenkimaxinijkej.
Maka ijkon nenkichiuaskej pampa ipan on xipan,
on tlajli noneki kuajli noseuis.
6 On tlen ixuas iselti ipan nemotlal de on xipan ijkuak on tlajli noseuiya mechajxilis para nentlakuaskej nemejuamej,
niman nemoesclavos,
niman on tekitkej,
niman on xchanejkej yejuan chantij nemouan,
7 niman nemoyolkauan,
niman on tepeyolkej yejuan nemij ipan on tlajli.
Nochi tlen kitlakitis on tlajli para nemotlakual yes.
8 ’Noneki nenkipouaskej 49 xipan,
9 niman ipan on majtlaktli tonajli de on chikome metstli,
nochiuiyan ipan on tlajli de Israel kimpitsaskej kuakuautlapitsaltin ipan on Tetlapojpoluiltonajli.
10 Ipan on 50 xipan nochiuas tlatiochijtli.
Ipan on xipan noneki nochimej kinmakaskej tlamakaualistli para nochimej yejuan chantij ipan on país.
On xipan nochiuas sen xipan ijkuak nochimej yejuan esclavos nokauaskej tlamakaualtin.
Nochimej on tlakamej yejuan okinamakakaj imintlal,
on tlajli oksejpa inyaxka yes,
noso inyaxka yes iminfamilia.
11 Ipan on xipan 50 nochiuas para nemejuamej sen xipan de tlamakaualistli.
Ipan on xipan maka nentlatokaskej,
nion maka nenkipixkaskej itlakyo on tlen oixuak iselti,
nion itlakyo on uvasyoj yejuan xonenkimaxinijkej,
12 pampa on xipan yektli yes,
niman de tlamakaualistli para nemejuamej.
Ipan on xipan nenkuaskej itlakyo on tlen san iselti ixuas ipan on tlajli.
13 ’Ipan on xipan de tlamakaualistli,
nemochimej* nemejuamej oksejpa nenkimoyaxkatiskej nemotlaluan yejuan onenkinamakakaj.
14 Tla yakaj nenkouiliaj noso nenkinamakiltiaj sen tlajli,
maka itlaj ika nenkajkayauaskej.
15 Yejuan kouas itlaj tlajli,
san kitlaxtlauas on keski xipan poliui ika ajsis on xipan de tlamakaualistli.
Niman yejuan kinamakas ijtla tlajli,
noneki kitlaxtlauiliskej sa yejua on keski xipan poliui para ajsis on xipan de tlamakaualistli.
16 Tla poliui miyek xipan para ajsis on xipan de tlamakaualistli,
tla ijkon,
más patioj nenkinamakaskej on tlajli.
Pero tla sa keski xipan poliui para nemotlal oksejpa nochiuas nemoyaxka*,
xok patioj nenkinamakaskej.
In kijtosneki on tlajli nonamaka noso nokoua san on keski xipan poliui nopixkas on tlajli chika ajsi on xipan de tlamakaualistli.
17 ’Maka yakaj ika xmauiltikan,
yej xnechtlakaitakan nejua nemoDios,
pampa nejua ninemoTEKO Dios.
18 Xkintlakamatikan noleyes niman notlanauatiluan.
Tla nenkintlakamatij kuajli,
nennemiskej xikan nemojtijli ipan nemopaís,
19 niman on tlajli sanoyej kuajli tlatlakitis,
niman nenkikuaskej itlakyo hasta nemixuiskej kuajli,
niman nennemiskej xikan nemojtijli ipan nemopaís.
20 ’Pero uelis nemotlajtoltiskej ijkin:
Ipan on ika chikomej xipan,
¿tlinon tikuaskej tla xok uelis titokaskej,
nion tipixkaskej?
21 Nejua niktitlanis miyek notlatiochiualis ipan on ika chikuasen xipan,
yejua ika,
on yejuan nenkipixkaskej ipan on xipan,
mechajxilis nenkikuaskej hasta okse yeyi xipan.
22 Ijkon nenkuaskej on tlakyotl yejuan onenkejejkej hasta kaman nentokaj oksejpa ipan chikueyi xipan.
Hasta ipan ika chiknaui xipan uelis nenkuaskej on tlakyotl chika ajsi on tonajli para pixkilistli.
Niman mechajxilis para nemopanoltiskej.
Sen tlakatl oksejpa uelis kouas itlal yejuan okinamakaka
23 ’On tlajli xuelis nenkinamakaskej nion yakaj kinoyaxkatis* para nochipa pampa on tlajli nejua noyaxka.
Nemejuamej san onemajsikoj niman ken san nemechtlanejtia on tlajli ken nennotenotskauan.
24 Yejua ika,
ijkuak nenkinamakaj sen tlajli,
on amatlajli noneki kijtos ika oksejpa uelis nenkouaskej para nemoyaxka* yes oksejpa.
25 ’Tla sen israelita nokauas mayanki niman mitsnamakiltis seki itlal,
tla ijkon,
se yejuan ken kita nisiu uelis mitskouilis oksejpa on tlajli yejuan omitsnamakiltijkaj.
26 ’Niman tla on tlakatl xkipiya yakaj yejuan ken kita yejuan uelis kouas on tlajli,
pero yejua iselti uelis kisentlalis tomin,
tla ijkon,
yejua oksejpa uelis kouas on tlajli yejuan okinamakaka.
27 Noneki kipouas keski xipan yopanok de on tlamakaualistli desde ijkuak okinamakak,
niman uelis kuepilis itomin on yejuan okouilijka on tlajli ichkich ken kitocaroua,
niman yejua oksejpa kinoyaxkatis* on tlajli.
28 Pero tla xouel okisentlalij on tomin para oksejpa kouas on tlajli,
tla ijkon,
on tlajli iyaxka* yes on yejuan otlakou hasta ajsis on xipan de tlamakaualistli.
Ipan on xipan on yejuan achtoj iyaxka* katka oksejpa iyaxka* yes niman yejua uelis nokuepas niman kiselis on tlajli.
29 ’Tla yakaj kinamakas sen kajli ipan sen ueyikalpan yejuan kiyeualojtok tepantli,
yejua oksejpa uelis kouas san kamanon sano ipan on xipan ijkuak okinamakak.
30 Pero tla on kajli xokou ijkuak okajxitij se xipan ika okinamakak,
tla ijkon,
xokaman uelis kouas.
Yej para yeika nokauas itech on yejuan okou,
niman inyaxka yes ikoneuan niman iuejkakoneuan.
Nion ipan on xipan de tlamakaualistli xuelis kuepiliskej iteko yejuan okinamakaka.
31 Pero on kaltin yejuan onokej ipan kalpantsitsimej kampa xkinyeualojtok tepantli yeskej ken on tlaltin kampa mijlaj.
Kijtosneki ika iteko yejuan okinamakaka uelis kouas oksejpa ikan tomin,
noso uelis oksejpa kuepiliskej ipan on xipan de tlamakaualistli.
32 ’Pero on levitas nochipa ueliskej oksejpa kouaskej on kaltin yejuan onokej ipan inueyikalpan.
33 Tla yakaj koua sen kajli yejuan onkaj ipan inueyikalpan on levitas,
on kajli ika onkaj kauilis on levita ipan on xipan de tlamakaualistli,
pampa nochi on kaltin yejuan onokej ipan on uejueyikalpanmej de on levitas,
teyaxkauan* itech itribu* levi,
pampa yejuamej okiselijkej intech on israelitas.
34 Pero on tlaltin kampa tlatlakuajkualtiaj on levitas yejuan onkaj iyeualkan iminueyikalpan,
xuelis nonamakaskej,
pampa on inyaxka yejuamej para yeika.
35 ’Tla yakaj mokniu israelita nochiuas manyanki niman xuelis nopanoltis,
tejua xpaleui ken tikipaleuiskia sen yejuan xchanej,
noso ken se nemotenotskau yeskia ipan nemochan,
niman xkaua ma chanti mouan.
36 Maka itlaj tikuilis,
nion maka tiktlajtlanilis itlanka motomin yejuan tiktlanejtia,
yej xteititi ika tiktlakaita moTEKO Dios,
niman xseli on mokniu israelita ipan mochan.
37 Maka itlaj tiktlanilis motomin ijkuak tiktlanejtia,
nion maka patioj tiknamakiltis on tlakuajli yejuan tikmakas.
38 Nejua nemoTEKO Dios yejuan onemechkixtij Egipto para nemechmaktilis on tlajli de Canaán niman para ninochiuas nemoDios.
39 ’Tla yakaj mokniu israelita nokauas mayanki niman nonamakas motech,
maka tiktekitiltis ken sen esclavo.
40 Xpiya ken yakaj motenotskau noso ken sen kuajli tekitketl yejuan tiktlaxtlauilis.
Yejua tekitis motech hasta kaman ajsis on xipan de tlamakaualistli.
41 Kemaj uelis kisas iuan ikoneuan niman nokuepas intech on yejuan ken kinta,
niman ipan itlal yejuan okiselij itech iuejkatajuan,
42 pampa on israelitas yejuamej notekipanojkauan yejuan onikinkixtij ipan on tlajli Egipto.
Yejua ika,
xkuajli nonamakaskej ken esclavos itech yakaj.
43 Maka inka xmauilti noso xkintekitilti chikauak.
Yej xteititi ika tiktlakamati moTEKO Dios ika on motlakaitalis.
44 ’Tla tikneki tikimpiyas esclavos noso esclavas,
xkinkoua de oksekimej naciones yejuan chantij moyeualkan.
45 No ijki,
uelis tikinkouas tlakamej yejuan xchanejkej,
yejuan chantij motech,
niman inkoneuan yejuan tlakatiskej ijkuak nemij ipan nemotlal.
Yejuamej uelis nenkinkouaskej para nemoyaxkauan yeskej.
46 Niman ijkuak nenmikiskej,
in esclavos nokauaskej intech nemokoneuan,
niman intech tekitiskej hasta mikiskej.
Pero nemejuamej israelitas xuelis inka nemajauiltiskej nion nenkintekitiltiskej chikauak nemokniuan israelitas.
47 ’Tla yakaj xchanej yejuan chanti ipan motlal nochiuas rico,
niman sen mokniu israelita nokauas mayanki niman nonamaka itech on rico yejuan xchanej,
noso itech yakaj okse yejuan ken kita on rico,
48 mokniu israelita uelis kitlaxtlauas para ma kimakauakan maski tla yononamakaka.
Noso yakaj yejuan ken kita kenon ikniu,
uelis kitlaxtlauas para ma kimakauakan,
49 noso itioj,
noso iprimo,
noso yakaj yejuan nisiu ken kita.
Niman tla yejua iselti uelis kisentlalis tomin para kikuepilis iteko yejuan okojka,
tla ijkon,
no uelis nomanauis san iselti.
50 Ma kixitili iuan iteko desde on xipan ijkuak ononamakak niman kipouaskej hasta ipan on xipan de tlamakaualistli.
San kitlaxtlauas de on keski xipan yopanok niman on keski xipan yotekit.
Kixitiliskej kech kimintlaxtlauiliaj on tlakeualtin.
51-52 On mayanki noneki kitlaxtlauilis iteko san para on keski xipan yejuan poliui hasta on xipan de tlamakaualistli.
53 Noneki tikpiyas ken sen tlakeuajli yejuan otikmakak tekitl para se xipan.
Maka xkauili on iteko ika ma nauilti.