On tlaixpan* de bronce kampa kitlatiskej uentli
27
’Xchijchiuakan sen tlaixpan* ikan on kojtli* yejuan itoka acacia.
In tlaixpan* nenkichijchiuaskej cuadrado,
ome metro ipan 25 centímetros ika ueyak niman ika patlauak.
Kipiyas se metro ipan 25 centímetros ika uejkapan.
2 Xtlalilikan tlapani ipan cada esquina ken itlaj ikuakuautsitsiuan.
Xkinchijchiuakan san se ueyi iuan on tlaixpan*,
niman xkalauilikan bronce.
3 Nochi on tlen kitekitiltiskej ompa ipan on tlaixpan* xkinchijchiuakan ikan bronce:
on kaxtin kampa kitemaskej tlikonextli,
on teposxopiltin para kichipauas on tlaixpan*,
niman on teposuajkaltin para kajsiskej yestli,
on teposchijkoltin para ika kontilanaskej nakatl,
niman on tepostlakitskijli para kiktsiskej tlixochtli.
4 Niman no xchijchiuilikan sen tepostsatsastli de bronce.
Niman xtlalilikan se anillo de bronce ipan cada esquina on tepostsatsastli para ipan kiktsiskej.
5 On tepostsatsastli xtlalikan ijtik on tlaixpan* itsintlan on itenyeual para nokauas tlakpaktsin de itlajkotian ika on tlaixpan*.
6 Para ika nenkiktiskej on tlaixpan*,
xchijchiuakan kojtin* ueueyakej yejuan de acacia niman xkalauilikan bronce.
7 Niman on kojtin* ueueyakej noneki panoskej ijtik on anillos yejuan onkaj ipan iesquinas on tlaixpan* para uelis nenkechpanojtiaskej.
8 On tlaixpan* ijtikoyaktik yes niman de kojtli.
Xchijchiuakan ijki ken on yejuan onimitsijtitij ipan in tepetl.
On kiauak para on tabernáculo*
9 ’Xchijchiuakan ikiauak on tabernáculo* yejuan kipiyas cortinas de on tela lino tlamalintli.
Ipan inakastlan yejuan nokaua kampaka sur,
kipiyas 45 metros ika ueyak.
10 On kiauak kipiyas 20 kuamantin niman on 20 intsintlatokyo de bronce.
Niman on cortinas nenkimpiloskej ipan on kuamantin ikan teposchijkoltsitsimej niman anillos de plata.
11 On cortinas yejuan nokauaskej kampaka norte,
nenkinchijchiuaskej sa no ijki de 45 metros ika ueyak.
Niman nenkimpiloskej on cortinas ipan 20 kuamantin yejuan kipiyaskej intsintlatokyo de bronce yejuan ipan ijkatiaskej.
On cortinas nenkimpiloskej ipan on kuamantin ikan teposchijkoltsitsimej niman anillos de plata.
12 Niman on cortinas yejuan kitsakuas ikuitlapan on tabernáculo* kampaka ikalakiyan tonaltsintli,
kipiyas 22 metros uan tlajko ika ueyak.
Nenkimpiloskej ipan majtlaktli kuamantin yejuan ijkaskej ipan majtlaktli tsintlatoktin.
13 Niman ixpan on tabernáculo* kampaka ikisayan tonaltsintli,
no nenkimpiloskej cortinas yejuan kipiyas 22 metros uan tlajko ika ueyak.
14 Niman onyaskej cortinas ipan cada lado kampa tlapojtos para kalakiskej.
Ipan se lado on cortinas kipiyaskej chikome metro niman kimpiloskej ipan yeyi kuamantin yejuan ijkaskej ipan yeyi tsintlatoktin.
15 Niman ipan on okse lado no ijki on cortinas kipiyaskej chikome metro,
niman kimpiloskej ipan yeyi kuamantin yejuan ijkaskej ipan yeyi tsintlatoktin.
On cortinas kampa kalakiskej ipan on kiauak
16 ’Niman ikalakiyan on kiauak noneki kipiyas sen cortina de chiknaui metro ika ueyak.
On cortina tlachijchijtli yes ikan tela de lino tlamalintli yejuan azul,
morado,
chichiltik niman kualtsin ikpanepanojloj.
On cortina kipiyas naui kuamantin yejuan ijkaskej ipan naui tsintlatoktin.
17 Nochi on kuamantin yejuan kiyeualojtos ikiauak on tabernáculo* noneki kimpiyaskej ianillos de plata,
teposchijkoltsitsimej de plata,
niman tsintlatoktin de bronce.
18 On tlatsakuyotl yejuan kitsakuas iyeuelkan ikiauak on tabernáculo* kipiyas 50 metros ika ueyak,
niman 21 metros uan tlajko ika patlauak.
Niman kipiyas ome metro ipan 25 centímetros ika uejkapan.
On cortinas nenkichijchiuaskej ikan tela de lino yejuan tlamalintli,
niman on tsintlatoktin yeskej de bronce.
19 Nochi tlajtlamach* tlen kitekitiltiskej ijtik on tabernáculo* niman on estacas para on tabernáculo* niman on tlatsakuyotl de cortinas no de bronce yes.
On aceite para on lámpara
20 ’Xkinnauati on israelitas ma kuajkikan aceite de olivo yejuan más kuajli para kitekitiltiskej ipan on lámpara niman para nochipa tlikuitias.
21 Ne ipan on tabernáculo* kampa on israelitas nonamikij iuan Dios,
ipan on achtoj kalijtik kampa Tlayekkan,
Aarón niman itelpochuan kitaskej para on tlauijli nochipa ma tlikuitia tlapoyajkan hasta kualkan ixpan toTEKO.
In sen tlanauatijli para nochipa kichiuaskej on israelitas iuan inuejkakoneuan.