On tlaixpan* kampa kitlatiskej uentli
38
Bezaleel no okichijchiu sen tlaixpan* ikan kojtli* de acacia kampa kintlatiskej yolkej ken uentin.
Onochiu cuadrado ome metro ipan 25 centímetros ika ueyak niman ika patlauak.
Niman uejkapan katka se metro ipan 25 centímetros.
2 Okichijchiuilij on ken itlaj ikuakuautsitsiuan para on naukan esquina.
On tlaixpan* niman ikuakuautsitsiuan san se ueyi tlachijchijtli katka kojtli* niman okalauilij bronce.
3 No okichijchiu ika on tepostli itoka bronce nochi on tlajtlamach* yejuan kitekitiltiayaj ipan on tlaixpan*:
on tlikonexkontsitsimej kampa kitemayaj tlikonextli,
on teposkontsitsimej kampa kitekayaj yestli,
niman on teposchijkoltin yejuan ika kiktsiayaj nakatl,
niman on teposxopijli yejuan ika kixtiayaj tlikonextli,
niman on tepostli para kiktiyaj tlixochtli.
4 No okichijchiu sen tepostsatsastli de bronce,
kampa kitlatiayaj on uentli.
On tepostsatsastli okitlalij itsintlan on itenyeual para nokaua tlakpaktsin de itlajkotian on tlaixpan*.
5 Okichijchiuilij naui anillo para on naukan esquinas de on tepostsastsastli para ipan kinkalaktiayaj on kojtin* ueueyakej para ika kechpanojtiayaj.
6 Okinchijchiu kojtin* ueueyakej ikan kojtli* de acacia niman okinalauilij bronce.
7 Niman okinkalaktij on ueueyakej kojtin* ipan on anillos yejuan kipiya inajnakastlan on tlaixpan* para uelis kechpanojtiaskej.
On tlaixpan* okichijchiu ikan tablas niman ijtik onokau koyaktik.
On ueyi ajpastli de bronce
(Ex 30.18)
8 Okichijchiu on ueyi ajpastli de bronce iuan itsinkaxyo.
Okichijchijkej ikan miyek teskatl de bronce yejuan on siuamej okuajkikej on yejuan tekitiyaj kampa onkaj itsakuijlou on tabernáculo* kampa nemi Dios.
Ikiauak on tabernáculo*
9 Kemaj Bezaleel okichijchiu ikiauak on tabernáculo.
Kampaka sur,
kipiyaya 45 metros ika ueyak on cortina yejuan de lino tlamalintli.
10 On cortinas okitlalijkej ipan 20 kuamantin ika 20 intsintlatokyo de bronce.
Inteposchijkoltsitsiuan niman ianillos de plata.
11 Kampaka norte okitsakukej ikan cortinas yejuan okipix 45 metros ika ueyak,
iuan 20 kuamantin,
niman 20 intsintlatokyo de bronce.
On kuamantin okipixkej teposchijkoltsitsimej niman anillos de plata.
12 Niman kampaka ikalakiyan on tonaltsintli,
otlatsakukej ikan cortinas yejuan kipiyaya 22 metros uan tlajko ika ueyak niman okitlalikej ipan majtlaktli kuamantli,
niman majtlaktli tsintlatoktli para ipan ijkayaj.
On kuamantin okipixkej teposchijkoltsitsimej niman anillos de plata.
13 Kampaka ikisayan tonaltsintli on cortinas no kipiyayaj 22 metros uan tlajko ika ueyak.
14 Inakastlan kampa ikalakiyan on kiauak,
onkatka on cortina yejuan kipiyaya chikome metro ika ueyak,
ipan yeyi kuamantin niman yeyi itsintlatokyo.
15 Niman ipan oksekan inakastlan ikalakiyan on kiauak,
no onkatka sen cortina yejuan kipiyaya chikome metro ika ueyak,
iuan yeyi kuamantli niman yeyi itsintlatokyo.
16 Nochi on cortina yejuan ika okitsakukej iyeualkan on kiauak,
katka de lino tlamalintli.
17 Intsintlatok on kuamantin de bronce katkaj,
niman iteposchijkoltsitsiuan on kuamantin niman ianillos katkaj de plata.
Niman ikuapan on kuamantin okinalauilij plata.
Niman nochi on kuamantin de on kiauak,
cada se kipiyaya ianillo de plata.
Itlatsakuyo on kiauak
18 On cortina yejuan kitsakuaya kampa ikalakiyan on kiauak,
okikpanepanojkej kualtsin ika itlajmachyo ipan on tela yejuan morada,
azul,
chichiltik niman no ikan tela itoka lino yejuan tlamalintli.
On cortina kipiyaya chiknaui metro ika ueyak niman ome metro ipan 25 centímetros ika uejkapan sa no ijki katka ken on sekimej cortinas yejuan kiyeualojtok on kiauak.
19 Kipiyaya naui kuamantli iuan naui itsintlatok de bronce.
On kuamantin okipixkej teposchijkoltsitsimej niman anillos de plata,
niman inkuapan on kuamantin no okinalauilijkej plata.
20 Nochi iestacas on tabernáculo* niman iestacas on cortina yejuan ika otlatsaku iyeualkan on kiauak,
katka de bronce.
On tlen okitekitiltijkej ipan on tabernáculo
21 On levitas okijkuilojkej ken Moisés otlanauatij kech ika miyek on tlajtlamach* yejuan ika okichijchijkej on tabernáculo,
kampa onkatka on yekcaja yejuan kipiyaya on matlaktli tlanauatiltin.
Itamar,
itelpoch on tiopixki Aarón,
otlayekan para okijkuilojkej nochi on tlajtlamach*.
22 Bezaleel,
ikoneu Uri yejuan ixuiu Hur yejuan otlakat intech iuekakoneuan Judá,
okichijchiu nochi tlen toTEKO okinauatij Moisés ma nochijchiua.
23 Niman Aholiab,
itelpoch Ahisamac yejuan otlakat intech iuejkakoneuan Dan,
okipaleuij Bezaleel.
Aholiab se tlamachijchijketl katka,
niman okipix uelilistli para teposchijchiuaya.
Ikpanepanouaya para kimintlajmachyotiaya telas yejuan morada,
azul,
chichiltik niman no ikan tela itoka lino yejuan más kuajli.
24 Nochi on oro yejuan on israelitas okitlayokolijkej toTEKO para okichijchiuilijkej on tabernáculo,
nochi kech ika yetik onochiu 965 kilos niman 30 gramos ken on tiopixkej kitemachiuayaj.
25 On plata yejuan okisentlalijkej ijkuak okimpojkej on israelitas,
onosentalij 3 mil 319 kilos ipan 525 gramos.
Ijkon okitlaxtlajkej ken on tiopixkej kitemachiuayaj.
26 Nochimej yejuan kipiyayaj sempoajli xipan para tlakpak onijkuilojkej,
niman de se nochimej katkaj 603 mil 550 san yejuan tlakamej.
Niman cada se okitemakak makuijli gramo uan tlajko plata ijkuak onijkuilojkej ijkon ken on tiopixkej kitemachiuayaj.
27 Okitekitiltijkej 3 mil 300 kilos de plata para okinchijchijkej tsintlatoktin para on kuamantin de on tabernáculo* niman para on kuamantin kampa okipilojkej on yekcortina yejuan kixelojtikatka on Tlayekkan iuan on kampa Más Tlayekkan.
Nochi in plata ika okichijchijkej 100 tsintlatoktin.
Okitekitiltijkej 33 kilos de plata ipan cada se tsintlatoktli.
28 Niman on plata yejuan onokau,
Bezaleel ika okichijchiu ianillos niman iteposchijkoltsitsiuan on kuamantin.
No okitekitiltij on plata para okinalauilij inkuatipan on kuamantin.
29 On bronce yejuan okinechikojkej para toTEKO,
onosentlalij 2 mil 336 kilos ika yetik.
30 Niman ika on bronce okichijchijkej intsintlatokyo on kuamantin yejuan okintlalijkej kampa ikalakiyan on tabernáculo* kampa nemi Dios.
Niman no ika on bronce okichijchijkej on tlaixpan* kampa kitlatiayaj uentli,
niman itepostsatsasyo,
niman nochi on tlajtlamach* yejuan ompa notekitiltiaya.
31 No ijki,
okitekitiltijkej bronce para on tsintlatoktin niman estacas yejuan kiyeualtsakuaya on kiauak de on tabernáculo,
niman tsintlatoktin para kampa onyas itsakuijlou on kiauak.