Intlaken on tiopixkej
39
Intlaken on tiopixkej yejuan kitekitiltiayaj ijkuak tekitiyaj ijtik iTlayekkan on tabernáculo,
okichijchijkej ikan tela morada,
azul niman chichiltik.
Okichijchijkej itiopixkatlaken Aarón ken toTEKO okinauatij Moisés.
Itlakempani Aarón
2 No ijki,
okichijchijkej itlakempani ikan ikpatl de oro,
tela morada,
azul,
niman chichiltik,
niman no ikan tela itoka lino yejuan tlamalintli.
3 On tlamachijchijkej okitetsotsonkej ika martillo keski placa de oro,
niman okitetekej pijpitsauak ken ikpatl para iuan okiikpanepanojkej on tela morada,
azul,
niman chichiltik,
niman no ikan tela de lino yejuan tlamalintli.
4 Ipan on tlakempani okitlalilijkej ome ikechpanmekayo yejuan okinnamiktijkej san sekan.
5 On ixijlanilpika yejuan kipiyaya ipan on tlakempani para kisaloskej,
san se ueyi tlachijchijtli katka iuan on tlakempani.
Niman sano ijki okichijchijkej ikan:
ikpatl de oro,
tela yejuan morada,
azul,
niman chichiltik,
niman no ikan tela itoka lino yejuan tlamalintli ken toTEKO okinauatij Moisés.
6 On tetsitsimej yejuan kualtsitsimej itoka ónice okinyeualtepitskuajkej ikan oro.
Niman ipan on tetsitsimej okijkuilojkej imintoka itelpochuan Israel ken sen sello yejuan kipiya tlajkuilojli.
7 Kemaj Bezaleel okimpepechoj on tetsitsimej ipan ikechpanmekayo on tlakempani para ika kinmelnamikiskej ikoneuan Israel.
Niman nochi okichijkej ken toTEKO okinauatij Moisés.
Iyelpampejpechyo on ueyi tiopixki
8 On iyelpanpejpechyo,
okichijchijkej kualtsin tlajmachyoj* ikan ikpatl de oro,
no ijki ken on itlakempani,
ipan tela yejuan morada,
azul,
niman chichiltik,
niman no ikan tela itoka lino yejuan tlamalintli.
9 Kuelpachtik katka para onochiu sen bolsa yejuan cuadrada.
Iueyaka niman ipatlajka on bolsa onochiu 22 centímetro.
10 Niman ipan iyelpampejpechyo okimpepechoj naui tlatekpantli de tetsitsimej yejuan kualtsitsimej.
Ipan on achtoj tlatekpantli okipepechojkej sen tetsintli yejuan itoka rubí,
ika ome tetl itoka crisólito niman ika yeyi itoka esmeralda.
11 Niman ipan ika ome tlatekpantli,
okipepechojkej sen granate,
sen zafiro niman sen jade.
12 Niman ipan on ika yeyi tlatekpantli okipepechojkej sen jacinto,
sen ágata niman sen amatista.
13 Niman ipan ika naui tlatekpantli okipepechojkej sen topacio,
sen cornalina niman sen jaspe.
On tetsitsimej okinyeualtepitskuajkej ikan oro niman yejuan kikualnextia.
14 On tetsitsimej katkaj majtlaktli uan ome pampa no ichkich ken itelpochuan Israel.
Niman ipan cada tetl okijkuilokej ken itlaj sello se itoka de on majtlaktli uan ome itelpochuan Israel.
15 Ipan on iyelpampejpech okichijchijkej cadenitas tlamalintli ken mekatsitsimej de nochi oro.
16 No okichijchikej ome anillos de oro,
niman okimpepechojkej ipan on yelpampejpechyotl tlakpak ipan iesquinas.
17 On ome cadenita tlamalintli ken mekatsitsimej de oro opanokej ijtik on ome anillos yejuan onkaj iesquinas de on yelpampejpechyotl.
18 Inkuayak on ome cadenitas de oro tlamalintli okisalojkej ipan cada se de on ome tepostli yejuan kitepiskuaya on temej yejuan onkaj ipan imekayouan itlakempani.
19 Niman no okichijchijkej okse ome anillo de oro niman okitlalilikej on yelpampejpechyotl tlatsintlan ipan iesquinas kampa ijtikopa on itlakempani.
20 No okichijchijkej okse ome anillo de oro,
niman okintlalijkej tlatsintlan ipan on ome imekayouan itlakempani san achijtsin más tlakpak ixijlan ilpika.
21 On anillos yejuan onkatkaj ipan on yelpampejpechyotl okinsalojkej iuan on anillos yejuan onkatkaj ipan on tlakempani ika sen mekatl morado para ijkon on iyelpampejpech onokau tlakpaktsin de ixijlan ilpika,
niman xouel okexan nion xochapan.
Okseki intlakenuan on tiopixkej
22 On tlakentli* yejuan on ueyi tiopixki kitlaliaya itsintlan on itlakempani sen tlakentli* ueyak katka,
okichijchiuilijkej ikan tela yejuan nochi azul.
23 Niman on tlakentli* ueyak kipiyaya sen tlakoyonijli itlajkotian kampa kalakiya itsontekon.
Niman okitenmalinkej ken kitenmalinaj ikechtlan sen chaleco yejuan de kuetlaxtli para xtsayaniya.
24 Okitlajmachyotijkej itenyeualkan on tlakentli* ueyak ika on tlakyotl itoka granada ikan tela morada,
azul,
niman chichiltik,
niman no ikan tela itoka lino yejuan tlamalintli.
25 No ijki,
okichijchiuilijkej campanitas yejuan nochi de oro,
niman okinsasalojkej itsajtsajlan on granadas.
26 Achtoj okitlalilijkej sen campanita niman kemaj sen granada,
kemaj okse kampanita niman okse granada ipan nochi itenyeualkan on tlakentli* ueyak.
Ijkon okitlalilijtiajkej ipan nochi itenyeualkan on tlakentli* yejuan kitekitiltiayaj on tiopixkej ijkuak kalakiyaj ipan on tabernáculo.
Niman nochi okichijchijkej ken toTEKO okinauatij Moisés.
27 Sen tlajtsonketl okinchijchiu oksejki tlakentin ueueyakej ikan tela itoka lino yejuan más kuajli para Aarón niman itelpochuan.
28 No ijki,
ikan on tela okinchijchiuilij:
on kuatlakenxomajtli,
on kuailpikamej,
on tsintlakentin,
29 iminxijlanilpikauan yejuan azul,
morado niman chichiltik yejuan ikpanepanojloj kualtsin ikan itlajmachyo.
Nochi okichijchijkej ken toTEKO okinauatij Moisés.
On placa de oro
30 No ijki,
okichijchijkej sen placa yejuan de nochi oro para okitlalij ixkuatipan Aarón,
niman ipan okijkuilojkej ken sen sello yejuan kijtoua:
“NIITLATIOCHIJKAU TOTEKO”.
31 Kemaj okisalojkej ika sen mekatsintli azul ixpan on ikuatlaken nochi ken toTEKO okinauatij Moisés.
Otlan kichijchiuaj on tabernáculo
32 Niman ijki otlan nochi on tekitl yejuan okichijkej para on tabernáculo* kampa on israelitas nonamikiyaj iuan Dios.
On israelitas okichijkej nochi ken toTEKO okinauatij Moisés.
33 Niman okimaktilijkej Moisés on tabernáculo* iuan nochi on tlajtlamach* yejuan okichijchijkej:
iteposchijkoltsitsiuan,
ikojtsatsasuan,
on kojtin* ueueyakej,
ikuamanuan ika itsintlatokyouan,
34 on ikuapantsaka yejuan okichijchijkej ika iminkuetlaxyo* borregos yejuan chichiltik,
on ikuapantsaka yejuan okichijchijkej ikan kuetlaxtli yejuan más kuajli,
on yekcortina para ika kixeloua on Tlayekkan iuan on Más Tlayekkan,
35 on yekcaja yejuan kipiya on pacto* niman on ome kojtin* ueueyakej para ika kiktiskej,
niman itsaka,
36 on mesa para pan ikan nochi on tlen notekitiltiaya tlapani,
niman on pan yejuan kitlaliayaj ipan on mesa para kiteititiaya ika toTEKO touan nemi,
37 on lámpara de nochi oro ikan nochi itlauiluan yejuan okitlalij notekpantokej niman nochi yejuan iuan notekitiltiaya,
on aceite para tlauilouaya,
38 on tlaixpan* de oro,
on kopajli yejuan ajuiyak,
on aceite para tlatiochiuayaj,
niman on cortina yejuan kitsakuaya ikalakiyan on tabernáculo.
39 Okuajkikej on tlaixpan* de bronce iuan itepostsatsasyo de bronce,
on tlapalokojtin ueueyakej yejuan ika kechpanojtiayaj,
niman nochi on tlen ipan notekitiltiaya,
niman on ueyi ajpastli iuan itsinkax,
40 on cortinas yejuan kiyeualtsakua on kiauak niman ikuamanuan iuan itsintlatokyouan,
on cortina para kampa kalakiyaj de on kiauak,
on mekamej niman estacas,
niman nochi on tlajtlamach* yejuan notekitiltia ikalijtik on tabernáculo* kampa nemis Dios,
41 intiopixkatlaken on tiopixkej yejuan kitlaliskej ijkuak tekitiskej ipan on tabernáculo* kalijtik kampa Tlayekkan,
nochi on ome tlakentli* yejuan tlatiochijtli para on ueyi tiopixki Aarón,
iuan on tlakentli* para itelpochuan ijkuak kichiuaskej imintekiu.