Tlanauatijli para on tonajli sábado
35
Moisés okinsentlalij nochimej on israelitas niman okinmijlij:
“In yejua tlanauatijli yejuan toTEKO okijtoj ma tikchiuakan:
2 Uelis nentekitiskej chikuasen tonajli,
pero on ika chikome tonajli yes sen yektonajli para nejuamej.
Ipan on tonajli xmoseuikan niman xnechmauistilikan nejua nemoTEKO.
Tla yakaj tekitis ipan on tonajli,
ma kimiktikan.
3 Nion maka xtlalikan tlitl ipan nemochan ipan on tonajli de neseuijli.”
Tlanechikoltin para on tabernáculo*
4 Moisés okiminnots nochimej on israelitas,
niman okinmijlij:
“In yejua tlanauatia toTEKO ma nochiua:
5 Xsentlalikan tlajtlamach* tlanechikojli para nenkimakaskej toTEKO.
Nochimej yejuan kinekiskej kitemakaskej uentli para toTEKO,
ma kichiuakan ika nochi iminyojlo.
Uelis kuajkiskej:
oro,
plata,
bronce,
6 tela yejuan morada,
azul,
noso chichiltik,
niman no tela de lino yejuan más kuajli,
itsojmiyo chivo,
7 iminkuetlaxyo* borregos yejuan tlapajloj chichiltik,
niman okseki kuetlaxtin yejuan kualtsitsimej.
No ijki,
xkuajkikan:
on kojtli* itoka acacia,
8 niman aceite de oliva para tlauiltin.
No ijki,
noneki on ajuiyalistli para iuan kineloskej on aceite para tlatiochiualistli,
para kinkuatêkiskej on tiopixkamej ijkuak kinyaxkatiskej toTEKO,
niman ajuiyalistli para on popochtli*.
9 No ijki,
xkuajkikan on tetsitsimej yejuan kualtsitsimej imintoka ónice niman oksekimej tetsitsimej yejuan kualtsitsimej para tiktlaliskej ipan itlakempani niman iyelpampejpech on ueyi tiopixki.
On tlajtlamach* yejuan notekitiltia ipan on tabernáculo*
10 ’Nochimej yejuan kipiyaj tlamachilistli niman uelilistli para kichiuaskej sen kuajli tekitl,
ma uajlakan para kichiuaskej nochi in tekitl yejuan toTEKO tlanauatia.
11 Kichijchiuaskej on tabernáculo* ika iachtoj capa,
ika iome capa,
iteposchijkoltsitsiuan,
ikojtsatsasuan,
ikalkuetlaxkoluan,
ikuamanuan niman itsintlatokyouan on kuamantin.
12 Kichijchiuaskej on yekcaja ikan kojtin* yejuan ueueyakej para kechpanojtiaskej,
niman itentsaka,
niman on cortina yejuan ika tlasakutos kampa onyas.
13 No kichijchiuaskej sen mesa niman kojtin* ueueyakej yejua ika kechpanojtiaskej niman nochi on tlajtlamach* yejuan notekitiltia ipan on mesa,
niman on pan yejuan kiteititia ika toTEKO touan nemi.
14 Kichijchiuaskej sen lámpara para tlauilos,
niman nochi on tlajtlamach* yejuan notekitiltia iuan,
niman itlauiluan,
niman iaceite.
15 Kichijchiuaskej on tlaixpan* kampa kitlatiskej kopajli,
niman on kojtin* ueueyakej yejuan ika kechpanojtiaskej.
Kichijchiuaskej on aceite yejuan tlatiochijtli para kinkuatêkiskej on tiopixkej ijkuak kinteyaxkatiskej itech toTEKO.
Xchijchiuakan on kopajli yejuan ajuiyak,
niman icortina on tabernáculo* para itsakuijlou kampa ikalakiyan.
16 Xchijchiuakan sen tlaixpan* iuan itsaka de bronce yejuan tsatsastik kampa kitlatiskej uentli,
niman on kojtin* ueueyakej yejua ika kechpanojtiaskej,
niman nochi on tlajtlamach* yejuan notekitiltia ipan,
niman on ueyi ajpastli de bronce iuan itsinkax.
17 Xchijchiuakan sen tlatsakuyotl de cortinas yejuan kiyeualtsakuas ikiauak on tabernáculo* ika ikuamanuan niman intsintlatokyouan.
Niman no xchijchiuakan on cortinas yejuan kitsakuas kampa nenkalakiskej ipan on kiauak.
18 Xchijchiuakan estacas,
niman mekamej para nosalos niman notilinis on tabernáculo,
niman para on ikiauak.
19 Xchijchiuakan on tlakentin yejuan kitlaliskej on tiopixkej ijkuak tlauentlaliskej ipan iTlayekkan on tabernáculo.
Xchijchiuakan on itiopixkatlaken Aarón,
niman no on tiopixkatlakentin yejuan kitlaliskej itelpochuan ijkuak kichiuaskej intekiu ken tiopixkej.”
On israelitas kuajkij tlanechikojli para on tabernáculo
20 Nochimej on israelitas ononauatijkej iuan Moisés niman oyajyajkej iminchan.
21 Kemaj nochimej yejuan onoyolejkej kitemakaskej itlaj ika nochi iminyojlo,
ouajlajkej niman okuajuajkikej tlanechikojli para toTEKO para kichijchiuaskej on tabernáculo* kampa nemi Dios.
No okuajuajkikej nochi tlen kitekitiltiskej para kichijchiuaskej on tlajtlamach* yejuan notekitiltis ijtik on tabernáculo* niman on tlajtlamach* para kichijchiuaskej on tiopixkatlakentin.
22 Oualajkej tlakamej niman siuamej yejuan ika nochi inyolo kinekiyaj kitemakaskej itlaj.
Yejuamej kuajkiyaj tlajtlamach* de oro yejuan ika nokualnextiayaj.
Okuajkikej koskamej,
pipiloltin,
anillos,
makoskamej niman nochi tlen tlachijchijtli ika oro.
Cada se okuajkik tlanechikojli de oro para okimakak toTEKO.
23 Nochimej yejuan kinekiyaj okuajkikej tela yejuan morada,
azul,
chichiltik,
noso tela de lino yejuan más kuajli,
noso itsojmiyo chivos,
noso inkuetlaxyo* borregos yejuan tlapajloj chichiltik,
noso kuetlaxtli yejuan más kualtsitsimej.
24 Nochimej yejuan ueliyaj kitemakayaj se tlanechikojli de plata,
noso bronce itech toTEKO.
Niman yejuan kipiyayaj on kojtli* acacia yejuan noneki notekitiltis ipan ichan toTEKO,
no okuajkikej.
25 Niman miyekej siuamej yejuan ueliyaj tlajtlamach* kimachijchiuaj ikan ikpatl,
okuajkikej ikpatl yejuan yokimachijchijkej tlapajloj azul,
morado,
chichiltik niman de lino yejuan más kuajli.
26 Niman sekimej siuamej yejuan kuajli ueliyaj tlamalinaj,
ika nochi inyojlo okimalinkej intsojmiyo chivos.
27 Niman on tlakamej tlayekankej okuajkikej tetsitsimej yejuan itoka cornalina niman oksekimej tetsitsimej yejuan kualtsitsimej para okisalojkej ipan on itlakempani niman iyelpampejpech on tlayekanki tiopixki.
28 Niman no okuajkikej ajuiyalistli niman aceite yejuan ika tlauiloskej,
niman aceite yejuan ika tlatiochiuaskej,
niman kopajli yejuan ajuiyak para popochtli*.
29 Nochimej on tlakamej niman siuamej israelitas yejuan okimatkej ipan inyojlo para tlapaleuiskej para kichiuaskej on tekitl yejuan toTEKO okinauatij Moisés,
okuajkikej on tlanechikojli ika nochi inyojlo para toTEKO.
Bezaleel niman Aholiab kipiyaj uelilistli para kichijchiuaskej tlajtlamach* tlen kualtsin
30 Moisés okinmijlij on israelitas:
“Xkakikan,
toTEKO yokitlapejpenij Bezaleel,
ikoneu Uri niman ixuiu Hur yejuan kisa itech iuejkakoneuan Judá.
31 Niman Dios yokitemiltij ika iEspíritu,
niman ijkon okimakak uelilistli,
kajsikamatistli,
tlamatkilistli para uelis kichijchiuas nochi tlajtlamach* tlen kualtsin.
32 Yejua ueli kinejnemilia kenijki kichijchiuas tlajtlamach* ikan oro,
plata niman bronce.
33 Kuajli kimati ken kinximas tetsitsimej niman ken kintepitskualtia on tetsitsimej ipan oro.
Niman ueli kuajli kinxima kojtin,
niman ueli kichijchiua nochi kech tlajtlamach* tekitl ika imauan.
34 ToTEKO no okinmakak uelilistli Bezaleel iuan Aholiab,
ikoneu Ahisamac yejuan kisa itech iuejkakoneuan Dan,
para ma kinmachtikan oksekimej ika nochi on tlen yejuamej kimatij.
35 ToTEKO okintemiltij in omemej ikan miyek intlamachilis para ueli kinejnemiliaj kenijki kichijchiuaskej nochi tlajtlamach*.
Kipiyaj intlamachilis para kixneskayotiskej ipan tela morada,
azul niman chichiltik niman no ipan on tela itoka lino yejuan más kuajli.
Kipiyaj intlamachilis para kikpanepanouaj tlajtlamach*.
Yejuamej uelij kichijchiuaj san tlinon yejuan kualtsin tlajmachyoj*.