Dios okinmakak Bezaleel niman Aholiab uelilistli para kichijchiuaskej tlajtlamach*
31
ToTEKO okijlij Moisés:
2 “Xkita,
nejua yoniktlapejpenij Bezaleel yejuan ikoneu Uri,
niman ixuiu Hur yejuan kisa itech iuejkakoneuan Judá.
3 Yoniktemiltij Bezaleel ika ipoder noEspíritu.
Yonikmakak miyek tlamatkilistli niman kajsikamatilistli niman uelilistli para kinejnemilia kenijkikichijchiuas tlajtlamach*.
4 Yejua kuajli kimati kenijkikinejnemilis kichijchiuas tlajtlamach* ika oro,
ika plata niman ika bronce.
5 Ueli kinxima tetsitsimej yejuan kualtsitsimej niman ueli kixima kojtli.
Niman ueli kichijchiua san tlinon yejuan tlajmachyoj*.
6 No ijki,
yoniktlapejpenij Aholiab,
ikoneu Ahisamac yejuan kisa itech iuejkakoneuan Dan,
para nochiuas itlapaleuijkau.
Niman nochimej yejuan tlamachijchijkej,
yonikinmakak más tlamachilistli para kichijchiuaskej nochi on tlen yonimitsnauatij.
7 Ma kichijchiuakan on tabernáculo,
niman on yekcaja kampa onkaj on pacto*,
niman itentsaka on yekcaja.
Niman ma kichijchiuakan nochi on tlajtlamach* yejuan notekitiltis ipan on tabernáculo.
8 Ma kichijchiuakan on mesa niman on tlen notekitiltis ipan.
Niman ma kichijchiuakan on lámpara yejuan nochi oro iuan nochi on tlen notekitiltis ipan.
Niman ma kichijchiuakan on tlaixpan* para ompa kitlatiskej on kopajli.
9 Ma kichijchiuakan on tlaixpan* kampa kitlatiskej uentli iuan nochi on tlajtlamach* yejuan ompa notekitiltis.
No ma kichijchiuakan on ajpastli iuan on yejuan ipan kitelketsaskej.
10 Ma kichijchiuakan kualtsitsimej itiopixkatlakeuan on tiopixki Aarón,
niman intiopixkatlakeuan itelpochuan para kitlaliskej nochipa ijkuak tekitij ken tiopixkej.
11 No ma kichijchiuakan on tlatiochijtli aceite,
niman on kopajli yejuan ajuiyak para kitlatiskej ipan on tlaixpan* ne kampa Tlayekkan.
Noneki yejuamej kichijchiuaskej nochi ken yonimitsnauatij.”
On tonajli sábado
12 Kemaj toTEKO okijlij Moisés:
13 “Ijkin xkinmijli on israelitas:
Ika onkaj nenkitlakaitaskej nosábados.
On tonaltin nochipa onyaskej ken sen neskayotl para nemejuamej niman nejua.
Ijkon tej,
nenkimatiskej ika nejua nemoTEKO yonemechyektlalij niman yonemechnoyaxkatij.
14 Xtlakaitakan on tonajli sábado pampa on tonajli tlatiochijtli para nemejuamej.
Akin xkitlakaitas on tonajli,
ika onkaj nenkitlajtlakolmakaskej para ma miki.
Tla yakaj kichiuas itlaj tekitl ipan on tonajli,
ika onkaj nenkixtiskej intech on israelitas.
15 Chikuasen tonajli nentekitiskej,
pero ipan on ika chikome tonajli noneki nemoseuiskej pampa on tonajli tlatiochijtli para nejua nemoTEKO.
Tla yakaj tekitis ipan on tonajli sábado,
ika onkaj nenkitlajtlakolmakaskej para ma miki.
16 Tla ijkon tej,
on israelitas noneki kejeuaskej niman kitlakaistaskej on tonajli para noseuiskej.
Yejuamej noneki ijkon kichiuaskej ken se pacto* para nochipa.
17 Yejua in sen neskayotl yes de nemejuamej niman nejua para nochipa,
pampa ipan chikuasen tonajli nejua,
nemoTEKO,
onikchijchiu cielo niman tlaltikpaktli,
niman ipan on ika chikome tonajli,
xok onitekit,
yej oninoseuij.”
18 Ijkuak toTEKO otlan tlajtoua iuan Moisés ipan on tepetl Sinaí,
okimakak ome tepatlachtli kampa tlajkuilolnestikaj itlanauatiluan,
yejuan Dios okinmijkuiloj ika imajpil.