On becerro de oro
32
Ijkuak on israelitas okitakej ika Moisés youejkauito niman xuajtemoua de on tepetl,
okitatoj Aarón,
niman okijlijkej:
—Xtechinchijchiuili dioses para ma techyekanakan pampa xtikmatij tlinon ipan yonochiu on tlakatl Moisés yejuan otechkixtij Egipto.
2 Niman Aarón okiminnankilij:
—Xkinkixtilikan nemosiuauan,
nemotelpochuan niman nemochpochuan,
impipiloluan de oro yejuan kipiyaj ipan iminnakasuan,
niman xnechinuajkuilikan nikan.
3 Nochimej okinokixtilijkej imimpipiloluan de oro yejuan kiktiyaj ipan iminnakas,
niman okiktilijkej Aarón.
4 Yejua okiselij,
niman ika tlitl okipatlak on oro.
Kemaj okitetsotson ika sen tepostli itoka cincel niman okichijchiu sen ídolo ken sen becerro.
Kemaj on tlakamej opakatsajtsikej,
niman okijtojkej:
—¡Xkakikan israelitas,
in yejua todios yejuan otechkixtij Egipto!
5 Niman ijkuak Aarón okitak ika sanoyej pakiyaj on israelitas,
okichijchiu sen tlaixpan* ixpan on becerro.
Kemaj chikauak okinmijlij:
—¡Mostla tikpiyaskej sen iluitl para toTEKO!
6 Uajmostla on israelitas saniman onokuitejkej niman okinmiktijkej yolkej niman okintlalijkej uentin yejuan nochi tlatla.
Niman no okintlalijkej uentin yejuan para yoltlalijli itech toteko.
Kemaj nochimej onotlalijkej niman otlakuajkej niman otlaonikej* hasta kampa xok ueliyaj.
Niman kemaj nochimej opeu kichiuaj on tlen sanoyej xkuajli.
7 Niman kemaj toTEKO okijlij Moisés:
—Isijkapan xtemo,
pampa mochanejkauan* yejuan otikinkixtij Egipto yonijtlakojkej.
8 Nimantsin yokajkej on ojtli yejuan onikinnauatij ma kinejnemikan.
Okipatlakej oro niman onochijchiuilijkej sen idolo yejuan tlajtlacha ken becerro.
Amantsin kimauistilijtokej,
niman kitlauentlalilijtokej.
Niman kijtouaj:
“Israelitas,
in yejua nemodios yejuan omechkixtij Egipto.”
9 No ijki,
toTEKO okijlij Moisés:
—Yonikitak ika in tlakamej sanoyej yoltechikajkej.
10 Aman xnechkauili ma ninotlauelkixti impan pampa sanoyej yonechkualanijkej.
Nochimej yejuamej nikimpopolos,
pero motech tejua Moisés,
nikpeualtis sen nación yejuan sanoyej ueyi.
11 Pero Moisés kinekiya kiyoltlalis iTEKO Dios para maka ma kichiua,
niman ijkin okijlij:
—¡NoTEKO!
¿Tline sanoyej tikualani intech on tlakamej yejuan sa no tejua otikinkixtij Egipto ika moueyi poder?
12 ¿Tline tikinkauilis on egipcios ijkin ma kinemilikan:
“IminDios okinkixtiko xika kuajli iyojlo,
yej okinkixtiko para neka kominmiktis ipan tepemej,
pampa san kineki kimpopolos de in tlaltikpaktli?”
Yejua ika,
noTEKO,
maka sa xkualani.
Maka sa xnemilij tikimpopolos mokoneuan.
13 Xkelnamiki Abraham,
Isaac,
niman Israel motekitkauan.
Xkelnamiki ika sa no tejua otikintlajtolmakak,
niman otikinmijlij:
“Nikchiuas para mouejkakoneuan ma nochiuakan sanoyej miyekej ken on sitlalimej yejuan onkaj ipan on cielo.”
Niman no otikijtoj ika nochi in tlajli yejuan otikimprometerouilij tikinmakas yejuamej niman iminuejkakoneuan,
yejuamej kiseliskej niman inyaxka yes para nochipa.
14 Yejua ika,
toTEKO okipatlak itlamachilis niman xokimpopoloj on israelitas.
15 Moisés ouajtemok de on tepetl,
niman kuajmakuitiaya on ome tepatlachtli yejuan kipiyaya on tlanauatiltin.
Niman itlanauatiluan toTEKO tlajkuilolnestikatkaj ixpan niman ikuitlapan on tepatlachtin.
16 Dios sano yejua okichijchiu on tepatlachtli niman sano yejua okijkuiloj on tlanauatiltin.
17 Ijkuak Josué okak tsajtsiyaj on israelitas ne tlatsintlan,
okijlij Moisés:
—Kakisti tsajtsiua ken kampa nouijsokilo ne kampa on israelitas chantij ipan imincampamento.
18 Pero Moisés okinankilij:
—Xkakisti tla tsajtsij pampa ye tetlantokej,
nion xkakisti tla pampa sekimej ye kintlantokej.
Nejua nikaki yej nokuikatiaj.
19 Ijkuak Moisés oajsik kampa nemij on israelitas,
niman okitak on becerro niman kenijkinijtotiayaj,
sanoyej okualan.
Niman inka,
otlamotlak on tepatlachtli yejuan kipiyaya ipan ima niman okitetlajtlapan itsintlan on tepetl.
20 Kemaj okontilan on becerro niman okontlajkal tliko.
Niman kemaj okuechoj hasta kualtsin okuejkuechtilij,
niman okonxinij ipan atl.
Kemaj okiminojoniltij on israelitas.
21 Niman Moisés okijlij Aarón:
—¿Tlinon omitschiuilijkej in tlakamej ika otikinkauilij ma kichiuakan in tlajtlakojli sanoyej temojtij?
22 Niman Aarón okinankilij:
—¡Maka xkualani nokniu!
Tejua kuajli tikmatstikaj ika in tlakamej kuelitaj kichiuaskej on tlen xkuajli.
23 Yejuamej onechilijkej:
“Xtechchijchiuili sen dios para techyekanas pampa on tlakatl Moisés yejuan otechkixtij Egipto,
xtikmatij tlinon ipan onochiu.”
24 Kemaj nejua onikinnankilij:
“Nochimej yejuan kipiyaj impipiloluan de oro,
ma nechajkuilikan.
Niman yejuamej onechajkuilijkej.
Kemaj onikpatlak on oro ipan tlitl niman onochiu in becerro.
25 Moisés okitak ika nochimej yolocojtiakaj sa tlajtlamach* kichiuayaj niman nion xok pinauayaj.
Niman no okitak ika kimpijpinauiyayaj on intlauelikniuan niman Aarón xok ueliya kinteltia.
26 Ijkon tej,
Moisés ouajnotelkets ikalakiyan kampa on israelitas chantij ipan on campamento niman okintsajtsilij:
—Nochimej yejuan nemij iuan toTEKO ma uajlakan nikan notech.
—Ijkin kijtoua toTEKO,
iDios Israel:
‘Cada se nemejuamej xuiyan ika nemoespada ipan nochi on campamento desde impeuyan hasta kampa ontlami,
niman xkinmiktikan nochijmej maski nemokniuan,
nemotlajsojkaikniuan noso nemonisiuchanejkauan’.
28 On Levitas okitlakamatkej Moisés niman ipan on tonajli okimiktijkej kanaj 3,000 tlakamej.
29 Kemaj Moisés okinmijlij:
—Aman kuajli onemokajkej ipan itekiu toTEKO pampa onenkitlakamatkej on tlen omechnauatij,
maski onenkinmiktijkej nemotelpokauan niman nemokniuan.
Yejua ika,
aman toTEKO mechtiochiuas.
30 Uajmostla Moisés okinmijlij on israelitas:
—Onenkichijkej sen ueyi tlajtlakojli.
Aman nias nitlejkos kampa nemi toTEKO.
Ijkon nikitas tlinon nikchiuas para niktlapachos nemotlajtlakoluan.
31 Kemaj Moisés onokuep kampa nemi toTEKO,
niman okijlij:
—Sa ye melak in tlakamej okichijkej sen temojtij tlajtlakojli pampa onochijchiuilijkej sen tlamachijchiuajli dios de oro.
32 Nejua sanoyej nimitsyemankatlajtlanilia para xkintlapojpolui.
Tla xtikintlapojpoluis,
xpopolo notoka ipan on amamoxtli* yejuan otikijkuiloj.
33 Pero toTEKO okinankilij Moisés:
—San nikpopolos itoka ipan on amamoxtli* yejuan yotlajtlakoj nixpan.
34 Aman tejua xuiya,
xkinuika on tlakamej kampa onimitsijlij.
Noángel mitsyekanas.
Niman ijkuak ajsis on tonajli ijkuak nejua nitecastigaros,
nejua nikincastigaros in tlakamej ipampa imintlajtlakoluan.
35 Niman toTEKO okuajtitlan sen kokolistli ipan nochi tlakatl pampa okimauistilijkej on becerro yejuan okichijchiu Aarón.