Kenijki notekpanaskej ijkuak yaskej ipan ojtli
33
ToTEKO okijlij Moisés:
—Xkisa de nikan niman xkinuika nochimej in israelitas yejuan otikinkixtij Egipto,
niman xkinuika ipan on tlajli yejuan onikimprometerouilij ika tlajtolpaleuilistli Abraham,
Isaac niman Jacob para nikinmakas iminuejkoneuan.
2 Nejua niktitlanis se ángel para mitsyekanas,
niman nejua nikinuajkixtis ipan on tlajli on cananeos,
amorreos,
heteos,
ferezeos,
heveos niman jebuseos.
3 Nemejuamej xuiyan ipan on tlajli kampa sanoyej tlatlaki niman xitlaj* poliui.
Pero nejua xnias nemouan,
pampa tlamo nemechmiktis ipan ojtli,
pampa nemejuamej sanoyej nenyoltechikajkej.
4 Ijkuak on israelitas okakkej in chikauak tlajtojli,
sanoyej onajmankej,
niman xok yakaj okinotlaliltij iminkualnesyo de oro niman intlaken yejuan kualtsitsimej.
5 Ijkon okichijkej pampa toTEKO ijkin okijlij Moisés:
—Ijkin xkinmijli on israelitas:
“Nemejuamej sanoyej nentsontekonchikakej.
Tla nejua ninemiskia san achijtsin nemouan,
tlamiskia nemechpopoloskia.
Aman xmokixtilikan nochi on kualneskayomej de oro.
Sakin,
nikitas tlinon nikchiuas nemouan.”
6 Niman ijki desde ipan on tepetl Sinaía,
on israelitas xok okinotlaliltijkej imimpipiloluan,
inkoskauan,
niman nochi on tlen ika nokualnextiayaj’.
On tabernáculo* kampa on israelitas nonamikiyaj iuan Dios
7 Moisés kitelketsaya sen kajli uejkatsin de on campamento.
Niman on kajli okitokayotij “Kajli kampa nemi Dios”.
Niman ijkuak yakaj kinekiya kitlajtoltis itlaj toTEKO,
yaya ipan on kajli kampa nemi Dios yejuan onkatka uejkatsin de on campamento.
8 Niman ijkuak Moisés yaya ipan on kajli kampa nemi Dios,
nochimej notelketsayaj iminkiauatempan,
niman konitstikatkaj Moisés hasta ijkuak onkalakiya ipan on kajli.
9 Ijkuak Moisés onkalakiya ipan on kajli,
on moxtli mimiltik uajtemouaya niman notlaliaya ikalakiyan on kajli chika toTEKO tlajtouaya iuan Moisés.
10 Niman ijkuak on israelitas kitayaj on moxtli mimiltik noteltiaya ikalakiyan on kajli,
nochimej notlakuantelketsayaj inkiuatempan niman ijkon kimauistiliayaj toTEKO.
11 Ijkon tej,
toTEKO tlajtlajtouaya iuan Moisés,
notstikatka ken se yejuan tlajtlajtoua iuan itlajsojkaikniu.
Niman sakin*,
Moisés nokuepaya kampa on israelitas chantij ipan imincampamento.
Pero on telpochtli Josué,
itelpoch Nun yejuan kipaleuiyaya Moisés,
xkaman nejkuaniaya ipan on kajli.
Iueyilis toTEKO yejuan okititij Moisés
12 Moisés okijlij toTEKO:
—Tejua tinechijlia ma nikinyekana in israelitas,
pero xtinechijlia akinon tiktitlanis nouan para nechpaleuis.
No ijki,
tikijtoua ika yotiktlalij moyojlo notech niman tinechtlajsojkaita.
13 Aman nimitsyemankatlajtlanilia.
Tla melauak tinechtlajsojkaita,
xnechijli tlinon tikneki ma nikchiua para nikpiyas noyojloj motech niman ijki sanken* uelis nikpiyas motlapaleuilis.
Xkelnamiki ika in israelitas yejuan nikinyekana,
tejua mokoneuan.
14 Niman toTEKO okinankilij:
—San no nejua nias nemouan niman nikchiuas para xmoseuikan.
15 Moisés okinankilij:
—Tla xtias touan,
maka xtechkixti de nikan.
16 Tla xtouan tias,
¿kenijki yakaj kimatis ika titechtlajsojkaita nejua niman mokoneuan?
Tla tejua touan tias,
tla ijkon,
tejuamej tinesiskej ika titochiuaj mokoneuan ikatlakajtin ipan in tlaltikpaktli.
17 Niman toTEKO okijlij Moisés:
—Nejua ijkon nikchiuas ken yotinechtlajtlanilij pampa nimitstlajsojkaita,
niman yotiktlalij moyojlo notech.
18 Kemaj Moisés okijtoj:
—Nimitstlajtlanilia,
xnechkauili ma nikita nochi moueyilis.
19 Niman toTEKO okinankilij:
—Nejua nikchiuas ma pano mixpan nochi on tlen kuajli de nejua.
Niman mixpan nikijtos noyektokatsin.
Nejua tej,
niueli nikiknelia san akinon yejuan nikneki nikiknelis,
niman niyolyemanki* iuan san akinon nikneki iuan niyolyemanki* yes.
20 Pero noxayakatsin xuelis tikitas,
pampa xakaj tlakatl uelis nechitas niman sanken* nemis.
21 No ijki,
toTEKO okijlij:
—Nikan nisiu onkaj sen ueyi techinantli.
Ompa xmotelketsa tlapani.
22 Niman nejua nimitskalaktis ijtik on techinantli kampa tsayanki,
niman ijkuak nipanos niman nesis noueyilis,
nimitstlapachos ika noma hasta kaman nipanoua.
23 Kemaj nikejkuanis noma,
niman uelis tikitas notlakapan,
pero noxayakatsin xtikitas.