On yenkuikej tepatlachtin ika on leyes
34
ToTEKO okijlij Moisés:
—Xteki ome tepatlachtin yejuan no ichkich kenon achtoj tepatlachtin yejuan onimitsmakaka.
Nejua nikijkuilos on tlajtoltin yejuan kipiyaya on sekimej temej yejuan otikintlajtlapan.
2 No ijki,
xmatstia ika mostla kualkan tiuajtlejkos ipan in tepetl Sinaí.
Niman tiuajlas nixpan hasta ikuapan in tepetl.
3 Maka yakaj tlejkos mouan niman maka yakaj más nemis ipan on tepetl.
Nion borregos nion uakaxtin xueliskej tlakuajkuajtinemiskej itech in tepetl.
4 Moisés okitek on ome tepatlachtin no ichkich kenon yejuan achtoj katkaj.
Uajmostla kualkan onokuiteu,
okuik on ome tepatlachtin niman otlejkok ipan on tepetl Sinaí ken toTEKO okinauatij.
5 Kemaj toTEKO ouajtemok ipan sen moxtli,
niman ompa onokau iuan Moisés.
Niman sa no yejua okijtoj iyektokatsin.
6 Kemaj toTEKO opanok ixpan Moisés niman ijkin okijtoj chikauak:
—¡NiJehová!
¡NiJehová!
¡NimoDios yejuan nitetlasojtla niman niteiknelia!
Xnimantsin nikualani.
Sanoyej nitetlasojtla,
niman nochipa nikchiua on tlen nikijtoua.
7 Miles teuejkakoneuan yejuan tlakatitiuij nikimiknelia,
niman nikintlapojpoluilia iminxompayejyeualis,
iminxipanteitalis niman imintlajtlakoluan.
Pero yejuan kipiya tlajtlakojli,
nicastigaroua ipampa itlajtlakol,
niman no nikincastigaroua ikoneuan,
ixuiuan,
ika okpa ixuiuan,
hasta on ika yexpa ixuiuan.
8 Kemaj Moisés nimantsin onotlakuantelketstiaj hasta ipan tlajli,
niman okimauistilij toTEKO.
9 Niman ijkin okijtoj:
—¡NoTEKO,
noTEKO!
Tla aman melauak tinechtlajsojkaita,
xuiya touan niman xtechyekana.
Yejuamej in israelitas melauak sanoyej yoltechikajkej,
pero xtechtlapojpoluili toxompayejyeualis niman totlajtlakoluan,
niman xtechseli para titochiuaskej timoyaxkauan para nochipa.
Kiyenkuiliaj on pacto*
(Dt 7.1-5)
10 ToTEKO okijtoj:
“¡Kuajli xkitakan!
Aman nejua nikchiua sen pacto* nemouan.
Ixpan nochi on israelitas nikchiuas uejueyi tetlatlachalistin ken yejuan xkaman nochiuaya ipan nion se nación ipan nochi in tlaltipaktli.
Niman nochi tlakatl kitas noueyipoder yejuan nemouan nemij.
Kitaskej on tlen nejua nemoTEKO niueli nikchiua,
pampa nikchiuas tlajtlamach* tetlatlachaltij para nemejuamej.
11 ’Xchiuakan on tlen aman nemechnauatia,
niman nejua nikinmejkuanis nemotech on amorreos,
cananeos,
heteos,
ferezeos,
heveos niman jebuseos.
12 ’Pero xmotakan kuajli para maka nenkichiuaskej itlaj pacto* inmiuan on tlakamej yejuan nemij ipan on tlajli kampa nenkalakiskej para nenchantiskej.
Tla nenmoneloskej iminuan,
mechtlajkaliskej ipan tlajtlakojli.
13 Yej kemaj,
xkinxoxotonikan nochi on intlaixpanuan*,
niman kuajli xkintetlajtlapanakan on temej yejuan kinmauistiliaj.
Niman xkintsojtsontekikan on kojtin* yejuan ika kelnamikij imindiosa itoka Aseraa yejuan yejuamej kinmauistiliaj.
14 ’Maka kaman xmauistilikan noso xkueyilikan yakaj okse dios,
pampa nejua nemoTEKO xnikxikos nikitas okse dios nenkimauistiliaj.
Yejua ika,
notoka:
“Dios yejuan xkixikoua kitas ikoneuan kimpiyaj ídolos.”
15 ’Maka xchiuakan pacto* iminuan on tlakamej yejuan nemij ipan on tlajli.
Tlamo ijkuak yejuamej kinmauistiliskej niman kinmakaskej uentli iminídolos,
no mechnotsaskej para xuiyan iminuan niman nemejuamej no nenkuaskej iminuen.
16 Noso no nemotelpochuan ueliskej nonamiktiskej iuan imichpochuan,
niman pampa on ichpokamej kinmauistiliaj imindioses,
nemotelpochuan kinchiualtiskej no ijki ma kichiuakan.
17 ’Maka kaman xchijchiuakan nion se ídolo tlachijchijtli ikan tepostli.
Iluimej ipan cada xipan
18 ’Xchiuakan iluitl de on pan yejuan xkipiya tlaxokolilistli*.
Nenkikuaskej chikome tonajli on pan yejuan xkipiya tlaxokolilistli* ijkon ken nimitsnauatijtikaj.
Xchiuakan in iluitl ipan on metstli Abib ken onimitsijlij,
pampa ipan on metstli Abib onenkiskej Egipto.
19 ’Nochi tlakakonetl yejuan achtoj tlakati xnechyaxkatikan.
No ijki,
xnechyaxkatikan in achtoj koneuan nemoyolkauan,
nemouakaxuan,
nemoborregos noso nemochivos yejuan okichtin.
20 Pero tla tlakati sen polokotsin*,
ika onkaj nenechmakaskej sen borreguito noso sen chivito para ika nenkipatlaskej on polokotsin*.
Pero tla xnenkipatlaskej ikan okse yolki,
xkechpostekikan on polokotsin*.
No ijki,
xnechajkuilikan sen uentli para cada se nemotlakakoneu yejuan yenkuiyotl.
Xakaj uajlas nechalitas tla xitlaj* kuajki.
21 ’Xtekitikan chikuasen tonajli,
pero ipan on ika chikome tonajli xmoseuikan.
Maski ipan on tonaltin ijkuak nentokaj noso nempixkaj,
ika onkaj nemoseuiskej.
22 ’Xchiuakan on iluitl itoka Semanas ijkuak achtoj nempeuaj nenkipixkaj trigo.
No xchiuakan okse iluitl ipan itlamiyan on pixkalistli ijkuak nisiu itlamiyan se xipan.
23 ’Yexpa ipan se xipan nochimej yejuan tlakamej ma uajlakan nixpan nejua nemoTEKO,
niiminDios on israelitas.
24 Nejua nikinmejkuanis nemotech on oksekimej naciones,
niman nikueyilis nemotlal.
Ijkuak nenuajlaskej nixpan nejua nemoTEKO Dios yexpa ipan se xipan,
xakaj uelis kinoyaxkatis* nemotlal.
25 ’Ijkuak nenechmakaskej sen uentli yejuan kipiya yestli,
maka nennechmakaskej pan yejuan kipiya tlaxokolilistli*.
Niman maka xkeuakan nion achijtsin on uentli de Pascua para uajmostla.
26 ’On yejuan achtoj tlakis ipan nemotlal yejuan más kuajli itlakyo ika onkaj nenkiktiskej ipan notabernáculo kampa on israelitas nonamikij iuan Dios,
nejua nemoTEKO Dios.
Maka xkikxitikan sen chivito ika ileche inan.”
Moisés okijkuiloj on tlanauatiltin
27 ToTEKO okijlij Moisés:
“Xkijkuilo in tlanauatiltin yejuan nimitsmaka,
pampa ika in tlanauatiltin nikchiuas on pacto* mouan niman iminuan on israelitas.”
28 Moisés onokau ompa ipan on tepetl iuan toTEKO 40 tonajli niman 40 yeuajli.
Niman ipan nochi on tonaltin xotlakuaj,
nion xoatlik.
Ompa okijkuiloj ipan on tepatlachtli nochi on majtlaktli tlanauatiltin de on pacto* yejuan Dios okichiu iuan on israelitas.
Ixayak Moisés petlaniya
29 Sakin,
Moisés ouajtemok de on tepetl Sinaí kinuajkiya on ome tepatlachtli yejuan kipiya on leyes.
Pero ijkuak ouajtemok de on tepetl,
xkimatiya ika ixayak petlaniya pampa iuan otlajtoj toTEKO.
30 Ijkuak Aarón niman nochimej on israelitas okitakej ika ixayak Moisés petlani,
sanoyej onomojtijkej niman xokinekej okinisiuiskej.
31 Pero Moisés okinnots Aarón iuan nochimej on tlayekankej,
niman ijkuak oyajkej itech Moisés,
otlajtoj inmiuan.
32 Niman sakin*,
ononisiuijkej nochimej on israelitas,
niman Moisés okinmijlij nochi on tlanauatiltin yejuan toTEKO okimakak ipan on tepetl Sinaí.
33 Ijkuak Moisés otlan kiminnojnotsa,
onixtlapachoj ika sen velo.
34 Pero nochipa ijkuak Moisés yaya ixpan toTEKO para tlajtouaya iuan ipan on tabernáculo* kampa on israelitas nonamikiyaj iuan Dios,
kinokixtiliaya on velo yejuan ika nixtlapachouaya niman ijki nokauaya hasta ijkuak uajkisaya.
Kemaj ijkuak kisaya,
kinmachistiaya on israelitas on tlen toTEKO kinauatiaya.
Pero nochipa ijkuak Moisés yaya ixpan toTeko para tlajtouaya iuan ipan on tabernáculo* kampa on israelitas nonamikiyaj iuan Dios,
35 Ijkuak on israelitas oksejpa kitayaj ika ixayak Moisés petlani,
yejua Moisés oksejpa nixtlapochouaya ika on velo.
Niman ijki nokauaya ixtlapachijtikaj hasta kaman oksejpa onkalakiya para tlajtouaya iuan toTEKO.