Tlanauatiltin para sen nemilistli tlatiochijtli
7
’NemoTEKO Dios kichiuas para xkalakikan ipan on tlajli yejuan nenkimoyaxkatiskej,
niman kinkixtis nemoyakapan on heteos,
gergeseos,
amorreos,
cananeos,
ferezeos,
heveos niman jebuseos,
maski sanoyej ueueyimej naciones niman más kojtikej xken nemejuamej.
2 Ijkuak nemoTEKO Dios yomechinmaktilij on tlakamej,
niman nemejuamej yonenkintlankej,
nochimej kuajli xkintlaxoxotonilikan,
niman maka iminuan nemotlajtolmakaskej,
nion maka xkinmiknelikan.
3 Nion maka xmonamiktikan iminuan.
Maka xkinnamiktikan nemotelpochuan iuan iminichpochuan,
nion intelpochuan iuan nemochpochuan,
4 pampa yejuamej kichiuaskej para nemokoneuan ma kitlalkauikan toTEKO,
niman kinmauistiliskej oksekimej dioses.
Kemaj itlauel toTEKO nemopan uajlas niman mechmiktis amanaman.
5 ’In yejua noneki nenkichiuaskej:
Xkinxoxotonilikan nochi intlaixpanuan*,
xkintetlajtlapanakan on temej yejuan yejuamej kinmauistiliaj,
niman xkintsojtsontekilikan on kojtin* yejuan yejuamej kitekitiltiaj para kimauistiliaj on dios Asera niman xkintlatikan nochi iminídolos yejuan kinmauistiliaj.
6 Ijkon xchiuakan pampa nemejuamej israelitas toTEKO Dios omechtlapejpenij para onemochijkej iyaxkauan.
ToTEKO omechtlapejpenij intech nochimej on tlakamej yejuan nemij ipan in tlaltikpaktli,
para ijkin nemejuamej nentlakauiltin yeskej itech ken iyaxkauan.
7 ’ToTEKO omechtlapejpenij nemejuamej xpampa tla nemonación más ueyi xken on oksekimej naciones,
yej nemonación más pitentsin de nochimej yejuamej.
8 ToTEKO omechkixtij ipan on país Egipto kampa nenesclavos katkaj,
niman ikan iueyi poder omechkixtij ipan ima on rey de Egipto,
pampa mechtlajsojtla niman okinek okichiu on tlen okintlajtolmakak ika itokatsin nemoachtojtajuan.
9 ’Kuajli xmatikan tej,
ika nemoTEKO Dios san yejua melauak Dios.
Yejua kichiuas ken kijtoua ipan ipacto*,
yejuan kichiua intech on tatajtin niman intech inkoneuan yejuan nentiuij.
Niman kintlajsojtla yejuan no kitlajsojtlaj yejua,
niman kichiuaj itlanauatiluan.
10 Pero kincastigaroua on yejuan kitlauelitaj,
niman xnouejkaua para kimpopoloua nochimej on yejuan kitlauelitaj.
11 Yejua ika,
xtlakamatikan on tlanauatiltin,
on leyes,
niman on tlamachtiltin yejuan aman nemechnauatia xchiuakan.
Tlatiochiualistli para on yejuan kitlakamatis toTEKO
12 ’Tla ijkuak yonenkakkej in tlanauatiltin,
kuajli nenkichiuaj ken mechnauatia,
nemoTEKO Dios kichiuas on tlen okijtoj ipan ipacto*,
niman on tlen okintlajtolmakak ika itokatsin nemoachtojtajuan.
13 Mechtlajsojtlas,
mechtiochiuas,
niman kichiuas para xmiyekiyakan.
Kintiochiuas nemokoneuan niman nemotlatok,
nemotrigo,
nemovino niman nemoaceite.
Kintiochiuas nemouakaxuan niman nemoborregos para sanoyej ma miyekiyakan ipan on tlajli,
yejuan okintlajtolmakak ika itokatsin nemoachtojtajuan ika mechmakas.
14 Nemejuamej más nentlatiochijtin yeskej xken nochimej on oksekimej tlakamej.
Xnemis nemotsajlan nion sen siuatl niman nion sen tlakatl yejuan tetsakatl* yes.
No ijki,
intech nemoyolkauan,
xnemis nion se okichyolki niman siuayolki yejuan tetsakatl* yes.
15 ToTEKO mechkixtilis nochi tlajtlamach* kokolistli.
Niman xkauilis mechajsis on temojtikejj kokolistin yejuan onenkitakej ipan on país Egipto.
Yej kichiuas para nochimej on motlauelikniuan ma tlajyouikan ika nochi on temojtijkej kokolistin.
16 Nemejuamej noneki tlamis nenkinmiktiskej nochimej on tlakamej yejuan nemoTEKO Dios mechinmaktilis.
Maka xkinmiknelikan nion maka xkinmauistilikan imindioses,
pampa yejua ika on mechkajkayauaskej para xtlajtlakokan.
17 ’Manin ijkin nenkinemiliskej:
“¿Kenijki uelis tikintlaniskej on tlakamej?
Yejuamej más miyekej xken tejuamej.”
18 Pero maka xkinmakajsikan.
Xkelnamikikan on tlen okichiuilij nemoTEKO Dios on rey niman nochimej on egipcios.
19 Xkelnamikikan on uejueyi tlamauisoltin yejuan toTEKO Dios okintitij,
niman on uejueyi señales niman milagros* yejuan onenkitakej okichiu nemoTEKO Dios ika iueyi poder ijkuak omechkixtij ipan on país Egipto.
Sa no ijki kichiuas toTEKO Dios iuan nochimej on tlakamej yejuan nemejuamej nenkinmakasij.
20 No ijki,
toTEKO Dios kintitlanis chilpamej intech on yejuan kinekiskej niyanaskej para nomanauiskej,
niman kinkuajkuaskej hasta kinmiktiskej nochimej.
21 ’Ijkon tej,
maka xmomojtikan imixpan pampa nemoTEKO Dios,
on Dios sanoyej ueyi niman temojtij,
nemi nemouan.
22 Ika yolik toTEKO kinkixtijtias on naciones.
Nemejuamej xnenueliskej nenkinmiktiskej san setipan,
pampa tla ijkon,
nenkichiuaskiaj on tepeyolkej tekuanimej miyekiyaskej nemoyeualkan niman mechkuaskej.
23 Pero nemoTEKO Dios ika yolik mechinmaktilijtias in naciones.
Niman Dios kichiuas ma mojkamikikan hasta kaman tlamis nenkinmiktiskej.
24 Iminreyes mechinmaktilis niman nemejuamej nenkichiuaskej para maka sa yakaj ma kinmelnamiki.
Nion semej yejuamej xueliskej mechixnamikiskej niman ijki nemejuamej nenkinmiktiskej nochimej.
25 ’Nemejuamej nenkintlatiskej imindioses.
Pero maka nenkinekiskej nenkuiskej on oro niman on plata yejuan okimalauilijkej on dioses,
para maka mechkajkayauaskej,
pampa tlamo nenkichiuaskej on tlen sanoyej xkuajli ixpan toTEKO Dios.
26 Yejua ika,
maka xkiktikan nemochan itlaj ídolo,
pampa tla ijkon nenkichiuaskej,
toTEKO mechpopolos ijkon ken yejuamej kimpopolos.
Ijkin tej,
nemejuamej xkinchichiitakan on ídolos pampa Dios kintlauelita.