On ueyi tlanauatijli
6
’In yejua tlanauatiltin niman leyes yejuan nemoTEKO Dios yonechnauatij ma nemechmachti para nenkintlakamatiskej ipan on tlajli yejuan nenkiseliskej para nemoyaxka* yes.
2 In tlanauatiltin niman in leyes nemechmaka para xmakajsikan niman xtlakaitakan nemoTEKO Dios,
nemejuamej,
nemokoneuan,
niman nemoxuiuan,
niman ijki nennemiskej miyek xipan ipan on tlajli yejuan nenkiseliskej.
3 Aman tej israelitas,
xchiuakan tlen nemechnauatia,
niman nochi kuajli kisas para nemejuamej,
niman nenkimpiyaskej miyekej nemokoneuan niman nemoxuiuan ipan on kuajli tlajli kampa sanoyej tlatlaki niman xitlaj* poliui,
ijkon ken okimprometerouilij iminTEKO Dios nemoachtojtajuan.
4 ’Xkakikan israelitas:
ToTEKO Dios san se nemi yejuan toTEKO.
5 ’Xtlajsojtlakan nemoTEKO Dios ikan nochi nemoyojlo,
ikan nochi nemoalma,
niman ika nochi nemochikaualis.
6 ’Xkejeuakan ipan nemotlamachilis nochi in tlanauatiltin yejuan yonemechijlij aman.
7 Niman mojmostla xkinmachtikan nemokoneuan.
Xkintlajtlajtouilikan on tlanauatiltin ijkuak nennemij nemochan,
ijkuak nennejnemij ipan ojtli,
ijkuak ye nenmotekaskej nenkochiskej niman ijkuak nemokuiteuaskej.
8 In tlanauatiltin xtlajkuilolnextikan ipan kuetlaxtli,
niman kemaj nenkitlaliskej ipan nemoma niman no nenkitlaliskej nenmixkuatipan ken sen neskayotl.
9 Niman no xkijkuilokan ipan on kojtin* yejuan ipan salijtikaj nemotsakuijlou niman ipan intsakuijlouan nemokaluan.
Moisés kinnauatia on israelitas ma kitlakamatikan toTEKO
10 ’NemoTEKO Dios mechuikas ipan on kuajli tlajli yejuan okintlajtolmakak ika itokatsin nemoachtojtajuan Abraham,
Isaac,
niman Jacob para mechmakas.
On sen tlajli yejuan kipiya uejueyikalpanmej yejuan kualtsitsimej,
uejueyikalpanmej yejuan xnemejuamej onenkinchijchijkej.
11 Onyaskej kaltin tetentokej ikan miyek tlajtlamach* tlen sanoyej kuajli,
yejuan xnemejuamej onenkitlalijkej.
Onyaskej atlaltekontin yejuan xnemejuamej onenkimichkuakej,
niman miyek uvasyoj niman kojtin* de olivos yejuan xnemejuamej onenkitôkakej.
Niman nentlakuaskej hasta nemixuikej.
12 Ijkuak in nochiuas,
maka nenkelkauaskej toTEKO yejuan omechkixtij ipan on tlajli Egipto kampa nenesclavos katkaj.
13 Xmauistilikan nemoTEKO Dios niman san yejua xtekipanokan.
Niman ijkuak nonekis nenkichiuaskej sen tlajtolmakalistli xchiuakan san yejua ika itokatsin.
14 Maka xkinmauistilikan on dioses yejuan kinmauistiliaj on chanejkej ipan on kalpanmej yejuan nisiu onokej,
15 pampa nemoTEKO Dios yejuan nemouan nemi,
yejua sen Dios yejuan xkixikos kitas nenkinmauistiliaj oksejkimej dioses.
Tla ijkon nenkichiuaskej,
yejua kualanis nemouan niman mechmiktis para mechpopolos nemochimej* ipan in tlaltikpaktli.
16 ’Maka xtlatlatakan nemoTEKO Dios ken onenkichijkej ne Masah.
17 Xchiuakan nochi on tlanauatiltin yejuan toTEKO yomechmakak niman on leyes niman on tlamachtiltin yejuan yomechnauatij.
18 Xchiuakan on tlen melajki,
niman tlen kuajli ixpan toTEKO,
para nochi kuajli kisas nemouan,
niman nenkimoyaxkatiskej on kuajli tlajli yejuan toTEKO okintlajtolmakak ika itokatsin nemoachtojtajuan.
19 Niman toTEKO kichiuas para chojcholoskej nochimej nemotlauelikniuan yejuan nemouan nouijsokij,
ijkon ken yokijtoj kichiuas.
20 ’Ijkuak yejkos on tonajli,
nemokoneuan mechtlajtoltiskej:
“¿Tlinon kijtosneki nochi in tlanauatiltin,
leyes,
niman tlamachtiltin yejuan technauatia toTEKO Dios?”
21 Nemejuamej ijkin nenkinnankiliskej:
“Tejuamej tiesclavos katkaj itech on rey ipan on tlajli Egipto,
niman toTEKO otechkixtij de ompa ikan ueyi poder.
22 Tejuamej otikitakej on temojtij tlamauisoltin niman milagros* yejuan toTEKO okichiu ne Egipto itech on rey niman intech on ichanejkauan.
23 Pero tejuamej otechkixtij de ompa para otechajuikak ipan in kuajli tlajli yejuan okintlajtolmakak ika itokatsin toachtojtajuan,
niman tejuamej no otechmakak.
24 Sakin,
toTEKO Dios otechnauatij ma tikchiuakan nochi in tlanauatiltin niman ma tiktlakaitakan para ijkon nochi kuajli kisas touan,
niman yejua techcuidaros para uejkauis tinemiskej ijkon ken hasta aman.
25 Ijkon tej,
tejuamej tiyolmelajkanemiskej tla tikintlakamatij in tlanauatiltin ixpan toTEKO Dios ijkon ken otechnauatij.”