On majtlaktli tlanauatiltin
5
Moisés okinsentlalij nochimej on israelitas niman okinmijlij:
—Xkakikan,
israelitas,
in leyes niman on tlajtlamach* tlanauatiltin yejuan aman nemechijlia.
Xkimixmatikan kuajli niman xkintlakamatikan.
2 ’ToTEKO Dios okichiu sen pacto* touan ipan on tepetl Sinaí.
3 Yejua okichiu on pacto* xsan iuan touejkatajuan,
yej no okichiu touan tejuamej yejuan aman tinemij nikan.
4 ToTEKO ipan on tepetl niman ijtik on tlitl,
ouajlaj otlajtoko nemouan.
5 Ijkuakon nejua ninemiya tlajkotian de toTEKO niman nemejuamej,
para nemechijliaya itlajtoltsin,
pampa nemejuamej onenkimakaskej on tlitl niman xonentlejkokej ipan on tepetl.
Niman ijkin okijtoj toTEKO:
6 ’“Nejua ninemoTEKO Dios yejuan onemechkixtij ipan on tlajli Egipto kampa nenesclavos katkaj.
7 ’Maka xkinmauistilikan oksekimej dioses,
yej san xnechmauistilikan nejua.
8 ’Maka xchijchiuakan itlaj ídolo yejuan kipiya itlachalis ken itlaj yejuan onkaj ipan cielo,
nion itlaj yejuan onkaj ipan in tlaltikpaktli,
nion itlaj yejuan onkaj ijtik atl.
9 Maka xmotlakuantelketsakan imixpan on ídolos yejuan tlachijchijtin,
nion maka xkinueyiteneuakan,
pampa san nejua niDios ninemoTEKO niman xnikxikos nikitas nenkinmauistiliaj oksekimej dioses.
Niman ijkuak nikincastigaros on tatajtin yejuan xkinekij nechtlakamatiskej,
on castigo no kimajsis inkoneuan,
niman hasta ika yexpa inmixuiuan.
10 Pero on yejuan nechtlajsojtlaj* niman kichiuaj notlanauatiluan,
nikinmiknelis niman nikintlasojtlas inkoneuan,
niman inmixuiuan niman hasta miles iminuejkakoneuan.
11 ’Maka san nenkaj xkijto notokatsin nejua moTEKO Dios,
pampa xkuajli.
Nejua ika onkaj nicastigaros on yejuan san kamanalijtos notokatsin.
12 ’Maka xkelkaua timoseuis ipan on tonajli Sábado,
yej xtekitilti para tinechmauistilis nejua moTEKO Dios ken nejua onitlanauatij.
13 Xtekiti chikuasen tonajli niman xchiua nochi on motekiu yejuan noneki tikchiuas.
14 Pero ipan on ika chikome tonajli,
xmoseui niman xnechmauistili nejua moTEKO Dios.
Ipan on tonajli xuelis titekitis,
nion maka xkauili ma tekiti motelpoch,
nion mochpoch,
nion moesclavo,
nion moyolkauan,
nion on yejuan xchanej yejuan nemi ipan mochan.
Para ijki moesclavo niman moesclava no noseuiskej ken tejua.
15 Xkelnamiki ika tejua no tinemiya esclavo ipan on país Egipto kampa nejua moTEKO Dios onimitskixtij ikan noueyipoder.
Yejua ika,
nejua nimitsnauatia xkejeua on tonajli sábado.
16 ’Xtlakaita motataj niman monanaj ijkon ken nejua moTEKO Dios yonimitsnauatij,
para tinemis miyek xipan ipan on tlajli niman para nochi kuajli kisas mouan ipan on tlajli yejuan nimitsmakas nejua moTEKO Dios.
17 ’Maka xtemikti.
18 ’Maka iuan xmoteka yejuan xmosiuau noso xmoueuentsin.
19 ’Maka xtlachteki.
20 ’Maka xtlajtolketsteuili yakaj.
21 ’Maka xkeleui ikal yakaj,
nion isiuau,
nion iesclavo,
nion iesclava,
nion iuakax,
nion ipoloko*.
Maka itlaj xkeleui on tlen teyaxka.”
On israelitas okimakaskej toTEKO
22 ’In yejua tlanauatiltin yejuan toTEKO okijtoj chikauak ijtik on tlitl niman ijtik on moxtli tilauak ijkuak nochimej onemosentlalijkej tlatsintlan de on tepetl.
Niman xokuitlaj más tlanauatiltin okijtoj.
Kemaj okijkuiloj in tlajtoltin ipan ome tepatlachtli,
niman onechmakak.
23 Ijkuak onenkakkej itlajtoltsin yejuan kisaya ijtik on tlayouajlotl niman onenkitakej on tepetl tlatlaya,
nemochimej* nemejuamej,
niman on tlayekankej de cada tribu* niman on uejueyixtokej tlayekankej onenuajlajkej onentlajtokoj nouan.
24 Niman onennechijlijkej:
“Melauak,
aman toTEKO Dios yotechititij iueyilis niman ipoder,
niman yotikakkej itlajtoltsin yejuan kisaya ijtik on tlitl.
Aman yotikitakej ika Dios ueli tlajtoua iuan tlakamej niman yejuamej xmikij.
25 Pero tla oksejpa tikakiskej itlajtoltsin toTEKO Dios,
on ueyi tlimilinajli uelis techmiktis.
Yejua ika,
más kuajli yeskia tla xok tikakiskej oksejpa technotsas ikan itlajtoltsin.
26 ¿Akinon desde ijtik on ueyi tlitl yokak itlajtoltsin on Dios yoltikaj niman sanken* nemi ijkon ken tejuamej yotikakkej niman xotimikej?
27 Más kuajli tejua xkaki nochi on tlen toTEKO Dios mitsijlis.
Kemaj uelis titechijlis on tlen omitsijlij,
niman tejuamej tikchiuaskej nochi on tlen technauatis.”
28 ’Chika nemejuamej nentlajtlajtojtikatkaj nouan,
toTEKO kaktikatka nochi on tlen nenkijtouayaj.
Kemaj onechijlij:
“Yonikak nochi on tlen okijtojkej on israelitas niman kuajli on tlen okijtojkej.
29 Sanoyej kuajli yeskia tla nochipa ijki tlanemiliskiaj,
niman nechtlakaitaskiaj,
niman kitlakamatiskiaj notlanauatiluan nochi tonaltin.
Tla ijkon kichiuaskiaj,
nochi kuajli kisaskia para yejuamej niman iminkoneuan.
30 Aman xuiya niman xkinmijliti para ma nokuepakan iminchan.
31 Pero tejua xmokaua nikan nouan pampa nimitsijlis nochi on tlajtlamach* tlanauatiltin niman leyes yejuan noneki tikintitis para ma kichiuakan ipan on kuajli tlajli yejuan nikinmakas.
32 ’Yejua ika tej,
xchiuakan nochi on tlen toTEKO Dios yomechnauatij niman maka nenkelkauaskej nion achijtsin.
33 ’Xuiyan ipan on ojtli yejuan toTEKO Dios yomechtlalilij para nennemiskej miyek xipan ipan on tlajli yejuan mechmakas,
niman nochi kuajli kisas nemouan.