On Majtlaktli tlanauatiltin
20
Niman Dios okijtoj nochi in tlajtoltin:
2 “Nejua nimoTEKO Dios,
yejuan otimitskixtij Egipto kampa tiesclavo katka.
3 ’Maka tikimpiyas oksekimej dioses,
aparte de nejua.
4 ’Maka tikchijchiuas itlaj ídolo yejuan tlacha ken itlaj yejuan onkaj ipan cielo,
nion itlaj yejuan onkaj ipan tlaltikpaktli,
nion itlaj yejuan onkaj ijtik atl.
5 Maka timotlakuantelketsas imixpan on ídolos yejuan tlachijchijtin,
nion maka tikinmauistilis pampa san nejua nimoTEKO Dios,
niman xnikxikoua nikitas tikinmauistilis oksekimej dioses.
Niman ijkuak nikincastigaros on tatajtin yejuan xkinekij nechtlakamatiskej,
on castigo no kinmajsis inkoneuan,
iminixuiuan,
niman hasta on ika yexpa niman napa inmixuiuan.
6 Pero on yejuan nechtlajsojtlaj* niman kichiuaj notlanauatiluan,
nikinmiknelis niman nikintlasojtlas inkoneuan,
hasta miles teuejkakoneuan yejuan tlakatitiuij.
7 ’Maka san nenkaj tikijtos notokatsin,
nejua moTEKO Dios.
Nejua ika onkaj nicastigaros on yejuan san kamanalijtos notokatsin.
8 ’Xkelnamiki tikejeuas on tonajli de neseuijli para tinechmauistilis nejua nimoTEKO Dios.
9 Chikuasen tonajli titekitis niman tikchiuas nochi motekiu.
10 Pero ipan on ika chikome tonajli,
timoseuis niman tinechmauistilis nejua nimoTEKO Dios.
Ipan on tonajli xuelis titekitis,
nion xuelis tekitis motelpoch,
nion mochpoch,
nion motekitkau,
nion moyolkauan,
nion on xchanej yejuan nemi mochan.
11 Ijkon xchiua pampa ipan chikuasen tonajli nejua nimoTEKO onikichijchiu cielo,
tlaltikpaktli,
mar niman nochi on tlen onkaj niman nemi.
Niman oninoseuij ipan on chikome tonajli.
Yejua ika,
nejua nimoTEKO oniktiochiu niman onikteneu yektli on tonajli.
12 ’Xtlakaita motataj niman monanaj para tikpiyas ueyi nemilistli ipan on tlajli yejuan nimitsmakas nejua nimoTEKO Dios.
13 ’Maka titemiktis.
14 ’Maka iuan xmoteka yejuan xmosiuau noso xmoueuentsin.
15 ’Maka titlachtekis.
16 ’Maka titetlajtolketsteuilis.
17 ’Maka tikeleuis yakaj ikal,
nion isiuau nion iesclavo nion iesclava,
nion iuakax,
nion ipoloko*.
Maka itlaj tikeleuis on tlen teyaxka.”
On israelitas okimakaskej toTEKO
18 Ijkuak nochimej on israelitas okakkej on tlakomonajli niman on tlapitsaltin,
niman okitakej on tlapetlanajli ipan on tepetl yejuan popokaya,
yejuamej sanoyej onomojtijkej,
hasta okuekuetlakakej niman san uejka nemiyaj.
19 Niman okijlijkej Moisés:
—Xtechnotsa tejua niman timitskakiskej.
Pero maka ma technotsa toTEKO Dios,
tlamo timikiskej.
20 Niman Moisés okinnankilij:
—Maka xmomojtikan.
Dios ijkin ouajlaj para omechititiko iueyi poder para xmakajsikan nochipa niman ijki maka nentlajtlakoskej.
21 Niman chika nochimej on tlakamej uejka nemiyaj,
Moisés okinisiuij on moxtli yejuan tlilijki katka kampa nemiya Dios.
Tlanauatiltin de on tlaixpan*
22 ToTEKO okijlij Moisés:
“Ijkin xkinmijli on israelitas:
‘Ye nenkitstokej ika nemechnotstikaj desde ipan cielo.
23 Maka xchijchiuakan ídolos de oro,
noso de plata para nenkinmauistiliskej.
Ika onkaj nenechtlakaitaskej san nejua.
24 Xnechchijchiuilikan sen tlaixpan* ikan sokitl,
niman ipan nenechmakaskej uentli.
Ompa xkuentlalikan on uentli yejuan nochi tlatla,
niman on uentli para nenkipiyaskej teyoltlalijli nouan,
nejua nemoTEKO.
Niman ompa nennechuentiliskej borregos niman uakaxtin.
Niman san kanon kampa nejua nemechijlis para nennechmauistiliskej,
ompa xchijchiuakan sen tlaixpan*.
Niman ompa nias niman nemechtiochiuas.
25 Tla nennechchijchiuiliskej sen tlaixpan* de tetl,
maka nenkiximaskej on tetl,
pampa tla nenkiximaskej ikan tepostli,
on tepostli kijtlakos on tetl,
niman xchipauak yes notlaixpan*.
26 Niman notlaixpan* maka kipiyas kampa tlejtlejkotiaskej para xakaj ontlachas nemotsintlan.’