On israelitas oajsikej ipan on xalpatlajkan Sinaí
19
Ipan on tonajli ijkuak oajsik yeyi metstli ika okiskej on israelitas ne Egipto,
oajsikej ipan on xalpatlajkan nisiu itech on tepetl Sinaí.
2 Ijkuak okiskej Refidim,
oajsikej itech on tepetl Sinaí.
Ompa okitelketskej iminkajkal ixpan on tepetl ipan on xalpatlajkan.
3 Niman Moisés otlejkok ipan on tepetl para notas iuan Dios.
Niman toTEKO okinots Moisés niman okijlij:
—Ijkin xkinmijli on israelitas,
on iuejkakoneuan Jacob:
4 “Nemejuamej onenkitakej on tlen onikinchiuilij on egipcios.
Nenkimatij ken onemechmanauij.
Ken sen ueyi kuaktlia ijkuak kinuika ikoneuan ipan imastlakapal para xitlaj* uelis kimajsis,
nejua no ijki onemechajuikak notech.
5 Yejua ika,
aman tla nennechtlakamatij niman nenkichiuaskej on pacto* yejuan onikchiu nemouan,
nemochiuaskej nonación yejuan más niktlajsojtlas de nochimej naciones.
Maski nochi nejua noyaxka* nemejuamej más ueyi nenkitosnekij notech.
6 Nemejuamej nemechtlapejpenis para nennechpaleuiskej ken tiopixkej.
Nemechtlapejpenis ken se nación yejuan xkipiya tlajtlakojli nixpan.”
Ijkin xkinmijli on israelitas.
7 Moisés ouajtemok niman okinnotsato on uejueyixtokej tlayekanaj intech on israelitas,
niman okinmijlij nochi on tlen toTEKO okinauatij.
8 Niman nochimej on israelitas otlanankilijkej:
—Nochi on tlen toTEKO tlanauatia,
tikchiuaskej.
Niman kemaj Moisés oyaj para okijlito toTEKO kenijki on israelitas otlanankilijkej.
9 Niman toTEKO okijlij:
—Xkita,
nejua ninonextis nemixpan ipan sen moxtli tilauak para ijki on tlakamej nechkakiskej ijkuak nitlajtos mouan.
Niman ijkon nochipa mitsneltokaskej.
—Xuiya xkinmachistiti on tlakamej para aman niman mostla ma noyolchipauakan para nechmauistiliskej.
Niman ma kimpakakan intlakeuan,
11 niman ma nechchakan uiptla.
Ijkin noneki kichiuaskej pampa uiptla nitemos nejua nemoTEKO,
niman ninemis ipan in tepetl Sinaí imixpan nochimej on tlakamej.
12 Xtlali sen raya yejuan kiyeualos in tepetl,
niman xkinnauati on tlakamej maka kipanoskej.
Xkinmijli maka uajtlejkoskej,
nion maka ajsiskej kampa onkaj on raya,
pampa yejuan ajsis itech on raya ika onkaj mikis.
13 Xakaj uelis kimatokas on tlakatl noso on yolki yejuan kipanauis on raya niman kimatokas in tepetl pampa tla kimatokas,
no kipiyas tlajtlakojli niman nenkimiktiskej ikan temej noso ikan arco tlaminajli.
San tlinon,
tla yakaj tlakatl noso itlaj yolki,
ika onkaj nenkimiktiskej.
On tlakamej san ueliskej nonijsiuiskej itsintlan in tepetl ijkuak kakiskej kipitsaj ikuakuau borrego.
14 Moisés ouajtemok de on tepetl niman okinnauatij on tlakamej ma noyolchipauakan para kimauistiliskej Dios.
Niman nochimej okipakkej intlaken.
15 Niman Moisés okinmijlij on israelitas:
—Noneki nemoyolchipauaskej para uiptla.
Niman no maka ma notekakan san sekan on tlakamej iuan iminsiuauan.
16 Niman uajuiptla kualkan saniman opeu tlakomoni niman tlapetlani.
Niman sen moxtli yejuan sanoyej tilauak onotlalij ikuapan on tepetl.
Niman okakkej sen tlapitsajli yejuan sanoyej chikauak okakistik niman sanoyej onomojtijkej hasta nochimej on israelitas opejkej kuekuetlakaj.
17 Niman Moisés okinkixtij de on campamento,
niman okinyekan nochimej para notaskej iuan Dios.
Niman onotelketskej itsintlan on tepetl.
18 Niman nochi on tepetl Sinaí popokaya pampa toTEKO ouajtemok ipan on tepetl ken sen tlitl.
On poktli tlejkouaya ken uajkistiaskia ipan sen horno,
niman nochi on tepetl uiuixkaya sanoyej chikauak.
19 On tlapitsaltin más sanoyej chikauak kakistiyaj,
Kemaj Moisés tlajtouaya,
niman Dios kinankiliaya ikan itlajtol ken sen tlakomonajli.
20 ToTEKO ouajtemok hasta ikuapan on tepetl Sinaí niman okinots Moisés para ma tlejko.
Niman Moisés otlejkok.
21 Kemaj toTEKO okijlij:
—Xtemo niman xkinmelnamikiltiti on tlakamej para maka kipanoskej on raya kampa onikinmijlij,
nion maka tlejkoskej para kinekiskej nechitaskej,
pampa tlamo mikiskej.
22 No ijki,
on tiopixkej,
maski kipiyaj imintekiu para nechnisiuiyaj,
noneki nochipauaskej para maka nikinmiktis.
23 Niman Moisés okinankilij toTEKO:
—On tlakamej xkinekiskej tlejkoskej ipan in tepetl Sinaí,
pampa tejua otitechnauatij ma tiktlalikan sen raya niman onkuaj ma nikaua in tepetl hasta kampa yotiktlamitij san para tejua.
24 Pero toTEKO okijlij:
—Xtemo oksejpa niman xkanati Aarón.
Pero maka xkinkauili on tiopixkej,
nion on tlakamej ma kipanauikan on raya para tlejkoskej kampa ninemi,
para maka yej itlaj temojtij nikinchiuilis.
25 Kemaj Moisés ouajtemok niman oksejpa okinmijlito on israelitas on tlen toTEKO okijlij.