Jetro okitato Moisés niman okijlij ken tlayekanas
18
Jetro,
on tiopixki de Madián yejuan imontaj Moisés,
okak ken toTEKO okinkixtij on israelitas ne Egipto.
No ijki,
okak nochi on tlajtlamach* tlen kuajli okichiu ipampa Moisés niman on israelitas.
2 Ijkuak Moisés okititlan Séfora isiuau para ma uiya ichan,
chika kinmanauiyaya on israelitas,
Jetro on imontaj Moisés okiselij ichpoch
3 iuan omemej ikoneuan.
Se de on ome ikoneuan itoka katka Gersóna.
Moisés ijkon okitokayotij pampa okijtoj:
“Nejua nichanti ipan in tlajli yejuan xnikixmati”.
4 Niman on okse ikoneu itoka katka Eliezer.
Moisés ijkon okitokayotij pampa okijtoj:
“IDios notataj ouajlaj onechpaleuiko,
niman onechmakixtij itech on rey yejuan kinekiya nechmiktis.”
5 Jetro oyaj iuan isiuau Moisés niman ikoneuan ne xalpatlajkan para okitatoj Moisés ipan on campamento nisiu de on iyektepeu Dios.
6 Jetro otlatitlan ma kimachistitij Moisés ika ajsiskej.
Okijlij:
—Nejua niJetro,
momontaj.
Oniuajlaj onimitsitako niman onikinuajuikak mosiuau niman mokoneuan.
7 Niman Moisés okis okiselito imontaj.
Ijkuak oajsik ixpan,
onopachoj niman okitenkuaj.
Ijkuak yonotlajpalojkej,
okalakkej kalijtik.
8 Niman ompa Moisés okitlajtlajtouilij imontaj nochi on tlen toTEKO okichiuilij on rey niman on egipcios para okiminmanauij on israelitas.
Niman okitlajtlajtouilij nochi on tlajtlamach* yejuan ipan onochiu ipan ojtli,
niman kenijkitoTEKO okinmakixtij.
9 Jetro opak ijkuak okak ken ijkitoTEKO okimpaleuij on israelitas niman okinmakixtij de on egipcios.
10 Niman Jetro okijtoj:
—Ma tikueyilikan toTEKO yejuan omechmanauij inmak on rey niman nochimej on egipcios,
niman nochimej on yejuan xkuajli mechchiuiliayaj.
11 Aman ye nikmatstikaj ika toTEKO yejua más ueyi de nochimej on yejuan kintokayotiaj dioses,
pampa omechmanauij intech on tlakamej yejuan noueyimatiyaj niman yejuan xkuajli mechchiuiliayaj.
12 Kemaj Jetro okimakak Dios sen uentli yejuan nochi tlatla,
niman okseki uentin.
Niman Aarón iuan nochimej on uejueyixtokej israelitas oyajkej otlakuatoj iuan imontaj Moisés ixpan Dios.
Moisés okintlalij sekimej jueces
13 Uajmostla Moisés onotlalij ken juez para kinkakis on israelitas yejuan noteixpanuiyaj.
Nochi on tonajli miyek tlakatl ijkaya ixpan Moisés hasta tlayoua.
14 Ijkuak Jetro imontaj Moisés okitak nochi on tekitl yejuan iselti kichiuaya Moisés imixpan on israelitas,
okijlij:
—¿Tlinon tikchiua iminuan on tlakamej?
¿Tline san tejua timotlalia para titekiuajti niman nochimej yejuamej nikan ijkatokej nochi tonajli?
15 Niman Moisés okinankilij imontaj:
—Nochimej uajlauij nechalitaj para ma niktlajtolti Dios tlinon kichiuaskej.
16 Ijkuak itlaj ika nokualaniaj,
uajlauij nechalitaj para ma nikinmijli akinon okichiu on tlen melauak.
Niman kemaj nejua nikinmijlia tlinon kijtoua Dios niman tlinon itemachtil.
17 Pero Jetro,
imontaj Moisés,
okijlij:
Xkuajli tlen tikchiua.
18 Tisiaumikis niman no siauiskej nochimej on tlakamej yejuan uajlauij motech.
In tekitl sanoyej yetik para tejua.
Moselti xuelis nochi tikchiuas.
19 Aman xkaki tlinon nimitsijlis yejuan noneki tikchiuas niman Dios ma mitspaleui.
Kuajli yes para tinemis ixpan Dios impampa on tlakamej niman tejua tikijlis nochi on problemas yejuan kipiyaj.
20 No ijki,
noneki xkinmachti itlanauatiluan,
niman on tlen yejua kijtoua,
niman xkinmijli kenijkinoneki nemiskej,
niman tlinon noneki kichiuaskej.
21 Pero no ijki noneki xkintlapejpeni de nochimej on tlakamej sekimej tlayekankej yejuan kitlakaitaj Dios.
Xkintlapejpeni yejuan xistlakatij niman yejuan xkeleuiyaj on tlen okse iyaxka.
Xtlali se tekiuaj ipan cada mil tlakamej,
se tekiuaj ipan cada 100 tlakamej,
se tekiuaj ipan cada 50 tlakamej niman se tekiuaj ipan cada majtlaktli tlakamej.
22 Yejuamej nochipa tekiuajtiskej intech on israelitas.
Yejuamej xkinkauili on problemas yejuan xuejueyi,
niman on yejuan xueliskej kichiuaskej,
tejua ma mitskauilikan.
Ijkon mitspaleueliskej ipan on ueyi tekitl.
23 Tla Dios mitsnauatia para tinechkakis,
kemaj uelis tikxikos motekiu,
niman nochimej on tlakamej inyolika nemiskej.
24 Ijkon tej,
Moisés okak imontaj niman okichiu nochi on tlen okijlij.
25 Okintlapejpenij tlayekankej tlakamej yejuan yolmelajkej intech on israelitas niman okinmakak tlanauatijli ipan cada mil tlakatl,
ipan cada 100 tlakatl,
ipan cada 50 tlakatl,
niman ipan cada majtlalktli tlakatl.
26 Niman yejuamej nochipa kuektlaliayaj on tlajtlamach* tlen kimpajsolouaya.
Niman san yejuan uejueyi pajsolouilistin kiktiliayaj Moisés,
pero nochi pajsolouilistli yejuan xmás uejueyi kikuektlaliayaj yejuamej.
27 Niman sakin*,
Moisés niman Jetro on imontaj ononauatijkej,
niman Jetro onokuep ichan.