On atl yejuan okis ipan on ueyi tetl
17
Niman nochimej on israelitas okiskej ne xalpatlakan itoka Sin,
niman ika yolik yajtiayaj ken toTEKO kinyekanaya.
Oajsikej kampa itoka Refidim,
pero ompa xonkatka atl para atliskej.
2 Kemaj okualankej itechkopa Moisés niman okijlijkej:
—¡Xtechmaka atl para tatliskej!
Niman Moisés okinnankilij:
—¿Tline nenkualanij nouan?
¿Tline nenkitlatlataj toTEKO?
3 Pero pampa sanoyej amikiyaj más tlamach kijliayaj Moisés.
Niman ijkin okijlijkej:
—¿Tline otitechchiualtij ma tikisakan Egipto?
¿Tline otitechajuikak nikan?
¿Otitechajuikak nikan san para ma timikikan iuan tokoneuan niman toyolkauan?
4 Niman kemaj Moisés okinots toTEKO niman okijlij:
—¿Tlinon nikchiuas inuan in mokoneuan?
¡Sa achijtsin poliuiya para nechtemojmotlaskiaj!
5 Niman toTEKO okinankilij:
—Xkinuika keskimej on uejueyixtokej tlakamej de on israelitas,
niman xnejnemi inyakapan.
Ijkuak tias xkikti ipan moma on topijli yejuan ika otikmailij on río Nilo.
6 Nejua nimitschas ipan on tepetl Horeb kampa onkaj on ueyi tetl.
Ompa tejua tikmailis on ueyi tetl,
niman ipan kisas atl para atliskej nochimej on israelitas.
Ijkon okichiu Moisés imixpan on uejueyixtokej tlakamej de on israelitas.
7 Kemaj ompa okitokayotij Masaha.
Niman no okitokayotij Meribab.
Ijkon okitokayotij pampa ompa on israelitas tlamach xkuajli okijtouilijkej niman okitlatlatakej toTEKO ijkuak okijlijkej:
“¿Nemi toTEKO touan,
noso ka?”
On nouijsokilistli iminuan on amalecitas
—Xkintlapejpeni sekimej tlakamej niman xkinuijsokiti on amalecitas.
Nejua ninemis mostla ikuapan on tepetl ikan on topijli yejuan Dios onechmakakc.
10 Josué okichiu ken Moisés okinauatij,
niman okinuijsokito on amalecitas,
chika Moisés,
Aarón niman Hur otlejkokej ikuapan on tepetl para kintaskej.
11 Ijkuak Moisés kintlejkoltiaya imauan,
on israelitas tetlaniyaj,
pero ijkuak kintemoltiaya imauan,
tetlaniyaj on amalecitas.
12 Pero sakin*,
Moisés omasiau.
Yejua ika,
okuikej sen tetl para ipan onotlalij,
niman Aarón iuan Hur kimapaleuiyayaj.
Se ijkatikatka ipan iyekma niman okse ipan iopochma.
Yejua ika,
Moisés ouel okixikoj kimpiyaya imauan tlakpak hasta ijkuak okalak tonaltsintli.
13 Yejua ika,
Josué otlan kinmiktia on soldados amalecitas ikan espada.
14 Kemaj toTEKO okijlij Moisés:
—Ixkijkuilo ipan sen amamoxtli* in tlinon onochiu para on israelitas nochipa kelnamikiskej.
Niman xkijli Josué ika nejua nikimpopolos para nochipa on amalecitas ipan in tlaltikpaktli niman xok yakaj kinmelnamikis.
15 Moisés okichijchiu sen tlaixpan* yejuan ijkin okitokayotij:
“NoTEKO nemi ken Bandera yejuan nechyekana.”
16 Niman Moisés okijtoj:
“Ken sen bandera ipan toma,
toTEKO techyekana ma titetlanikan
pampa on amalecitas okixnamikej toTEKO.
Yejua kinuijsokis nochipa.”