ToTEKO okinmakak on israelitas on tlakuajli yejuan itoka maná niman tektotomej
16
Nochimej on israelitas okiskej Elim niman oajsikej ipan on xalpatlajkan yejuan itoka Sin yejuan nokaua itsajlan Elim niman Sinaí.
Niman oajsikej ompa ipan 15 tonajli ijkuak ika ome metstli kipiyaya ika okiskaj Egipto.
2 Ompa ipan on xalpatlajkan,
nochimej opejkej tlamach kijliaj Moisés niman Aarón.
3 Ijkin kinmijliayaj:
—Más kuajli yeskia tla toTEKO techkauiliskia ma timikikan Egipto.
Ompa titotlaliayaj nisiu itech on kontli yejuan tentikatka ikan nakatl niman titlakuayaj hasta kampa tixuiyaj.
Pero nemejuamej onentechajuikakej ipan in xalpatlajkan para ma timikikan ikan apistli.
4 Niman kemaj toTEKO okijlij Moisés:
—Nikchiuas para ma uajxini tlakuajli de ipan cielo* ken ijkuak kiaui.
Niman mojmostla on israelitas kisentlaliskej san yejuan kikuaskej ipan on tonajli.
Nikneki nikitas akinon nechtlakamatis niman akinon ka.
5 Pero ipan ika chikuasen tonajli ijkuak kisentlaliskej yejuan kiktiskej iminchan,
ma kisentlalikan para ome tonajli.
6 Moisés niman Aarón okinmijlijkej on israelitas:
—Ijkuak kalakis tonaltsintli nenkimatiskej ika toTEKO yejua omechkixtij Egipto.
7 Niman ipan on kualkan nenkitaskej iueyilis toTEKO,
pampa okak ika tlamach xkuajli onenkijtouilijkej.
Xnejua niman Aarón tlamach onentechijtouilijkej pampa ¿Akin tejuamej para nentechijtouiliskej?
Tejuamej san tiitekitkauan.
Yej Nemejuamej tlamach onenkijtouilijkej toTEKO.
8 Oksejpa okijtoj Moisés:
—Ijkuak kalakis tonaltsintli toTEKO mechmakas nakatl para nenkuaskej,
niman mostla kualkan mechixuiltis ika miyek pan,
pampa yokak ika nemejuamej tlamach nenkijtouiliaj.
Ijkuak nemejuamej tlamach nentechijtouiliaj,
xnentechijtouiliaj tejuamej,
yej tlamach nenkijtouiliaj,
toTEKO.
9 Niman kemaj Moisés okijlij Aarón:
—Xkinmijli nochimej on israelitas:
“Ma uajlakan ixpan toTEKO,
pampa yejua yokak on tlen xkuajli kijtouiliaj.”
10 Niman chika Aarón kiminnotstikatka on israelitas,
nochimej ontlachixkej neka xalpatlajkan,
niman iueyilis toTEKO ouajnonextij ipan sen moxtli.
11 Niman toTEKO okinots Moisés niman okijlij:
12 —Yonikak ken nechijtouiliaj on israelitas.
“Xkimijli ika ijkuak kalakis tonaltsintli,
nenkuaskej nakatl,
niman mostla kualkan nenkuaskej pan hasta kampa nemixuiskej.
Ijkon nenkimatiskej ika nejua ninemoTEKO Dios.”
13 Niman ijkuak okalak tonaltsintli oualajkej miyekej totomej yejuan imintoka tektotomej,
niman sanoyej miyek otemikoj kampa nemiyaj on israelitas.
Niman ipan on kualkan oxin ajuichtli niman kiyeualojtoya on campamento.
14 Niman sakin*,
ijkuak on ajuichtli oajkotokok,
onokau istak yejuan ken itlaj tejsiutli kuechtik ipan on xajli.
15 Niman on israelitas xkimatiyaj tlinonon.
Ijkuak okitakej notlajtoltiayaj:
“¿Tlinon yejua in?”
Niman Moisés okinmijlij:
—In yejua on pan yejuan toTEKO mechmaka para nemotlakual.
16 In yejua itlanauatil toTEKO:
“Xsentlalikan cada se nemejuamej san on kech kikuas.
Xkixitilikan kanaj ome litro para cada se yejuan nemi ipan nemochan.”
17 On israelitas ijki okichijkej ken okinmijlijkej.
Sekimej miyek okisentlalijkej niman sekimej achijtsin.
18 On yejuan okiktik miyek,
xitlaj* itech onokau.
Niman yejuan okiktik achijtsin xokipoloto.
Cada se okiktik san kech ika kaxilis para tlakuaskej ifamilias.
19 Kemaj Moisés okinmijlij:
—Maka yakaj ma kikaua nion achijtsin in tlakuajli para uajmostla.
20 Pero sekimej xokinekkej okakkej Moisés.
Yej seki okajkej para uajmostla.
Niman uajmostla okitakej yookuijlouak niman yomoloniak.
Yejua ika,
Moisés okualan iminuan.
21 Cada kualkan,
on israelitas kisentlaliayaj san kech nonekiya para kikuaskej,
niman tlakualispan ijkuak tlaxotlaya patiya on yejuan nokauaya ipan xajli.
22 Pero ipan on ika chikuasen tonajli,
kisentlaliayaj para ome tonajli kikuaskej.
In kijtosneki kisentlaliayaj naui litro para cada se.
Niman on israel tlayekankej oyajkej okitlajtoltitoj Moisés tline ijkon kichiuayaj.
23 Niman Moisés okinmijlij:
—Ijkon tlanauatia toTEKO,
pampa mostla on tonajli yes para titoseuiskej.
Titoseuiskej pampa on sen tonajli yektli.
On tonajli tlakauijli san para toTEKO niman xtitekitiskej.
Yejua ika,
aman xposonikan on tlen noneki nenkiposoniskej,
niman xkikxitikan on tlen noneki nenkikxitiskej,
pero xkeuakan yejuan nokauas para nenkikuaskej uajmostla.
24 Ijkon ken otlanauatij Moisés,
okejkej tlakuajli para uajmostla on yejuan onokau.
Niman uajmostla saken kuajli onkatka.
Xomoloniak nion xookuijlouak.
25 Yejua ika,
ipan on tonajli sábado,
Moisés okijtoj:
—Xkuakan on tlakuajli aman pampa aman sábado,
niman in tonajli titoseuiskej para toTEKO.
Tla nenyaskej nenkontejtemoskej tlakuajli ipan campo xnenkinextiskej.
26 Chikuasen tonajli uelis nenkisentlaliskej on tlakuajli,
pero ipan on chikome tonajli yejua neseuiltonajli.
Ijkuakon,
titoseuiskej niman xitlaj* onyas para nenkisentlaliskej.
27 Sekimej israelitas okiskej ipan on ika chikome tonajli ijkuak sábado para kisentlaliskej on tlakuajli,
pero xitlaj* okinextijkej.
28 Niman kemaj toTEKO okijlij Moisés:
—¿Hasta kamanon xnenkintlakamatiskej on tlen nemechnauatia niman on tlen nemechmachtia?
29 Xkitakan ika nejua,
nemoTEKO,
nemechmaka in tonajli para xmoseuikan.
Yejua ika,
ipan on ika chikuasen tonajli nemechmakas tlakuajli para ome tonajli.
Niman ipan on ika chikome tonajli cada se ma nokaua ichan niman maka ma kisa.
30 Yejua ika,
on israelitas onoseuijkej ipan on ika chikome tonajli.
31 On israelitas okitokayotijkej “maná”a on tlen kisentlaliayaj.
Istak katka ken iteyo cilantro,
niman uelik katka ken pan yejuan kichijchiuayaj ikan nekutli.
32 Kemaj Moisés okijtoj:
—In yejua tlanauatijli yejuan mechmaka toTEKO:
“Xtemiltikan ome litro ikan maná niman xkejeuakan para nemouejkakoneuan.
Ijkon kitaskej on tlakuajli yejuan nejua onemechmakak nemejuamej ipan in xalpatlajkan ijkuak onemechkixtij Egipto.”
33 Niman Moisés okijlij Aarón:
—Xtilana sen chikiutli niman ompa xtema on maná se gomer yejuan ome litro maná.
Niman kemaj xtlali ixpan toTEKO niman xkeua para mouejkakoneuan kitaskej.
34 Ijki okichiu Aarón ken toTEKO okinauatij Moisés.
Niman sakin*,
okitlalij on chikiutli ixpan iyekcaja toTEKO.
35 Niman on israelitas okikuajkej maná 40 xipan hasta oajsikej ipeuyan Canaán.
36 (Se tlatemachiuajlij gomer,
nochiua ken ome litro.
Niman noneki majtlaktli gomer para nochiuas se tlatemachiuajlij yejuan itoka efab.)