Ikuikau Moisés
15
Kemaj Moisés inmiuan on israelitas onokuikatijkej in kuikatl para toTEKO:
“Ninokuikatis para toTEKO
pampa tetlanki ikan ueyi poder.
Okinmiktij ipan mar on caballos inmiuan on yejuan impan yetiayaj.
2 ToTEKO kichiua para ma ninokuikati ikan pakilistli.
Yejua notemakixtijkau yejuan nechyolchikaua.
Yejua noDios yejuan nikueyiteneuas.
Yejua on Dios yejuan notataj okimauistilij,
niman niktlakaitas.
3 ToTEKO yejua sen ueyi tlauijsoketl.
JEHOVÁ,
in yejua itoka.
4 Okinapachoj ipan mar
on carretas de guerra,
inmiuan isoldados on rey.
On soldados yejuan más uejueyixtokej ipan nochi Egipto,
oamimikkej ipan on Mar Rojo.
5 Oxinitoj kampa sanoyej uejkatlan ijtik on mar ken itlaj temej.
Niman on mar yejuan uejkatlan okintlapachoj.
6 Ay toTEKO,
ikan moyekmatsin yejuan kipiya ueyi poder,
otikintlan totlauelikniuan.
7 Niman ikan moueyi poder otikimpopoloj
yejuan omitsixnamikkej.
Otlejkok motlauel ken sen ueyi tlitl,
niman yejuamej otlatlakej ken itlaj sakatl.
8 Chikauak otikilpits on mar,
niman on atl onotlajkoxeloj.
On mar onotelkets niman ijkatikatka ken notelketsa ome uejkapan tepantli.
On mar yejuan uejkatlan onoteltij.
9 Totlauelikniuan onoueyimatkej niman okijtojkej:
‘Tikintojtokaskej hasta tikonminajsiskej,
niman tikinkuiliskej nochi on tlen kipiyaj,
niman titochiuaskej ricos ikan on tlen inyaxka.
Tikxikopinaskej toespada
niman tikimpopoloskej ikan tomauan.’
10 Pero tejua,
toTEKO,
otikilpits on mar,
niman on mar okintoloj.
Opolakkej ipan on temotij atl ken on tepostli itoka plomo.
11 ¡Ay toTEKO!
Xnemi okse dios yejuan no ijki ken tejua.
Xakaj nemi yektli niman ueyixtikaj ken tejua.
Tejua tikpiya moueyi poder,
niman titetlatlachaltia ika on tetlatlachalistin yejuan tikchiua.
Yejua ika,
mitsnamiki para mitsueyiteneuaskej.
12 ¡Ikan moueyi poder,
otikchiu para okintoloj on tlajli!
13 Ika motetlajsojtlalis* tikinyekana in tlakamej
yejuan otikinmanauij.
Ika mopoder tikinuika hasta mochan kampa tlayekkan.
14 Nochi tlakatl ipan nochi naciones kuekuetlakaskej
ijkuak kimatiskej on tlen otikchiu.
On filisteos kuekuetlakaskej
pampa kimajsis nemojtijli.
15 Niman on tlayekankej soldados ipan on tlajli Edom mojkamikiskej.
On tekiuajkej de on tlajli Moab kuekuetlakaskej ikan nemojtijli.
Niman xok kipiyaskej poder nochimej on cananeos.
16 ¡Ay toTEKO!
¡Sanoyej ma nomojtikan!
¡Ma kipiyakan miyek nemojtijli!
¡Ma nokauakan ken temej
ikan moueyi poder,
hasta ijkuak yopanojkej mokoneuan,
mokoneuan yejuan otikinmomanauilij!
17 ¡Ay toTEKO!
Xtechuika para tinemiskej ipan moyektepeu.
Xtechyekana hasta nepa ipan on tlajli
kampa otiktlapejpenij para tichantiskej,
ipan mochan yejuan tejua otikchijchiu.
18 ToTEKO,
tejua titlamandaroua nochipa niman para nochipa.”
Ikuikau María
19 Ijkuak on carretas de guerra niman on caballos de on rey inmiuan on yejuan impan yetiayaj okalakej ipan mar,
toTEKO okichiu para on mar okintlapachoj.
Pero on israelitas opanokej itlajkotian on mar ken ipan sen ojtli uaki.
20 Kemaj on tiotlajtojkasiuatl María,
ikniu Aarón,
okontilan sen pandero.
Niman nochimej on siuaisraelitas opeu iuan nijtotiaj niman kitsotsonaj impandero.
21 María nokuikatiaya in tlajtojli:
“Xkuikatlalikan toTEKO,
pampa Tetlanki ikan ueyi poder.
Okinamimiktij ipan mar on caballos,
niman yejuamej on yejuan yetiayaj.”
On atl yejuan chichik
22 Moisés okinyekan on israelitas niman onejkuanijkej itech on Mar Rojo.
Oyajkej ipan on xalpatlajkan itoka Shur.
Niman onejnenkej yeyi tonajli pero xkinextiayaj atl.
23 Ijkuak oajsikej ne Mara,
xouel okonikej on atl pampa chichik katka.
Yejua ika,
on amejli okitokayotijkej Mara yejuan kijtosneki “chichik”.
24 Niman on israelitas opejkej kualanij itechkopa Moisés,
niman kijtouayaj:
“¿Tlinon uelis tikoniskej?”
25 Yejua ika,
Moisés okitlajtlanij toTEKO ma kipaleui para kimatis tlinon kichiuas,
niman toTEKO okititij sen tlakotl.
Niman Moisés okonchapanij on tlakotl ipan atl,
niman on atl onochiu tsopelik.
Ompa toTEKO okiminmakak on israelitas sen ley para ipan nouikaskej.
No ijki,
okintlatlatak para kitas tla kitlakamatiskej.
26 Ijkin okinmijlij:
“Tla ika nochi nemoyojlo nennechkakiskej nejua nemoTEKO Dios tlinon nemechijlia,
niman tla nenkichiuaskej on tlen melajki nixpan niman nenkitlakamatiskej notlanauatiluan,
xnemechtitlanilis nion sen kokolistli yejuan oniktitlan impan on egipcios,
pampa nejua ninemoTEKO yejuan nemechmaka chikaualistli.”
27 Niman sakin*,
on israelitas oajsikej ne Elim kampa onkatka majtlaktli uan ome amejli niman 70 soyakojtin yejuan kitlakitiaj dátil.
Niman ompa nisiu itech on atl onochachantijkej.