Okis atl ipan on ueyi tetl
20
Ipan on achtoj metstli de on xipan yejuan uetsi ipan abril de intonalamau on hebreos*,
on israelitas oajsikej ipan on xalpatlajkan itoka Zin niman onokajkej ne kampa itoka Cades.
Ompa omik María niman ompa okitokakej.
2 Pampa xonkatka atl para koniskej on israelitas,
onosentlalijkej nochimej para onajkomankej niman okualankej itechkopa Moisés iuan Aarón,
3 niman ijkin okijlijkej Moisés:
—Más kuajli yeskia tla timikiskiaj iuan on oksekimej israelitas yejuan okinmiktij toTEKO.
4 ¿Tline onentechajuikakej tejuamej tiikoneuan toTEKO ipan in xalpatlajkan?
¿Tline nenkinekij ma timikikan nikan iuan toyolkauan?
5 ¿Tline onentechkixtijkej ipan on país Egipto niman onentechajuikakej nikan kampa sanoyej xkuajli?
Nikan xueli itlaj tiktokaj.
Xonkaj higos,
nion uvas nion granadas.
Nion xitlaj* atl para tikoniskej.
6 Moisés iuan Aarón okinkajtejkej on israelitas,
niman oyajkej ne ikalakiyan on tabernáculo* kampa nemi Dios,
niman ompa onotlakuantelketskej niman onopachojkej hasta ipan tlajli.
Kemaj iueyilis toTEKO ouajnonextij inmixpan.
7 Niman toTEKO okijlij Moisés:
8 —Xkonkui on bastón yejuan onkaj ixpan on yekcaja,
niman ika itlapaleuil mokniu Aarón,
xkinsentlali nochimej on israelitas.
Kemaj imixpan nochimej,
xnotsa on ueyi tetl niman xkijli ma mechmaka atl.
Niman tikitas ika ipan on ueyi tetl kisas atl para atliskej nochimej yejuamej niman iminyolkauan.
9 Moisés okikuik on bastón yejuan onkatka ixpan toTEKO ijkon ken yejua okinauatij.
10 Kemaj Moisés iuan Aarón okinsentlalijkej on israelitas ixpan on ueyi tetl,
niman Moisés okinmijlij:
—Xkakikan xipanteitanij,
¿manin uelis temechkixtiliskej atl ipan in ueyi tetl para nematliskej?
11 Niman ijkuak Moisés ijkon okijtoj,
onomatelkets niman okimailij okpa on ueyi tetl ikan on bastón.
Kemaj ouajkuepon sanoyej miyek atl.
Ijkon,
on israelitas niman iminyolkauan oatlikej.
12 Pero toTEKO okijlij Moisés niman Aarón:
—Pampa xonennechneltokakej niman xonennechueyitenejkej imixpan on israelitas,
nemejuamej xnenkalakiskej iminuan ipan on tlajli yejuan yonikimprometerouilij ika nikinmakas.
13 In yejua on amejli yejuan okitokayotijkej Meribaa pampa ompa on israelitas okixnamikej toTEKO,
niman yejua okintitij iyekchipaualis.
On rey ne Edom xokinkauilij ma panokan on israelitas
14 Chika on israelitas nemiyaj ne Cades,
Moisés okititlan keski itlajtojkau itech on rey ne Edom para ijkin ma kijlitij:
“Tejuamej titeuejkakoneuan itech mokniu Israel.
Tejua kuajli tikmati nochi on tlajyouilistli yejuan yotikpanokej.
15 Toachtojtajuan oyajkej ipan on país Egipto niman ompa sanoyej ouejkajkej nemij.
Pero on egipcios sanoyej otechtlajyouiltijkej tejuamej niman toachtojtajuan.
16 Kemaj otitoueyikatsajtsilijkej itech toTEKO,
niman yejua otechkak.
Yejua ika,
otechajtitlanilij se iángel,
yejuan otechkixtij ipan on país Egipto.
Niman aman nikan tinemij ipan in ueyikalpan Cades,
nisiu kampa tlami mopaís.
17 Yejua ika,
timitstlajtlaniliaj,
xtechkauili ma tipanokan ipan moueyitlalpan.
Tejuamej xtikalakiskej kampa onkaj tlatoktli noso kampa uvasyoj.
Nion xtikoniskej atl de nemoatlaltekonuan.
San tipanoskej ipan on ueyi ojtli niman xtiktlalkauiskej on ojtli hasta kaman tikisaj ipan moueyitlalpan.”
18 Pero on rey de Edom okinnankilij:
—Maka xpanokan ipan notlal,
pampa tla nenpanoskej,
nejua iminuan nosoldados temechuijsokiskej.
19 On israelitas oksejpa okijlijkej:
—San tiaskej ipan on ueyi ojtli kampa nochi tlakatl nojuitia,
niman tla tejuamej noso toyolkauan konij atl ipan moatlaltekonuan timitstlaxtlauiliskej.
San xtechkauili ma tipanokan ipan moueyitlalpan.
20 Pero on rey de Edom okiminankilij:
—¡Ka,
xnempanoskej!
Niman okis iuan miyekej isoldados para okintsakuilitoj on israelitas
21 para xokinkauilij ma panokan ipan iueyitlalpan.
Kemaj on israelitas okitejtemojkej okse ojtli.
Omik Aarón
22 Nochimej on israelitas okiskej ne Cades,
niman oajsikej hasta ipan on tepetl Hor.
23 Ompa ipan on tepetl Hor nisiu kampa tlami on ueyitlalpan Edom,
toTEKO okijlij Moisés iuan Aarón:
24 “Aarón ye mikis.
Niman xkalakis ipan on tlajli yejuan yonikinyaxkatij on israelitas,
pampa nepa itech on amejli Meriba xonenkitlakamatkej on tlen nejua onemechnauatij.
25 Tejua,
Moisés,
xkuika Aarón iuan Eleazar,
on itelpoch ikuapan on tepetl Hor.
26 Ompa tikixtilis Aarón itiopixkatlaken,
niman tiktlaliltis Eleazar,
ikoneu.
Niman Aarón ompa mikis.”
27 Moisés okichiu nochi tlen toTEKO okinauatij.
Niman nochimej on israelitas okitakej ken yejuamej otlejkokej ipan on tepetl Hor.
28 Niman ompa Moisés okixtilij Aarón itiopixkatlaken niman okitlaliltij Eleazar.
Niman ompa ikuapan on tepetl omik Aarón,
kemaj Moisés niman Eleazar ouajtemokej de ipan on tepetl.
29 Ijkuak on israelitas okimatkej ika Aarón yomik,
okichokilijkej 30 tonajli.