Kenijki techipaualo ixpan Dios
19
ToTEKO okijlij Moisés niman Aarón:
2 “Nejua nemoTEKO,
nemechmaka in okse tlanauatijli:
Xkimijli on israelitas ma mitsajuikilikan sen becerra yejuan kipiya itsojmiyo chilatik yejuan xkanaj tlakokojli* ipan itlakayo,
niman yejuan xe kaman kitekitiltiaj para tlaxoponia*.
3 Nemejuamej nenkimakaskej on tiopixki Eleazar,
niman yejua kixtis uejka de on campamento niman tlanauatis ixpan ma kimiktikan.
4 Kemaj on tiopixki Eleazar kikuis achijtsin iyesyo on becerra ika imajpil,
niman ika tlajuichis chikomepa imelajkan ika on yektiopan kampa ninemi.
5 Kemaj ixpan on tiopixki Eleazar,
kitlatiskej ikuetlaxyo*,
innakayo,
iyesyo niman ixixalis.
6 On tiopixki kikuis seki kojtli* de cedro,
se imakojyotsin on xojtli itoka hisopo,
niman tela yejuan chichiltik,
niman nochi kontlalis ipan on tlitl kampa tlatlatikaj on becerra.
7 ’Kemaj on tiopixki kipakas itlaken,
niman naltis.
Kemaj uelis kalakis ipan on campamento,
pero yejua sanken* xchipauak yes hasta tlapoyajkan.
8 Niman on tlakatl yejuan okitlatij on becerra,
no kipakas itlaken niman naltis.
Pero yejua sanken* xchipauak yes hasta tlapoyajkan.
9 Kemaj okse tlakatl,
yejuan chipauak nixpan,
kisentlalis on tlikonextli de on becerra niman konkauas kampa tlachopajkan ikiauak on campamento.
On tlikonextli kitekitiltiskej on israelitas para ika kuektlaliskej on atl yejuan para chipaualistli.
Nochi in yes sen uentli ipampa tlajtlakojli.
10 On yejuan okisentlalij on tlikonextli,
kipakas itlaken.
Pero yejua sanken* xchipauak yes hasta tlapoyajkan.
In yejua sen ley yejuan para nochipa onyas para nemejuamej yejuan nenisraelitas,
niman para on xchanejkej yejuan chantij nemouan.
11 ’Yejuan kimatokas yakaj mikatsintli,
xok chipauak yes nixpan chikome tonajli.
12 Ipan on ika yeyi tonajli,
niman ipan on ika chikome tonajli noneki nochipauas ika on atl ikatlakajtli techipaua,
niman nokauas chipauak.
Pero tla xnochipaua ipan on ika yeyi tonajli niman ipan on ika chikome tonajli,
xchipauak yes nixpan.
13 Tla yakaj kimatoka sen mikantsintli niman xnochipaua,
kijtlakos notabernáculo,
nejua nemoTEKO.
Noneki nenkixtiskej intech on israelitas pampa xokajuichijkej ika on atl ikatlakajtli techipaua,
niman yejua nokauas xchipauak nixpan.
14 ’In yejua tlanauatijli yes para ijkuak yakaj mikis ikalijtik.
Nochimej yejuan nemiskej ijtik on kajli niman nochimej yejuan kalakiskej ompa,
nokauaskej xchipajkej nixpan chikome tonajli.
15 Nochi kontsitsimej yejuan onokej ipan on kajli niman xkuajli tsakutokej no xok chipajkej yeskej nixpan.
16 ’Tla yakaj nemi mijlaj niman kimatoka sen mikatsintli yejuan okimiktijkej ipan guerra,
noso yejuan san ompa omik,
noso tla kimatokas iomiyouan yakaj,
noso sen tlalkontli,
xok chipauak yes nixpan chikome tonajli.
17 ’Niman para yakaj nochipauas,
noneki xkuikan achijtsin itlikonexyo on becerra yejuan okitlatijkej ipampa on tlajtlakojli,
niman xtlalikan ipan sen tlaltekomatl niman xtekilikan atl de amejli.
18 Kemaj sen tlakatl yejuan chipauak nixpan,
kikuis sen imakojyo on xojtli itoka hisopo,
kipolaktis ipan on atl niman ika kajuichis on kajli,
niman nochi on kontsitsimej,
niman no kimajuichis on tlakamej yejuan ompa nemij.
Niman no kajuichis on yejuan okimatokak on mikaomimej noso on mikatsintli yejuan okimiktijkej,
noso san omik,
noso tla okimatokak sen tlalkontli.
19 On tlakatl yejuan chipauak nixpan,
noneki kajuichis on yejuan xchipauak nixpan,
ipan ika yeyi tonajli niman kampa ika chikome tonajli.
Ijkuak ajsis ika chikome tonajli ye kipiyas chipauak.
Kemaj on tlakatl yejuan xchipauak,
naltis niman kipakas itlaken,
pero sanken* xchipauak yes hasta tlapoyajkan.
20 ’Pero tla yakaj yejuan xchipauak nixpan xnochipaua,
ika onkaj nenkixtiskej ipan on campamento,
pampa kijtlakoua notabernáculo,
nejua nemoTEKO,
pampa tla xokajuichijkej ika on atl ikatlakajtli techipaua,
xnemi chipauak nixpan.
21 In yes sen ley para nochipa.
On yejuan teajuichia ika on atl ikatlakajtli techipaua,
ika onkaj kipakas itlaken.
Niman on yejuan kimatokas on atl ikatlakajtli techipaua,
xok chipauak yes nixpan hasta tlapoyajkan.
22 Nochi tlen kimatokas yakaj yejuan xchipauak nixpan,
nokauas xchipauak.
Niman tla yakaj kimatokas sen tlakatl yejuan xchipauak nixpan,
yejua no xok chipauak yes nixpan hasta tlapoyajkan.”