Intekiu on tiopixkej niman levitas
18
ToTEKO okijlij Aarón:
“Ijkuak on israelitas kichiuaskej itlaj tlajtlakojli itechika on tabernáculo,
tejua niman mokoneuan niman nochimej on levitas,
nenkipiyaskej on tekitl para nentlajtlaniskej ma kintlapojpoluikan.
Pero ijkuak tejua niman mokoneuan itlaj xkuajli nenkichiuaskej ipan nemotekiu ken tiopixkej,
xakaj uelis nemopampa tlajtlanis.
Yej sano nemejuamej nemopampa nentlajtlaniskej tetlajpojpoluilistli.
2 ’Xchiua para on levitas yejuan intech tiualejtikaj,
ma mitspaleuikan tejua niman motelpochuan ijkuak nenkichiuaj nemotekiu ipan on tabernáculo* kampa onkaj nopacto*.
3 Yejuamej mechpaleuiskej ipan on tlajtlamach* tekitl ipan on tabernáculo.
Pero xuelis nonisiuiskej itech on tlajtlamach* yejuan ompa notekitiltia noso itech on tlaixpan*,
pampa tla ijkon kichiuaskej,
yejuamej mikiskej,
niman nemejuamej no nenmikiskej.
4 Yejuamej nemouan kichiuaskej nochi on tekitl yejuan nonekis ipan on tabernáculo* kampa ninemi,
pero nion se tlakatl yejuan xlevita uelis nonisiuis nemotech kampa nentekitij.
5 San tejua niman motelpochuan uelis nentekitiskej ipan on tabernáculo* niman itech on tlaixpan*.
Ijkon xok nikualanis iminuan on israelitas.
6 Nejua yonikinxeloj on nemokniuan levitas de intech nochimej on oksekimej israelitas para nemechinmakas nemejuamej.
Yejuamej noteyaxkauan niman mechpaleuiskej ipan on tekitl yejuan noneki ipan on tabernáculo* kampa ninemi.
7 Pero on tekitl yejuan nochiua kampa tlaixpan* niman yejuan nochiua kalijtik kampa más Tlayekkan ikuitlapan on yekcortina,
san tejua Aarón niman motelpochuan uelis nenkichiuaskej pampa nejua onemechtlalij tiopixkej.
Pero tla yakaj yejuan xtiopixki kichiuas on tekitl ken sen tiopixki,
ika onkaj mikis.”
On tiopixkej niman on levitas kiseliskej tlen kikuaskej
8 ToTEKO okijlij Aarón:
“Nejua nimitsmaka nochi on uentli yejuan nechuentlaliliaj on israelitas.
Nochi uentli tlatiochijtli yejuan xtlatla,
nemechaxkatia tejua niman motelpochuan.
In nokauas sen tlanauatijli para nochipa.
9 Nochi uentli tlatiochijtli yejuan kixelouaj para xkitlatiaj,
tejua motech nokauas.
On uentli de harina,
on uentli ipampa tlajtlakojli,
noso on uentli ipampa tlajtlakojli de culpa,
nemoyaxka* yes.
Nochi in uentin tlatiochijtin yejuan nechmakaj on israelitas para tejua yes niman para motelpochuan.
10 Nochimej mokoneuan yejuan tlakamej uelis kikuaskej in uentli yejuan tlatiochijtli,
pero san uelis kikuaskej kampa tlayekkan,
pampa in uentli tlatiochijtli.
11 ’On uentli yejuan kuiteuaj niman kooliniaj,
no nimitsmaka nochi,
tejua iuan nochimej mokoneuan tlakamej niman siuamej yejuan sanken* motech nemij.
In yes sen ley para nochipa.
San akinon yejuan mofamilia,
tla chipauak iyojlo nixpan,
uelis kikuas on uentli.
12 No timitsmaka nochi on achtoj tlakyotl yejuan on israelitas nechajkuiliaj cada xipan:
on aceite yejuan más kuajli,
nochi vino yejuan más kuajli niman nochi trigo yejuan más kuajli.
13 On tlen achtoj kipixkaskej on israelitas de nochi tlen kitokaj yejuan nechmakaskej,
nochi para tejua yes.
San akinon yejuan mofamilia uelis kikuas tla chipauak iyojlo nixpan.
14 Nochi uentli yejuan on israelitas nechmaktiliskej nejua nemoTEKO,
moyaxka* yes.
15 Nochi iminyenkuiyokoneuan on israelitas niman iminyenkuiyokoneuan iminyolkauan yejuan nechinmakaskej nochiuaskej para tejua.
Pero de on iminyenkuiyokoneuan on israelitas niman iminyenkuiyokoneuan iminyolkauan yejuan xchipajkej,
nonekis nechinkouiliskej.
16 Ijkuak iminyenkuiyokoneuan iminyolkauan kipiyaskej se metstli,
nechinkouiliskej ika makuijli tomin de plata yejuan cada se kipiya majtlaktli uan se gramos ika yetik ijkon kech ika kitlajtlanij ipan on tabernáculo.
17 ’Pero maka kitlaxtlauaskej para nechkouiliskej iyenkuiyou sen vaca,
noso sen borrega noso sen chiva pampa on yolkej tlatiochijtin niman tlakauiltin san para nejua.
Noneki tikinmiktis,
niman iminyesyo ika tikajuichis on tlaixpan*.
Niman ichajka tiktlatis ken sen uentli yejuan tlatla niman yejuan ajuiyak para nejua nemoTEKO.
18 Tejua motech nokauas on nakatl,
no ijki kenon iyelpannakayo yejuan uentli tlaoolinijli niman iyekmametskojyo on yolki.
19 Nochi tlen on israelitas kixelouaj para kiuentlaliaj nixpan,
nimitsmaka tejua niman motelpochuan niman mochpochuan yejuan sanken* chantij mouan.
In sen ley yejuan onyas para nochipa,
sen pacto* yejuan xkaman nopatlas nion xkaman tlamis.
In sen pacto* yejuan nejua mouan nikchiua niman iuan mouejkakoneuan.”
20 ToTEKO okijlij Aarón:
“Tejua xtikpiyas tlaltin nion tlajtlamach* ipan on país de Israel ken on oksekimej israelitas.
Nejua ninochiuas nimoyaxka niman nimoherencia intsajlan on israelitas.
21 ’On levitas nikinmakas ken herencia nochi on diezmos* yejuan nechmakaj on israelitas.
In yejua ika nikintlaxtlauilis on intekiu yejuan kichiuaj ipan on tabernáculo* kampa ninemi.
22 On oksekimej israelitas xok ueliskej kinisiuiskej on tabernáculo* kampa nejua ninemi,
pampa tla kinisiuiskej,
tlajtlakoskej niman mikiskej.
23 On levitas san yejuamej kipiyaskej on tekitl ipan on tabernáculo* kampa ninemi.
Niman yejuamej kipiyaskej tlajtlakojli tla itlaj xkuajli kichiuaj ompa.
In sen ley yejuan nochipa onyas para nochimej on tatajtin niman inuejkakoneuan.
On levitas xuelis kiseliskej herencia de itlaj tlajli iminuan on oksekimej israelitas.
24 Pero yejuamej nikinmaka nochi on diezmos* yejuan on israelitas nechmakaj nejua nemoTEKO.
Yejua ika,
ijkin yonikimijlij:
Nemejuamej Levitas xnenkiseliskej tlajli ijkuak on israelitas kiseliskej imintlal.”
25 ToTEKO okinots Moisés niman okijlij:
26 “Xkinmijli on levitas ika ijkuak kiseliskej on diezmos* yejuan on israelitas kiminmakaskej,
yejuan nejua yonikinmakak on levitas ken herencia,
yejuamej kixtiskej imindiezmo* itech on díezmos yejuan kiseliskej,
para nechmakaskej nejua,
nemoTEKO.
27 On yejua yes imindiezmo* yejuan nechamakaskej ken tlaxtlauijli nejua nemoTEKO no sa no ijki ken nechmakaj on israelitas de on tlen kitokaj ijkuak nechmakaj imintrigo noso iminvino.
28 Ijkon tej,
on levitas kixtiskej imindiezmo* itech on diezmos* yejuan kiseliaj intech on israelitas.
Niman on uentli yejuan nechmakaskej nejua nemoTEKO,
kimakaskej on tiopixki Aarón.
29 Itech on diezmos yejuan on levitas kiseliskej,
yejuamej noneki onkuaj kitlaliskej yejuan más kuajli para nechmakaskej.
In yejuan más kuajli kiselis Aarón.
30 ’No xkimijli on levitas ika nejua,
nemoTEKO,
nikselis imindiezmo* on levitas ken yejuamej kiseliaj imindiezmo* intech on yejuan tlatokaj ijkuak nechmakaj imintrigo noso iminvino.
31 On levitas niman iminfamilias uelis kikuaskej san kanon,
pampa on yejua imintlaxtlauil ika on imintekiu ipan on tabernáculo* kampa ninemi.
32 Ijkuak yonechmakakej nochi on tlen más kuajli,
uelis kikuaskej nochi on tlen onokau,
niman xtlajtlakoskej,
pampa yonechmakakej on tlen más kuajli.
Niman ijkon xkijtlakoskej on uentli tlatiochijtli de on israelitas niman xmikiskej.”