Ibastón Aarón oitsmolin
17
ToTEKO okinots Moisés niman okijlij:
2 “Xkinnauati on israelitas para cada tlayekanki itech cada tribu* ma kuajki sen bastón.
Nochi uajnochiuas majtlaktli uan ome.
Niman ipan cada bastón tejua tikijkuilos itoka on tlayekanki yejuan iyaxka* on bastón.
3 Niman tikijkuilos itoka Aarón ipan on bastón yejuan iyaxka* itribu* Leví.
Niman ijkon onyas sen bastón para cada tlayekanki ipan cada tribu.
4 On bastones tikintlalis ijtik on tabernáculo* kampa nejua ninemi,
ixpan on yekcaja yejuan kipiya on pacto* kampa nejua ninonamiki nemouan.
5 Nejua nikchiuas para itsmolinis ibastón on akin nejua niktlapejpenis ken ueyi tlayekanki tiopixki.
Ijkon on israelitas xok mechteneuiliskej on tlen xkuajli nixpan nejua nemoTEKO.”
6 Ijki tej,
okinmijlij Moisés on israelitas,
niman cada tlayekanki de on tribus okuajkik ibastón.
Nochi,
onosentlajli majtlaktli uan ome bastones.
Niman no teuan ompa onkakta ibastón Aarón.
7 Kemaj Moisés okintlalij on bastones ixpan toTEKO ipan on tabernáculo* kampa onkaj on yekcaja.
8 Niman uajmostla ijkuak Moisés oyaj ipan on tabernáculo,
okitak itsmolinki ibastón Aarón yejuan kisa itech itribu* Leví.
On ibastón Aarón kipiyaya iitsmolinajlo,
ixochiyo,
niman hasta kipiyaya itlakyo yejuan itoka almendra.
9 Kemaj Moisés okinkixtij nochi on bastones yejuan onkatkaj ixpan toTEKO niman okintitij nochimej on israelitas.
Niman sakin*,
ijkuak on israelitas tlayekankej okitakej on tlen onochiu,
cada se okikuik ibastón.
10 Kemaj toTEKO okijlij Moisés:
“Oksejpa xtlali ibastón Aarón ixpan on yekcaja niman ompa nokauas para tlaixkuitijli* inka on xipanteitanij israelitas.
Niman ijkon xok nechixnamiktinemiskej niman xmikiskej.”