Ixipanteitalis Coré niman icastigo
16
Sen Levita itoka Coré,
ikoneu Izhar yejuan teuejkakoneu itech Coat,
niman okse yeyimej tlakamej teuejkakoneuan itech Rubén,
yejuan intoka katka Datán,
niman Abiram ikoneuan Eliab,
niman ikoneu Pelet yejuan itoka katka On,
2 xipan okitakej Moisés.
Iminuan yejuamej onosentlalijkej okse 250 israelitas.
Yejuamej kipiyayaj tekiuajyotl intech on israelitas niman tlayekankej katkaj.
Yejua ika,
nochimej on israelitas kintlakaitayaj.
3 Nochimej yejuamej onosentlalijkej para okixnamikej Moisés niman Aarón niman ijkin okinmijlijkej:
—Tejuamej hasta xok temechijyouiyaj.
Nikan tinochimej tiiyaxkauan toTEKO,
niman yejua nemi touan tinochimej.
Tla ijkon,
¿tline nemejuamej sanoyej nemoueyiliaj niman nemochiuaj ken sanoyej nenuejueyixtokej intech in israelitas yejuan ikoneuan toTEKO?
4 Ijkuak Moisés ijkon okak,
onotlakuantelkets niman onopachoj hasta ipan tlajli.
5 Kemaj okijlij Coré iminuan on yejuan iuan yayaj:
—Mostla kualkan temachistis toTEKO akinomej iyaxkauan.
Temachistis akinon tlatiochijtli yejuan yejua okitlapejpenij para uelis tlauentlalis.
6 In yejua nenkichiuaskej mostla para tikmatiskej:
Tejua Coré,
niman nochimej on yejuan nemij mouan,
mostla nenkuajkiskej nemopopochkontsitsiuan,
niman
7 xkintlalilikan tlixochtli.
Kemaj xkintemilikan kopajli niman xkintlalikan ixpan toTEKO.
On akin toTEKO kitlapejpenis,
yejua tikseliskej ken teyaxka* itech toTEKO.
Levitas,
yej nemejuamej sanoyej yonemoueyimatkej niman sa nentlayakapanauiyaj.
8 Kemaj Moisés okijlij Coré:
—¡Xnechkakikan,
levitas!
9 Para nemejuamej,
¿xueyi kijtosneki ika iminDios on israelitas omechtlapejpenij nemejuamej de intech on oksekimej israelitas,
niman mechkauilia nennemij nisiu itech yejua para nenkichiuaj on tekitl ipan itabernáculo toTEKO,
impampa on israelitas?
10 ToTEKO omitstlapejpenij tejua,
Coré,
niman nochimej mokniuan yejuan levitas para nennemiskej itech,
¿niman aman yej no nenkinekij nemochiuaskej tiopixkej?
11 ¿Tline nenkixnamikij Aarón?
Nemejuamej xnenkixnamikij Aarón,
yej nenkixnamikij toTEKO.
12 Kemaj Moisés otlanauatij ma kinotsatij Datán niman Abiram itelpochuan Eliab,
pero yejuamej ijkin otlanankilijkej:
—¡Ka,
tejuamej xtiaskej!
13 ¿Tejua tiknemilia xueyi kijtosneki ika otitechkixtij ipan on tlajli Egipto kampa sanoyej tlatlaki niman xitlaj* poliui,
para aman titechmiktis nikan ipan in xalpatlajkan?
¿Niman no tiknemilia xueyi kijtosneki ika tikneki timochiuas titoueyitekiuaj?
14 Tejua xotitechuikak ipan sen tlajli kampa sanoyej tlatlaki niman xitla poliui.
Nion xotitechmakak tlajli kampa tomijlaj yes,
nion kampa touvasyo yes.
¿Tikneki titechkajkayajtias tinochimej kenon yejuan xtlachaj?
Ka,
¡xtiaskej timitsontaskej!
15 Kemaj Moisés sanoyej okualan,
niman okijlij toTEKO:
—¡Maka xkinselili iminuen!
Nejua xitlaj* onikinkuilij yejuamej,
nion se poloko,
niman no xonikinchiuilij itlaj xkuajli nion se de yejuamej.
16 Kemaj Moisés okijlij Coré:
—Mostla xuiyan,
tejua niman motlajsojtlaikniuan,
ixpan toTEKO itech on tabernáculo.
Aarón no ompa nemis.
17 Cada se de nemejuamej xkiktikan nemopopochkon,
niman xkintlalilikan kopajli,
niman nenkintlaliskej ixpan toTEKO.
Tejua Coré niman Aarón no nenkiktiskej nemopopochkon,
niman nenkitlaliskej imintech on 250 popochkontin.
18 Kemaj uajmostla,
cada se okikuik ipopochkon,
okitlalilij tlixochtli niman okitemilij kopajli niman onotelkets iuan Moisés niman Aarón ixpan on tabernáculo* kampa nemi toTEKO.
19 Coré yokinsentlalijka nochimej on israelitas para kixnamikiskiaj Moisés iuan Aarón ompa ixpan on tabernáculo* kampa nemi Dios.
Kemaj ouajnonextij iueyilis toTEKO imixpan nochimej on israelitas.
20 Niman toTEKO okijlij Moisés niman Aarón:
21 —Xmejkuanikan imintech in xkuajkualtin tlakamej,
pampa amantsin nikinmiktis.
22 Pero Moisés iuan Aarón onotlakuantelketskej ixpan toTEKO niman onopachojkej hasta ipan tlajli,
niman okijtojkej:
—¡Ay toTEKO Dios!
Tejua akin tikmaka nemilistli nochi tlakatl,
¿tikualanis iminuan nochimej on israelitas ipampa itlajtlakol san se tlakatl?
23 Niman toTEKO okinankilij Moisés:
24 —Xkimijli nochimej on israelitas ma nejkuanikan intech iminkajkaluan Coré,
Datán niman Abiram.
25 Kemaj Moisés oyaj kampa nemi,
Datán niman Abiram,
niman iuan oyajkej on oksejkimej uejueyi tlayekankej israelitas.
26 Kemaj Moisés okinmijlij on israelitas:
—Xmejkuanikan itech iminkaj kal on tlakamej yejuan xkuajkualtin,
niman maka xkitskikan itlaj yejuan inyaxka para maka nenmikiskej ipampa imintlajtlakol.
27 On israelitas onejkuanijkej itech iminkajkal Coré,
Datán niman Abiram.
Datán niman Abiram majmaniyaj kampa ikalakiyan iminkajkal niman ompa iminuan nemiyaj nochimej infamilias.
28 Kemaj Moisés okijtoj:
—Aman nenkimatiskej ika toTEKO nechajtitlani para ma nikchiua nochi in tlajtlamach*,
niman ika xnikchiua san pampa nejua nikneki.
29 Tla in tlakamej mikij ikan mikilistli ken nochi tlakatl miki ijkuak yoajsik para mikis,
tla ijkon,
kijtosneki xtoTEKO onechajtitlan.
30 Pero tla toTEKO kichiuas itlaj yejuan xkaman nenkitayaj,
niman in tlajli tlapouis niman kintolos yejuamej iuan nochi on tlen kipiyaj,
niman nochimej tlalpachiuiskej ijkuak sanken* yoltokej,
tla ijkon,
nenkimatiskej ika on tlakamej yejuamej okualanijkej toTEKO.
31 Ijkuak Moisés otlan tlajtoua,
on tlajli kampa yejuamej nemiyaj ouajtetsayan,
32 niman okintoloj nochimej on tlakamej yejuan ompa nemiyaj iuan Coré,
niman nochi infamilias iuan nochi tlen kipiyayaj.
33 Nochimej yejuamej oxinitoj yoltokej ijtik on tlajli iuan nochi on tlen inyaxka katka,
niman sakin*,
on tlajli oksejpa onotsaku.
Ijkon opolijkej yejuamej intech on israelitas.
34 Ijkuak on israelitas yejuan ompa nemiyaj okkakej ken omojkatsajtsikej on yejuan ouetsitoj,
oontlatlaksajkej niman kijtouayaj:
“tiauij de nikan,
maka yej no techtolos in tlajli.”
35 No ijki,
toTEKO okuajtitlan tlitl niman okintlatij nochimej on 250 tlakamej yejuan kitlatiayaj kopajli.
36 Niman toTEKO okijlij Moisés:
37 “Xnauati Eleazar itelpoch Aarón para ma kinkixti nochimej on popochkontsitsimej yejuan onkatkaj ne kampa otlatlakej on tlakamej,
niman uejka ma kixiniti on tlixochtli yejuan sanken* onkaj ipan on popochkontsitsimej pampa on popochkontsitsimej tlatiochijtin.
38 On popochkontsitsimej de on tlakamej yejuan omikkej ipampa intlajtlakol,
tlatiochijtin onokajkej pampa okintekitiltijkej para kitlatiayaj kopajli nixpan.
Xkinkuikan niman xkinchijchiuakan láminitas para xpepepechokan ipan on tlaixpan*.
Ijkuak on israelitas kitaskej,
kelnamikiskej on tlen temojtij onochiu.”
39 On tiopixki Eleazar okisentlalij nochi on popochkontsitsimej de bronce yejuan okitekitiltijkej on tlakamej yejuan omikkej ipan on tlitl,
niman otlanauatij ma kinchijchiuakan laminitas para ma kimpepechouiliskej ipan on tlaixpan.
40 In laminitas yejuan pepechijtokej ipan on tlaixpan*,
nochiua ken sen tlaixkuitijli* para nochimej on israelitas kimatiskej ika yejuan xtekoneuan itech on tiopixki Aarón,
xuelis kitlatiskej kopajli ixpan toTEKO ipan on tlaixpan*.
Pampa tla kichiuaskej no tlatlaskej ken ipan onochiu Coré niman itlajsokaikniuan.
Niman nochi onochiu ken toTEKO okinauatij Eleazar itechkopa Moisés.
41 Niman uajmostla,
nochimej on israelitas opejkej kixnamikij Moisés iuan Aarón.
Niman ijkin okinmijlijkej:
—¡Nemejuamej ye nenkinmiktijtokej ikoneuan toTEKO!
42 Ijkuak nochimej on israelitas okinteyeualotoj Mosisés iuan Aarón para kinmixnamikiskej,
yejuamej ontlachixkej itech on tabernáculo* kampa Dios nemi.
Ompa on moxtli amanaman okitlapachoj on tabernáculo,
niman iueyilis toTEKO ouajnonextij.
43 Kemaj Moisés iuan Aarón oyajkej ixpan on tabernáculo* kampa nemi Dios.
44 Niman toTEKO okijlij Moisés:
45 —Xmejkuanikan intech on tlakamej,
pampa amantsin nikinmiktis.
Niman Moisés iuan Aarón onotlakuantelketskej niman onopachojkej hasta ipan tlajli ixpan toTEKO.
46 Kemaj Moisés okisijkaijlij Aarón:
—Xkuajkitetsi mopopochkontsin.
Xtlalili tlixochtli yejuan onkaj ipan on tlaixpan*,
niman xtlalili kopajli.
Niman amanaman xuiya kampa nemij on israelitas,
niman xtlajtlanili Dios ma kintlapojpoluili intlajtlakoluan,
pampa toTEKO sanoyej yokualan niman yokitlalij sen temojtij kokolistli yejuan yopeu kinmiktia.
47 Aarón okichiu on tlen Moisés okinauatij,
niman onotlaloj kampa nemiyaj on israelitas.
On temojtij kokolistli yejuan Dios okuajtitlan yopejka kinmiktia on israelitas.
Kemaj Aarón okitlatij on kopajli niman okitlajtlanilij Dios ma kitlapojpolui intlajtlakol on israelitas.
48 Kemaj Aarón onotelkets kampa tlantiaya on kokolistli intech on yejuan yomikkej niman on yejuan yoltokej.
Niman on temojtij kokolistli onoteltij.
49 Pero ijkuakon,
yomikkaj 14 mil 700 tlakamej aparte de on yejuan omikkej iuan Coré.
50 Ijkuak onoteltij on temojtij kokolistli,
Aarón onokuep kampa nemiya Moisés ipan ikalakiyan on tabernáculo* kampa nemi Dios.