Tlanauatiltin para uentli
15
ToTEKO okinots Moisés niman okijlij:
2 “Xkinnotsa on israelitas niman ijkin xkinmijli:
Ijkuak nenkalakiskej ipan on tlajli yejuan nemechmakas para ompa nenchantiskej,
nennechmakaskej uentin ken nejua nemechnauatis.
3 Noneki nennechmakaskej nejua nemoTEKO,
sen borrego,
sen chivo,
noso sen okichuakax ken se uentli yejuan nochi tlatla para nennechtlakaitaskej,
niman on iajuiyalis nechyolpaktis.
Ijkon nennechmakaskej tla onennechprometerouilijkej,
noso san nenkixtiaj ipan nemoyojlo,
noso ijkuak onkaj sen iluitl.
4 Yejuan nechmakas on uentli,
noneki iuan nechmakas ome kilo harina yejuan más kuajli niman kinelos iuan se litro aceite.
5 No ijki,
nechmakaskej se litro vino ken uentli para cada borreguito yejuan notoyauas ipan on tlaixpan*.
6 Iuan cada borrego,
nechmakaskej naui kilo harina yejuan más kuajli niman kineloskej iuan se litro uan tlajko aceite.
7 Niman no iuan nechmakaskej se litro uan tlajko vino yejuan kitoyauaskej ipan on tlaixpan*.
In yes sen uentli yejuan tlatla yejuan auiyak para nejua nemoTEKO.
8 Niman tla nechmakaskej sen becerro para sen uentli yejuan tlatla,
noso sen uentli de yoltlalilistli,
noso tla itlaj onechprometerouilijkaj nejua nemoTEKO,
9 iuan on becerro nechmakaskej sen uentli de chikuasen kilo harina yejuan más kuajli niman kineloskej iuan ome litro aceite.
10 Niman no nechmakaskej ome litro vino yejuan notoyauas ipan on tlaixpan*.
In yes sen uentli yejuan tlatlas niman yejuan ajuiyak yes para nejua.
11 Ijkin noneki nenkichiuaskej para cada okichuakax,
cada borrego,
cada borreguito,
noso cada chivo yejuan nechmakaskej.
12 Itech cada se yolki yejuan kuentlaliskej,
iuan nechmakaskej on tlajtlamach* ken kinamiki cada yolki.
13 Nochimej on israelitas ika onkaj kichiuaskej in tlanauatijli ijkuak nechmakaskej sen uentli yejuan tlatlas niman yejuan ijnekuistis ajuiyak nixpan nejua nemoTEKO.
14 ’Tla yakaj yejuan xchanej,
nemouan nemis san keski tonajli,
noso tla chanti nochipa nemouan,
kinekis nechmakas sen uentli yejuan tlatlas niman yejuan ijnekuistis ajuiyak,
ika onkaj kichiuas ken nemejuamej nenkichiuaj.
15 On israelitas niman on xchanejkej yejuan nemij nemouan san se ley kipiyaskej.
In sen ley yejuan nochipa onyas para nochimej on tatajtin niman inuejkakoneuan.
16 Sano yejua ley niman sa no yejua tlanauatijli yes para nemejuamej niman para on xchanejkej.”
17 ToTEKO okinots Moisés niman okijlij:
18 “Ijkin xkinmijli on israelitas:
Ijkuak yonenkalakej ipan on tlajli kampa nejua nemechuikas,
19 niman peuas nenkuaskej on tlakuajli yejuan tlaki ipan on tlajli,
noneki nenkixeloskej seki para nennechmakaskej ken sen uentli.
20 Ijkon ken nennechmakaj on trigo yejuan kemach kiteiniaj,
no ijki nennechmakaskej ken sen uentli on achtoj pan yejuan nenkichijchiuaskej ika on achtoj trigo yejuan kemach kiteiniaj.
21 In uentli,
nemejuamej niman nemouekakoneuan noneki nenkichiuaskej nochipa.
22-23 ’Tla saman nenkixkauaj seki on tlanauatiltin yejuan onikmakak Moisés para nenkichiuaskej nemejuamej niman nemouejkakoneuan,
ijkin nenkichiuaskej:
24 ’Tla yejuamej xkimatiyaj ika okichijkej on tlen xkuajli,
yejuamej nechuentlaliliskej sen becerro yejuan nochi tlatla para sen ajuiyalistli yejuan nechyolpaktis.
Niman iuan nechmakaskej on uentli de trigo noso cebada,
niman uentli de vino ken nejua nemoDios nitlanauatia.
No ijki,
nechmakaskej sen chivo para uentli ipampa on tlajtlakojli yejuan okichijkej.
25 Kemaj on tiopixki nechmakas on uentli para nikinkixtilis intlajtlakoluan nochimej on israelitas.
Niman ijkon nejua nikintlapojpoluis,
pampa yejuamej nechmakaj on uentli yejuan nochi tlatla,
niman sen uentli ipampa on tlajtlakojli yejuan okichijkej maski xkimatiyaj.
26 Nejua nikintlapojpoluis nochimej on israelitas niman nochimej on xchanejkej yejuan chantij nemouan,
pampa on tlen okichijkej xkimatiyaj ika xkuajli.
27 ’Pero tla sen tlakatl tlajtlakoua,
niman xkimatiya ika otlajtlakoj,
ijkuak kimatis on tlen okichiu,
kiuentlalis ipampa on tlajtlakojli sen chivita yejuan se xijkayotl.
28 On tiopixki kichiuas on tlauentlalilistli nixpan para nikixtilis itlajtlakol on tlakatl yejuan xkimatiya ika okichiu sen tlajtlakojli,
niman nejua niktlapojpoluis.
29 Sano yejua tlanauatijli onyas para on israelitas niman on yejuan xchanejkej yejuan chantij nemouan ijkuak tlajtlakoskej maski xkimatiyaj.
30 ’Pero tla sen tlakatl san kineki tlajtlakoua,
maski israelita noso yejuan xchanej,
niman yejua nechtlaueltia nejua nemoTEKO,
ika onkaj nenkixtiskej nemotech.
31 Xchiuakan ijkon pampa xokitlakaitak notlajtoltsin niman xokitlakamat notlanauatil.
Yejuan ika xkixtikan kampa nenchantij,
niman nochi itlajtlakol ipan uetsis.”
Castigo para on yejuan tekitis ipan on tonajli Sábado
32 Chika on isaelitas nemiyaj ipan on xalpatlajkan,
okinextijkej sen tlakatl yejuan kisentlaliaya kojtli* ipan on tonajli Sábado.
33 On yejuan okinextijkej on tlakatl okuikakej ixpan Moisés,
Aaron,
niman nochimej on israelitas.
34 Yejuamej san okitsakukej pampa xkimatiyaj tlinon kichiuiliskej.
35 Kemaj toTEKO okijlij Moisés:
“On tlakatl ika onkaj mikis.
Nochimej on israelitas ma kixtikan uejka de on campamento niman ompa ma kitemojmotlakan.”
36 Yejua ika,
on israelitas okixtijkej on tlakatl de on campamento.
Niman okitemojmotlakej hasta kaman okimiktijkej,
ijkon ken toTEKO okinauatij Moisés.
Intenchayajyoa intlakeuan on israelitas
37 ToTEKO okinots Moisés,
niman okijlij:
38 “Xkinnotsa on israelitas,
niman ijkin xkinmijli:
Nemejuamej niman nochimej nemouejkakoneuan nochipa xmochijchiuilikan tenchayajyotl para nenkisaloskej ipan itenkuelpachyo nemotlakeuan.
On tenchayajyotl nenkichijchiuaskej ikan ikpatl yejuan morado.
39 Ijkuak nenkitaskej on tenchayajyotl,
mechelnamiktis nochi notlanauatiluan yejuan nejua nemoTEKO yonemechmakak para maka nenkelkauaskej nenkintlakamatiskej.
Ijkon xnennechkauasnekiskej para nenkichiuaskej san tlen nenkinekiskej noso on tlen keleuiya nemotlalnakayo.
40 Ijkon nenkelnamikiskej niman nenkintlamatiskej nochi notlanauatiluan,
niman nennoyaxkauan* yeskej san para nejua,
nemoDios.
41 Nejua ninemoTEKO Dios,
yejuan onemechkixtij ipan on país Egipto para ninochiuas nemoDios.
Nejua nemoTEKO Dios nikijtoua.”