On israelitas xipan kitaj toTEKO
14
Kemaj nochimej on israelitas opejkej ajmankachokaj,
niman nochi yeuajli ochokakej.
2 Niman kemaj opejkej tlamach kijtouiliaj Moisés iuan Aarón.
Ijkin kijtouayaj:
“¡Más kuajli tla timikiskiaj Egipto,
noso tla timikiskiaj nikan ipan in xalpatlajkan!
3 ¿Tline otechajuikak toTEKO ipan in tlajli para timikiskej ipan guerra,
niman tosiuauan iuan tokoneuan esclavos yeskej intech totlauelikniuan?
Más kuajli yeskia oksejpa titokuepaskiaj Egipto.”
4 Niman opejkej kinojliaj:
“¡Ma tiktlalikan akinon techyekanas niman techuikas para titokuepaskej Egipto!”
5 Kemaj Moisés iuan Aarón onotlakuantelketskej imixpan nochimej on israelitas niman onopachojkej hasta ipan tlajli.
6 Niman Josué ikoneu Nun,
iuan Caleb ikoneu Jefone,
on yejuan no teuan okitatoj on tlajli,
onotlakentetsayankej para okiteititijkej ika sanoyej najmanaj,
7 niman okinmijlijkej nochimej on israelitas:
—¡On tlajli yejuan otikitatoj melauak sanoyej kuajli!
8 Tla toTEKO techiknelia,
yejua techpaleuis para tikalakiskej ipan on tlajli niman techmakas.
On sen tlajli kampa sanoyej tlatlaki niman xitlaj* poliui.
9 Pero maka ixko xejeuakan toTEKO,
nion maka xkinmakajsikan on tlakamej de on tlajli,
pampa tejuamej nimantsin tikintlaniskej.
Yejuamej xkipiyaj akinon kinmanauis,
niman tejuamej kemaj touan nemi toTEKO.
¡Maka xmomojtikan!
10 Niman maski ijkon okinmijlijkej nochimej,
on israelitas kinekiyaj kintemojmotlaskej.
Kemaj iueyilis toTEKO ouajnonextij imixpan nochimej on israelitas ipan on tabernáculo* kampa nemi Dios.
11 Niman toTEKO okijlij Moisés:
—¿Hasta kamanon xipan nechitaskej in israelitas?
¿Hasta kamanon ometlamatiskej de nejua,
maski yonikchiu sanoyej miyek milagros* imixpan?
12 Nejua nikintitlanilis sen temojtij kokolistli yejuan kinmiktis niman nikimpopolos.
Pero motech Moisés,
nikixtis sen nación yejuan más ueyi niman más kojtik xken yejuamej.
13 Pero Moisés okinankilij toTEKO niman okijlij:
p —Tejua ika nochi moueyi poder,
otikinkixtij in mokoneuan ne Egipto.
Ijkuak on egipcios kimatiskej ika otikinmiktij,
14 yejuamej kintlajtlajtouiliskej on cananeos.
Maski melauak on cananeos no ye kimatstokej ika tejua toTEKO tinemi touan,
niman ika tikmokauilia ma tikitakan moxayakatsin ijkuak titechnotsa.
Yejuamej no yokakkej ika on moxtli yejuan moyaxka* topan onkaj,
niman kenijki titechyekana ika on moxtli ipan tonajli niman ika sen tlimilinajli ipan yeuajli.
15 Tla tikinmiktis nochimej in israelitas san se tipan,
on naciones yejuan yokakkej de moueyilis kijtoskej:
16 “IminTEKO on israelitas xouel okinkalaktij ipan on tlajli yejuan onotlajtolmakaka ika kiminmakas.
Yejua ika,
okinmiktij ipan on xalpatlajkan.”
17 Aman tej,
noTEKO xteititi moueyi poder,
ken yotikijtoj tikchiuas.
Tejua tikijtoua ika
18 xnimantsin tikualani,
niman sanoyej ueyi motetlajsojtlalis.
Tejua tiktlapojpoluiya tlajtlakojli niman on xompayejyeualistli,
maski yotikijtoj ika cada tlajtlakojli ika onkaj notlaxtlauas.
Ijkuak sen tajtli tlajtlakoua,
ticastigaroua ipan ikoneuan,
ipan ixuiuan,
ipan ika okpa ixuiuan,
niman ipan ika yexpa ixuiuan.
19 Yejua ika tej,
pampa motetlajsojtlalis* sanoyej ueyi,
nimitstlajtlanilia,
xtlapojpolui intlajtlakoluan in mokoneuan israelitas ijkon ken miyekpa otikpix ijyouilistli iminuan,
desde ijkuak otikinkixtij ipan on país Egipto hasta aman.
ToTEKO kincastigaroua on israelitas
20 ToTEKO okijtoj:
—Kuajli tla ijkon,
nejua nikintlapojpoluiya ken tinechtlajtlanilia.
21 Pero ijkon ken melauak nejua ninemi,
niman noueyilis kitemiltia nochi in tlaltikpaktli,
ijkin ninotlajtolmaka:
22 Nion semej on yejuan okitakej noueyilis,
niman on uejueyi milagros* yejuan onikchiu ipan on país Egipto,
niman ipan on xalpatlajkan,
niman yonechtlatlatakej majtlaktlipa ipan on xalpatlajkan,
niman xkinekij kitlakamatiskej notlanauatiluan,
23 nion semej yejuamej xkitaskej on kuajli tlajli yejuan onikimijlij inuejkatajuan ika nikinmakas.
Nion semej yejuan onechchichijkej kitas on tlajli.
24 Pero notekitkau Caleb,
kemaj,
pampa yejua kipiya oksekneka iyojlo niman yejua onechtlakamat niman onechneltokak.
Yejua kemaj nikauilis ma kalaki ipan on tlajli yejuan okixmatito,
niman iuejkakoneuan ompa nochantiskej.
25 Maka xuiyan kampaka nemij on amalecitas niman cananeos ipan on ixtlauatl.
Yej mostla xmokuepakan para ipan on xalpatlajkan,
ipan on ojtli yejuan yau kampaka nokaua on mar Rojo.
26 ToTEKO okijlij Moisés iuan Aarón:
27 p —¿Hasta kamanon xok tlamach nechteneuiliskej in tlakamej xompayejyeuamej?
Yonikak nochi on tlen xkuajli nechijtouiliaj.
28 Xkimijliti ika ijkin nikijtoua:
“Sano nejua,
nemoTEKO ninotlajtolmaka ipampa nonemilis,
ika nemechchiuilis on tlen onikak nenkijtouaj.
29 Nochimej on yejuan kipiyayaj sempoajli xipan para tlakpak,
yejuan okinmijkuilojkaj ipan on achtoj tlapoualistli,
niman tlamach yonechijtouilijkej,
mikiskej,
niman iminmikatlalnakayo xintoskej ipan in xalpatlajkan.
30 Nion nensemej xnenkalakiskej ipan on tlajli yejuan onikijtoj ika nochi noyojlo nemechmakas.
San uelis kalakis Caleb,
itelpoch Jefone,
niman Josué,
itelpoch Nun.
31 Pero nemokoneuan yejuan onenkijtojkej uetsiskej inmak nemotlauelikniuan,
nikinuikas ipan on tlajli yejuan nemejuamej onenkichichijkej,
para yejuamej kiseliskej on kuajli tlajli.
32 Nemomikatlalnakayo xintoskej nanika ipan in xalpatlajkan
33 kampa nemokoneuan nejnentinemiskej 40 xipan ikan tlajyouilistli ken tlajpixkej.
Ijkon yejuamej kitlaxtlauaskej nochi nemotlajtlakoluan hasta kaman nenmikij nemochimej* nemejuamej ipan in xalpatlajkan.
34 Nemejuamej onenkipixkej 40 tonajli para onentlajtlachatoj ipan on tlajli.
Aman no nennemiskej 40 xipan para nenkitlaxtlauaskej nemotlajtlakoluan,
se xipan por cada tonajli.
Ijkon nenkimatiskej ken machisti ika onemochijkej notlauelikniuan.”
35 Nejua nemoTEKO ijkin nikijtoua:
Ijkin nikinchiuilis nochimej in tlakamej xompayejyeuamej yejuan san sekan onechixnamikkej.
Ipan in xalpatlajkan tlamis nochimej mikiskej.
Omikkej on majtlaktlimej ichtakatlachixkej yejuan otlakajkayajkej
36 On tlakamej yejuan Moisés okintitlanka para ma kiichtakaitatij on tlajli Canaán,
ouajnokuepatoj niman okiteijlijkej ika sanoyej temojtij ken okitakej.
Niman on israelitas,
ijkuak ijkon okakkej,
no tlamach okijtojkej.
37 Yejua ika,
toTEKO okititlan impan on tlakamej yejuan oichtakatlajtlachatoj sen temojtij kokolistli niman yejuamej omikkej.
38 De nochimej on yejuan oichtakatlajtlachatoj,
Josué niman Caleb san yejuamej xomikej.
On israelitas okintlankej ne Horma
39 Ijkuak Moisés okinmijlij on israelitas nochi on tlen toTEKO okijtoj,
nochimej sanoyej onajmankej.
40 Niman uajmostla saniman kualkan,
otlejkokej ipan on tepemej de on región,
niman okijtojkej:
—Melauak otitlajtlakojkej,
pero aman ye nikan tinemij.
Tiauij ipan on tlajli yejuan toTEKO otechijlij techmakas.
41 Pero Moisés okinmijlij:
p —¿Tline xipan nenkitaj on tlen kijtoua toTEKO?
¡On tlen nenkinekij nenkichiuaskej xkuajli kisas!
42 Maka xuiyan,
pampa toTEKO xnemouan nemi,
niman mechtlaniskej nemotlauelikniuan.
43 On amalecitas niman on cananeos ompa mechchixtokej para mechuijsokiskej,
niman mechmiktiskej.
Niman pampa nemejuamej yonenkitlalkauijkej toTEKO,
yejua xok nemouan nemi.