On tlakamej yejuan oichtakatlajtlachatoj Canaán
13
ToTEKO okinots Moisés niman okijlij:
2 “Xkintitlani tlakamej para ma ichtakatlajtlachatij kenijki tlaonkaj ipan on país Canaán yejuan nejua nemechmakas.
Xtitlani se tlakatl yejuan tlayekanki de cada tribu*.”
3 Moisés okintitlan on tlakamej desde on xalpatlajkan Parán ijki ken toTEKO okinauatij.
Nochimej on tlakamej tlayekankej katkaj intech on israelitas.
4-15 Ijkin imintoka katka on tlayekankej de cada tribu* yejuan oyajkej:
| Tribu | Tlayekanki |
| Rubén | Samúa, itelpoch Zacur |
| Simeón | Safat, itelpoch Horí |
| Judá | Caleb, itelpoch Jefone |
| Isacar | Igal, itelpoch José |
| Efraín | Oseas, itelpoch Nun |
| Benjamín | Palti, itelpoch Rafú |
| Zabulón | Gadiel, itelpoch Sodi |
| Manasés, | Gadi, itelpoch Susi |
| Dan, | Amiel, itelpoch Gemali |
| Aser | Setur, itelpoch Micael |
| Neftalí | Nahabí, itelpoch Vapsi |
| Gad | Geuel, itelpoch Maqui. |
16 In yejua intoka on tlakamej yejuan Moisés okintitlan ma ichtakatlajtlachatij ipan on tlajli.
(Moisés okitokayopatlak Oseas itelpoch Nun,
niman okitokayotij Josué.)
17 Ijkuak Moisés okintitlan ma ichtakatlajtlachatij ipan on tlajli de Canaán,
okinmijlij:
—Xuiyan ipan on xalpatlajkan Néguev niman kemaj xuiyan impan on tepeyoj.
18 Xkitakan kenijki onkaj on tlajli niman xkitakan tla on tlakamej ompa chanejkej nesij kojtikej,
niman tla sanoyej miyekej.
19 Xkitakan kenijki onkaj on tlajli,
tla kuajli tlatlaki,
noso ka.
Xkitakan tla on uejueyikalpanmej yeualtsakutokej ikan tepantli.
20 Xkitakan tla kuajli on tlajli niman miyek tlajtlamach* noskaltia ompa,
noso ka.
Xkitakan tla onkaj miyek kojtin,
noso ka.
Maka xmomojtikan.
Xkuajkikan achijtsin on tlen tlaki ompa ne.”
Yejua in,
onochiu ijkuak kitekij uvas yejuan achtoj tlaki.
21 Ijkon tej,
on majtlaktli uan ome tlakamej oyajkej niman oichtakatlajtlachatoj nochiuiyan ipan on tlajli desde ipan on xalpatlajkan Zin,
kampaka Sur,
hasta kampa itoka Rehob norte ika,
nisiu kampa itoka Hamat.
22 Okalakej ipan on xalpatlajkan itoka Néguev niman oajsikej hasta on kalpan Hebrón.
Ompa ye chantiyaj Ahimán,
Sesai niman Talmai.
Nochimej yejuamej katkaj iuejkakoneuan Anac.
(On kalpan Hebrón opeu kichantij chikome xipan achtoj xken on kalpan Zoán yejuan onkaj ipan on país Egipto.)
23 Niman oasikej hasta ipan on ixtlauatl itoka Escol itechika on ayajtok.
Niman ompa okitekej sen ueyi imatlakyo uvas,
yejuan sanoyej ueyi katka,
hasta okipilojkej ipan sen kojtli* niman omemej tlakamej okechpanojtiajkej.
Niman no okisentlalijkej granadas niman higos yejuan ompa tlakiya.
24 On israelitas okitokayotijkej on ixtlauatl Escola,
pampa ompa okitekej sen ueyi imatlakyo uvas.
25 Sakin,
ijkuak otlankej kitaj on tlajli,
ipan 40 tonajli onokuepkej
26 ne Cades ipan on xalpatlajkan Parán kampa nemiyaj Moisés,
Aarón niman nochimej on israelitas.
Kemaj yejuamej okintlajtlajtouilijkej nochi on tlen okitakej,
niman okintitijkej on tlakyotl yejuan onkaj ipan on tlajli.
27 Niman ijkin okijlijkej Moisés:
—Otiajkej ipan on tlajli kampa otitechtitlan.
Melauak ipan on tlajli sanoyej tlatlaki niman xitlaj* poliui.
Niman in yejua seki itlakyo yejuan kitlakitia on tlajli.
28 Pero on tlakamej yejuan ompa chantij nesij sanoyej kojtikej,
niman on uejueyikalpanmej sanoyej uejueyimej,
niman kuajli yeualtsakutokej ikan tepantli.
Niman no ompa otikintakej iuejkakoneuan Anac yejuan sanoyej uejueyi tlakamej.
29 Ipan iueyitlalpan Néguev,
chantij on amalecitas,
niman ipan on región kampa tepeyoj chantij on heteos,
jebuseos niman on amorreos.
Niman itenko on mar Mediterráneo niman itenko on río Jordán chantij on cananeos.
30 Kemaj Caleb okichiu para maka sa ma nauatikan on israelitas yejuan nemiyaj ixpan Moisés,
niman okinmijlij:
—¡Tiauij!
¡Ma tiktoyaxkatitij on tlajli!
¡Tejuamej tiueliskej tiktoyaxkatiskej!
31 Pero on oksekimej yejuan oyajkaj iuan,
okijtojkej:
—Ka,
tejuamej xtiueliskej tikinuijsokiskej on tlakamej,
pampa yejuamej nesi sanoyej kojtikej xken tejuamej.
32 Niman yejuamej kimijliayaj on israelitas ika on tlajli kampa otlajtlachatoj sanoyej xkuajli.
Ijkin okijtojkej:
—On tlajli yejuan otikichtakaitatoj xkuajli tlatlakitia.
Yejua ika,
mikij on tlakamej yejuan ompa chantij.
No ijki,
nochimej on tlakamej yejuan otikintakej sanoyej uejueyi tlakamej.
33 No ijki,
otikintakej ompa iuejkakoneuan Anac yejuan sanoyej uejueyi tlakamej niman kojtikej.
Imixpan titomatiyaj ken tichapolimej,
niman yejuamej no ijki techitayaj.