María niman Aarón tlamach okijtouilijkej Moisés
12
María niman Aarón opejkej tlamach kijtouiliaj Moisés,
pampa Moisés ononamiktij iuan sen siuatl yejuan ualeua ipan on país Etiopía.
2 Niman no okijtojkej:
“ToTEKO xsan iuan Moisés ueli tlajtoua.
Yej touan tejuamej no ueli tlajtoua.”
Niman toTEKO okak tlinon kijtouiliayaj Moisés.
3 (Sa ye melak Moisés sen tlakatl yejuan sanoyej yolyemanki* katka xken yakaj okse ipan in tlaltikpaktli.)
4 Yejua ika,
toTEKO okijlij Moisés,
Aarón niman María:
“Xkisakan ipan on campamento niman xuiyan nemejuamej yeyimej ipan on tabernáculo* kampa ninemi.”
Niman on yeyimej oyajkej ipan on tabernáculo.
5 Kemaj toTEKO ouajtemok ipan sen tilauak moxtli niman onotelkets kampa ikalakiyan on tabernáculo.
Kemaj okominnots Aarón niman María,
niman ijkuak yejuamej ononisiuijkej,
6 toTEKO okinmijlij:
“Xkakikan in tlen nemechijlis:
Ijkuak nemechtitlanilia sen tiotlajtojketl para nemis nemouan,
nejua nemoTEKO,
ninonextia itech yejua ipan sen temiktli,
noso niknotsa ipan sen tetlatlachalistli ken itemikpan.
7 Pero iuan notekitkau Moisés xijki nikchiua.
Yejua kemaj melauak kuajli iuan niknopiyalia noyojlo,
niman yejua más kuajli notekitkau de nochimej on notekitkauan.
8 Niman iuan yejua ninokaki niman iuan ninota ijkuak iuan nitlajtlajtoua.
Niman tla ijkon,
yejua iuan kuajli ninota,
¿tline xnemokamaijmatij para tlamach nenkijtouilia?”
9 ToTEKO sanoyej okualan iminuan niman oyaj.
10 Ijkuak san ouajnejkuanij on moxtli ipan on tabernáculo,
María nimantsin ipan ouajlaj on kokolistli itoka lepra,
niman itlalnakayo onokau istak ken itlaj nieve.
Ijkuak Aarón ouajnomalakachoj para okontak María,
okitak ika yokajsik on temojtij kokolistli itoka lepra.
11 Niman okijlij Moisés:
“Xtechikneli noteko.
Maka xtechcastigaro ipampa in totlajtlakol.
Melauak xotitonemilijkej,
ijkuak tlamach otikijtojkej.
12 Maka xkauili María ma nokaua ken se konetsintli yejuan san uetsi,
yejuan ijkuak uajkisa ijtik inanaj ikan itlalnakayo,
pijpilichtik.”
13 Kemaj Moisés ijkin okitlajtlanilij toTEKO:
“¡Ay noTEKO Dios,
nimitsiknotlajtlanilia xkikneli,
niman xpajti!”
14 Niman toTEKO okinankilij:
“Tla itataj kichijchaskia ixko,
María ikan ipinauis niyanaskia chikome tonajli.
Tla ijkon,
xkixtikan uejka de in campamento chikome tonajli.
Niman ijkuak tlamis on chikome tonajli,
oksejpa uelis nokuepas.”