ToTEKO kimijlia on israelitas ika kinmakas nakatl
11
Se tonajli on israelitas opejkej tlamach kijtouiliaj toTEKO pampa tlamach impan nochiuaya.
Ijkuak toTEKO okinkak,
sanoyej okualan,
niman okichiu para ma tlikiaui ipan on kajkaltin iyeualkan on campamento de on israelitas.
2 Kemaj nochimej on israelitas okitsajtsilitoj Moisés para ma kimpaleui.
Niman Moisés okiknotlajtlanilij toTEKO impampa yejuamej,
kemaj on tlitl oseu.
3 Yejua ika,
ompa okitokayotijkej Tabera pampa ompa on tlitl de toTEKO okauan iminpan yejuamej.
4 Intech on israelitas yononelojkaj xchanejkej tlakamej yejuan tlajtlaluis ualeuayaj,
niman xkuajli nouikayaj.
Yejuamej xompayejyeuamej katkaj.
San kinejnemilijtikatkaj kikuaskej nakatl.
Niman ika on israelitas ijkon okakkej no opejkej chokaj niman kijtouayaj:
“¡Melauak,
kuajli yeskia tla tikuaskiaj nakatl!
5 Tikelnamikij on michimej yejuan tikinkuayaj ne Egipto,
niman xtikintlaxtlauayaj.
Niman no tikuayaj pepinos,
melones,
puerros,
xonakatl niman ajo.
6 Pero aman nikan tikajkamateuaktokej,
niman xitlaj* okse tikpiyaj,
yej san in maná yejuan nochipa tikuajtokej.”
7 On maná xiniya ken iteyo cilantro,
niman nesiya kostik ken ikopajlo itlaj okotl.
8 Niman machistiya ken memelatsitsimej de harina yejuan tlanelojli iuan aceite.
Nochimej konsentlaliayaj,
niman kemaj kuechouayaj noso san kitetsotsonayaj,
niman kikxitiayaj noso ika kichijchiuayaj ken itlaj pan.
9 Tlayoua,
ijkuak xiniya ajuichtli ipan on campamento,
no xiniya on maná.
10 Moisés okak ika on israelitas iuan infamilias chokayaj inkiauatempan.
ToTEKO sanoyej okualan,
niman Moisés no xokuelitak,
11 niman Moisés okijlij toTEKO:
—¿Tline* tinechchiuilia in tlen xkuajli,
nejua yejuan nimotekitkau?
¿Tlinon xkuajli tikneki tinechchiuilis ika tinechinmamaltia nochimej in tlakamej?
12 ¿Tlen nejua nitajtli noso nejua ninantli inka yejuamej ika tinechijlia ma nikinnapalojtiu ken kokonej yejuan chichij,
hasta nikinmajxitis ipan on tlajli yejuan otikinmijlij inuejkatajuan ika tikinmakas?
13 ¿Kanon uelis nikuis nakatl para kikuaskej nochimej in israelitas?
Nochimej notech uajchokatiuij niman nechijliaj:
“Xtechmaka nakatl para tikuaskej.”
14 Nejua noselti xniuelis nikinnomamaltis in israelitas.
In sen ueyi tlamamajli yejuan sanoyej yetik para nejua.
15 Tla ijkon tinechchiuilis,
más kuajli para xnechmikti tla melauak tinechtlajsojtla.
Ijkon xok nikpiyas tlinon nechpajsolos.
16 Kemaj toTEKO okinankilij:
—Xnechinsentlalili 70 uejueyixtokej tlayekankej yejuan tikmatis ika kuajli tlayekanaj intech on israelitas,
niman xkinuika ipan on tabernáculo* kampa ninemi,
niman ompa ma nechchakan mouan.
17 Nejua nitemos niman ompa nimitsnotsas.
Niman nikuis seki moespíritu yejuan tikpiya niman nikinmakas yejuamej.
Kemaj yejuamej ueliskej mitspaleuiskej ipan on tekitl de on israelitas.
Niman ijkon xok titekitis moselti.
18 Aman xkinnauati on israelitas:
“Ma nochipauakan nixpan,
pampa mostla kikuaskej nakatl.
Nejua nemoTEKO yonemechkak ika nenchokaj niman nenkijtouaj:
‘¡Más kuajli ijkuak tinemiyaj Egipto!’”
Yejua ika,
aman nejua nemechmakas nakatl para nenkuaskej.
19 Niman xnenkuaskej san se tonajli,
nion ome tonajli,
nion makuijli tonajli,
nion majtlaktli tonajli,
nion sempoajli tonajli.
Ka.
20 Nenkuaskej nakatl nochi se metstli hasta uajkijkisas nemoyakak niman nenkitlajyelitaskej.
Ijkon nochiuas pampa onennechixnamikkej nejua nemoTEKO yejuan ninemi nemonuan,
niman onenchokakej nixpan,
niman onenkijtojkej:
“¿Hasta tline otikiskej Egipto?”
21 Kemaj Moisés okinankilij:
—San on tlakamej yejuan uajlauij nouan tlapoualtin 600 mil niman,
¿tikijtoua titechmakas nakatl para tikuaskej nochi se metstli?
22 ’¿Kanon nemij sanoyej miyekej borregos niman uakaxtin yejuan uelis kinmiktiskej niman kimajxilis nochimej?
Maski tikinmakaskia nochi on michimej yejuan nemij ipan mar,
xkimajxiliskia.
23 Pero toTEKO okinankilij:
—¿Tlen tikuitia semi xnikpiya nopoder?
Aman tikitas tla nochiuas noso xnochiuas on tlen yonikijtoj.
On 70 uejueyitlayekankej opejkej tlajtouaj ken tiotlajtojkej
24 Moisés okis niman okinmijlij on israelitas on tlen toTEKO Dios okijlij.
Kemaj okinsentlalij 70 uejueyitlayekankej de on israelitas niman okintetelkets iyeualkan on tabernáculo.
25 Kemaj toTEKO ouajtemok ipan on moxtli niman otlajtoj iuan Moisés.
Niman seki okikuik on espíritu yejuan kipiyaya Moisés niman okinmakak on 70 uejueyitlayekankej.
Niman ijkuak on espíritu impan ouajlaj on uejueyitlayakankej,
opejkej tlajtouaj ken tiotlajtojkej.
Pero in xokaman oksejpa ijki onoxhiu.
26 On omemej tlakamej,
Eldad niman Medad yejuan uejueyixtokej tlakamej katkaj intech on 70 yejuan toTEKO no okintlapejpenij,
xokinekej oyajkej ipan on tabernáculo,
yej onokajkej ipan on campamento.
Pero on espíritu no ouajlaj impan,
niman opejkej tlajtouaj ken tiotlajtojkej ne kampa nemiyaj ipan on campamento.
27 Kemaj sen telpochtli onotlaloj okijlito Moisés:
—¡Eldad niman Medad tlajtlajtouaj ken tiotlajtojkej ne nepa ipan on campamento!
28 Kemaj Josué,
itelpoch Nun yejuan desde konetl kipaleuiyaya Moisés,
okijlij:
—NoTEKO Moisés,
maka xkinkauili ma tiotlajtokan.
29 Pero Moisés okinankilij:
—¿Tlen tichauati noka nejua?
Yej,
sanoyej kuajli yeskia tla toTEKO kinmakaskia iespíritu nochimej on israelitas niman nochimej tiotlajtoskiaj.
30 Kemaj Moisés niman on uejueyitlayekankej de Israel,
oyajkej ipan on campamento.
ToTEKO okuajtitlan sanoyej miyek tektototl
31 ToTEKO okichiu para ma uajla sen ajakatl sanoyej chikauak yejuan oualeu itechika on mar,
niman okinualantikis sanoyej miyek tektotomej niman okinuikak ipan on campamento niman nochiuiyan iyeualkan.
Niman on tektotomej sa tlaltech patlantinemiyaj ken kanaj se metro ika tlakpak.
On tektotomej nemiyaj nochiuiyan niman uejka ajsitoyaj,
ken kanaj se tonajli kuikaskia tla yakaj kiyeualoskia on campamento.
32 Nochi on tonajli,
on yeuajli niman uajmostla nochi se tonajli,
on israelitas okinsentlalijkej on tektotomej.
Yejuan xmás okisentlalij,
okisentlalij kanaj ome tonelada de tektotomej.
Niman opejkej kinuatsaj iyeualkan on campamento.
33 Pero ijkuak on israelitas kemach peuaya kikuaj innakayo on tektotomej,
toTEKO sanoyej okualan iminuan niman okinuajtitlanilij sen temojtij kokolistli niman okichiu para ma mikikan miyekej.
34 Yejua ika,
ompa okitôkayotijkej Kibrot-hataavaa,
pampa ompa okintokakej miyekej yejuan sanoyej kuasnekiyaj nakatl.
35 Niman on israelitas onejkuanijkej de Kibrot-hataava niman oyajkej hasta Hazerot niman ompa onokajkej.