On tlapitsaltin de plata
10
ToTEKO okinots Moisés niman okijlij:
2 “Xchijchiua ome tlapitsajli de plata yejuan tlatetsotsontli ikan martillo.
Ika on tlapitsaltin tikinnotsas on israelitas para ma nosentlalikan,
niman no para ma kimatikan ijkuak notekpanaskej para kisaskej.
3 Ijkuak kimpitsaskej on ome tlapitsaltin,
nochimej on israelitas kimatiskej ika nosentlaliskej mixpan,
itech ikalakiyan on tabernáculo* kampa nejua ninemi.
4 Pero ijkuak kipitsaskej san se tlapitsajli,
san nosentlaliskej yejuan tlayekanaj ipan cada tribu*.
5 Ijkuak chikauak kimpitsaskej niman tsajtsiskej,
kistiaskej on yejuan onochachantijkej kampaka ikisayan tonaltsintli de on tabernáculo.
6 Niman ijkuak kipitsaskej ika okpa,
notekpanaskej para kistiaskej on yejuan onochachantijkej kampaka sur de on tabernáculo.
Ijkuak tlapitsaskej chikauak niman tsajtsiskej,
kijtosneki ika ye kisaskej.
7 Pero ijkuak kinyemankapitsaskej on tlapitsaltin,
on yes para ma nosentlalikan,
on israelitas.
8 San on tiopixkej,
yejuan itelpochuan Aarón,
ueliskej kimpitsaskej on tlapitsaltin.
In yes para nemejuamej sen ley para nochipa.
9 ’Ijkuak nemotlauelikniuan mechuijsokiskej kampa nenchantij ne ipan nemoueyitlalpan,
niman nemejuamej nonekis nenkinmixnamikiskej,
xkimpitsakan chikauak on tlapitsaltin niman chikauak xtsajtsikan.
Ijkon nejua nemoTEKO Dios nemechelnamikis,
niman nemechmanauis intech nemotlauelikniuan.
10 No ijki,
xkimpitsakan on tlapitsaltin ijkuak onyas pakilistli,
ken ijkuak onyas iluitl,
noso ijkuak nesi yenkuik metstli,
ijkuak nenkitemakaj uentli yejuan tlatla,
noso uentli de yoltlalilistli nouan.
Ijkon nejua yejuan nemoTEKO Dios nemechelnamikis.”
On israelitas okiskej Sinaí
11 Ipan on sempoajli tonajli de on ika ome metstli ijkuak ye kipiyayaj ome xipan ika on israelitas okiskej Egipto,
on moxtli onokuiteu de ikuapan on tabernáculo* kampa onkaj on pacto*.
12 On israelitas okiskej ipan on xalpatlajkan itoka Sinaí.
Kemaj on moxtli onoteltij ipan on xalpatlajkan itoka Parán.
13 Nochi onochiu ken toTEKO okinauatij Moisés.
14 On yeyimej tribus yejuan kitokayaj ibandera Judá,
yejua achtoj grupo yejuan kisaya.
Niman tlapeualtiaya itribu* Judá,
itlayekankau katka Naasón,
itelpoch Aminadab.
15 Kemaj tetokaya itribu* Isacar.
Itlayekankau katka Natanael,
itelpoch Zuar.
16 Sa ika nochi yaya itribu* Zabulón,
niman itlayekankau katka Eliab,
itelpoch Helón.
17 Kemaj okixoxotonijkej on tabernáculo,
niman ikoneuan Gersón iuan ikoneuan Merari yejuan kipiyayaj on tekitl para kiktiskej on tlajtlamach*,
opejkej nejnemij.
18 Kemaj kintokayaj on yeyi tribus yejuan kiktiyaj ibandera Rubén.
Itlayekankau itribu* Rubén katka Elisur,
itelpoch Sedeur.
19 Kemaj tetokaya itribu* Simeón.
Itlayekankau itribu* Simeon katka Selumiel,
itelpoch Zurisadai.
20 Sa ika nochi yaya itribu* Gad.
Itlayekankau itribu* Gad katka Eliasaf,
itelpoch Ruel.
21 Kemaj ompa tetokayaj ikoneuan Coat yejuan kiktiyaj on tlajtlamach* tlatiochijtli.
Ijkuak yejuamej ajsiyaj kampa noteltiayaj,
kinextijtatajsiyaj yotlan kitelketsaj on tabernáculo.
22 Kemaj kintokayaj on yeyi tribus yejuan kiktiyaj ibandera Efraín.
Itlayekankau itribu* Efraín katka Elisama,
itelpoch Amiud.
23 Kemaj tetokaya itribu* Manasés.
Itlayekankau itribu* Manasés katka Gamaliel,
itelpoch Pedasur.
24 Sa ika nochi yaya itribu* Benjamín.
Itlayekankau itribu* Benjamín katka Abidán,
itelpoch Gedeoni.
25 Sa ika nochi,
tetokayaj on yeyi tribus yejuan kiktiyaj ibandera Dan.
Yejuamej kincuidarojtiayaj nochi on oksekimej tribus.
Itlayekankau itribu* Dan katka Ahiezer,
itelpoch Amisadai.
26 Kemaj yaya itribu* Aser.
Itlayekankau itribu* Aser katka Pagiel,
itelpoch Ocrán.
27 Sa ika nochi yaya itribu* Neftalí.
Itlayekankau itribu* Neftalí katka Ahira,
itelpoch Enán.
28 Ijkin notokatiayaj itribus on israelitas ijkuak kisayaj para yayaj oksekan.
Moisés okinots icuñado para iminuan ma uiya
29 Se tonajli Moisés okijlij Hobab icuñado,
yejuan itelpoch Reuel niman yejuan ualeua Madián:
—Tejuamej tiauij ipan on tlajli yejuan toTEKO yokijtoj techmakas.
Xuajla touan,
niman kuajli titouikaskej mouan,
pampa toTEKO yotechprometerouilij kipiyas kuajli iyojlo touan tejuamej tiisraelitas.
30 Pero Hobab okinankilij:
—Ka,
nejua xnias.
Yej ninokuepas ipan notlal kampa nemij nofamilias.
31 Pero Moisés oksejpa okijlij:
—Maka xtechkajteua.
Tejua kuajli tikixmati nochi in ojtli ipan in xalpatlajkan,
niman tikmati kanon kuajli titokauaskej.
Xuajla touan niman xtechyekana.
32 Tla tiuajlas touan,
nochi on tlen kuajli yejuan toTEKO techmakas,
tejuamej no timitsmakaskej.
33 Ijkon tej,
okiskej Sinaí,
itech itepeu toTEKO niman onejnenkej yeyi tonajli.
On yekcaja yejuan ijtik yaya ipacto* toTEKO,
kinyekantiaya niman kintejtemouilijtiaya kanon noseuiskej.
34 Ipan tonajli ijkuak nejnemiyaj,
on moxtli yejuan toTEKO okinmakak yaya inkuapan.
35 Ijkuak kuiteuaj on yekcaja para yayaj,
Moisés kijtouaya:
“¡Xmokuiteua toTEKO!
¡Xchiua para ma nochojchoyauakan motlauelikniuan!
¡Xchiua para ma cholojteuakan ijkuak mitsitaskej on yejuan mitstlauelitaj!”
36 Pero ijkuak kiteltiayaj on yekcaja,
Moisés kijtouaya:
“¡ToTEKO,
xuajla totech tejuamej mokoneuan
yejuan sanoyej timiyekej hasta xakaj uelis techpouas!
¡Nikan xmokaua touan!”