Kenijki kichiuaskej on iluitl Pascua
9
Ome xipan sakin*,
ijkuak on israelitas okiskej Egipto,
ipan on achtoj metstli de on xipan,
toTEKO okinots Moisés ipan on xalpatlajkan Sinaí,
niman okijlij:
2 “On israelitas noneki kichiuaskej on iluitl itoka Pascua ipan on tonajli yejuan onemechnauatij.
3 Nenkichiuaskej ijkuak tlapoyajkan ipan on 14 tonajli de in metstli.
Nenkitokaskej on tlanauatijli ken tlajkuilolnestikaj,
ijkon ken onemechnauatijtikaj ijki nenkichiuaskej.”
4 Kemaj Moisés okinnauatij on israelitas ma kichiuakan on iluitl Pascua.
5 Ompa ipan on xalpatlajkan Sinaí ijkuak tlapoyajkan ipan on majtlaktli uan naui tonajli de on achtoj metstli,
yejuamej okichijkej on iluitl ijki ken toTEKO okinauatij Moisés.
6 Pero nemiyaj sekimej tlakamej yejuan xchipajkej katkaj ixpan toTEKO,
pampa okimatokakej sen mikatsintli,
niman ijkon xouelkej okichijkej on iluitl Pascua ipan on tonajli.
Yejua ika,
yejuamej oyajkej para okitatoj Moisés niman Aarón ipan sano yejua on tonajli,
7 niman okijlijkej Moisés:
—Tejuamej otikmatokakej sen mikatsintli,
niman yejua ika xtichipajkej tinemij ixpan toTEKO.
¿Tla ijkon,
xuelis tiktemakaskej sen uentli ixpan toTEKO ipan on tonajli ijkuak nochimej on israelitas kichiuaj on iluitl Pascua?
8 Moisés okinnankilij:
—Xchakan hasta toTEKO ma nechijli tlinon uelis nenkichiuaskej nemejuamej.
9 ToTEKO okinots Moisés niman okijlij:
10 “Ijkin xkinmijli on israelitas:
Nemochimej nemejuamej niman nemouejkakoneuan noneki nenkichiuaskej on iluitl Pascua para nejua notlakaitalis.
On yejuan xchipajkej nemij nixpan pampa okimatokajkej sen mikatsintli,
noso on yejuan nemij uejka ipan ojtli ijkuak nochiua on iluitl,
yejuamej uelis sakin* kichiuaskej on iluitl.
11 Kichiuaskej ijkuak tlapoyajkan ipan on 14 tonajli ipan on ika ome metstli.
Noneki kikuaskej on borreguito iuan xojtli yejuan chichik,
niman pan yejuan xkipiya tlaxokolilistli*.
12 Niman xitlaj* nokauas para uajmostla,
niman xkipostekiliskej nion se iomiyo on borreguito.
Xchiuakan on Pascua ken onemechnauatij nenkichiuaskej.
13 Pero tla yakaj,
yejuan chipauak nixpan noso xkanaj yau ipan ojtli,
san xkinekis kichiuas on iluitl Pascua,
noneki nenkixtiskej ipan nemokalpan.
Ijkon nenkichiuiliskej,
pampa xonechmakak on uentli ipan on tonajli ijkuak nejua nemoTEKO onemechnauatij.
Tla ijkon,
kiselis on castigo ipampa itlajtlakol.
14 ’Tla on yejuan xchanejkej yejuan nemij nemouan kinekij kichiuaskej on Pascua,
yejuamej ika onkaj kitlakamatiskej on tlanauatijli yejuan yonemechnauatij.
Onkaj san se tlanauatijli para on israelitas,
niman para on yejuan xchanejkej.”
On moxtli yejuan onotlalij ikuapan itabernáculo toTEKO
15 Ipan on tonajli ijkuak otlankej kisasalouaj on tabernáculo* kampa onkaj on pacto*,
on moxtli okitlapachoj.
Niman ijkuak peuaya tlapoyaui,
nonextiaya ken sen tlimilinajli ikuapan on tabernáculo,
niman tlikuitikatka hasta ijkuak tlanesiya.
16 Ijki nochiuaya nochipa:
Ipan tonajli on moxtli kitlapachouaya on tabernáculo,
niman tlayoua nesiya ken sen ueyi tlimilinajli.
17 Ijkuak on moxtli nejkuaniaya ikuapan on tabernáculo,
on israelitas kisayaj niman kitokatiayaj.
Niman kampa noteltiaya on moxtli,
on israelitas no noteltiayaj,
niman ompa kitelketsayaj iminkajkal.
18 Ijkon on israelitas nejkuaniayaj niman noteltiayaj ijkuak toTEKO kinnauatiaya,
niman nokauayaj nochi on tonaltin ijkuak on moxtli nokauaya ikuapan on tabernáculo.
19 Tla on moxtli nokauaya ikuapan on tabernáculo* miyek tonaltin,
on israelitas kitlakamatiyaj itlanauatil toTEKO niman noteltiayaj.
20 Niman tla on moxtli nokauaya ikuapan on tabernáculo* san keski tonajli,
ika itlanauatil toTEKO noteltiayaj.
Niman oksejpa ika itlanauatil toTEKO nejnemiyaj.
21 Kamantika on moxtli noteltiaya san se yeuajli,
niman kualkan peuaya yau,
niman yejuamej kitokayaj.
Sa no ijki ipan tonajli noso ipan yeuajli,
ijkuak nejkuaniaya on moxtli,
yejuamej no kisayaj para yayaj.
22 Niman tla on moxtli noteltiaya ikuapan on tabernáculo* ome tonajli,
se metstli,
noso se xipan,
on israelitas nochachantiayaj ompa niman xok nejnemiyaj.
Pero ijkuak on moxtli nokuiteuaya niman yaya,
yejuamej no yayaj.
23 Ika itlanauatil toTEKO yejuamej nochachantiayaj,
niman oksejpa ika itlanauatil toTEKO nejnemiyaj.
Chika ijkon nochiuaya,
yejuamej kichiuayaj niman kitlakamatiyaj nochi on tlen toTEKO kinauatiaya Moisés para ma kichiuakan.