Kanika ontlauilojtiaskej on tlauiltin
8
ToTEKO okinots Moisés niman okijlij:
2 “Xkijli Aarón ijkuak kintlalis on tlauiltsitsimej,
ma kichiua para ma ontlauilojtiakan iyakapan ika on lámpara.”
3 Niman Aarón okichiu ijkon ken toTEKO okinauatij Moisés.
Okintlalij on tlauiltsitsimej para ma on tlauilojtiakan ixpan ika on lámpara.
4 On lámpara tlachijchijtli katka de oro yejuan okitetsotsonkej ikan martillo desde itsinkax hasta ikuapan kampa kipiya on ken ixochiyo.
Okichijchijkej on lámpara ken toTEKO okititij Moisés.
On levitas okinteyaxkatijkej itech toTEKO
5 ToTEKO okinots Moisés niman okijlij:
6 “Xkinxelo on levitas de intech on oksekimej israelitas,
niman xkiminchipaua nixpan.
7 Para tikchiuas on chipaualistli,
ijkin tikchiuas:
Tejua tikinmajuichis ikan atl yejuan notekitiltia para techipaua ixpan Dios.
Niman sakin*,
noximaskej niman notsojmiyouauanaskej ipan nochi imintlalnakayo.
Kemaj ma naltikan,
niman ma kimpakakan intlakeuan,
niman ijkon nokauaskej chipajkej nixpan.
8 Kemaj kuajuikaskej sen becerro,
niman no kuajkiskej on uentli de harina yejuan más kuajli niman tlanelojli iuan aceite.
Niman no,
kuajuikaskej okse becerro para sen uentli ipampa tlajtlakojli.
9 Tejua tikchiuas para on levitas ma uiyan ixpan on tabernáculo* kampa nejua ninemi,
niman nochimej on israelitas no ompa ma nosentlalikan.
10 Ijkuak on levitas yotikinuajuikak nixpan nejua nemoTEKO,
tikinnauatis on israelitas ma kitlalikan iminma ipan intsontekon on levitas.
11 Niman Aarón nechinmaktilis ken uentli yejuan ikatlakajtli.
Ijkon nechinmaktilis nochimej on levitas ken sen ueyi uentli yejuan nochimej on israelitas nechmakaj nejua nemoTEKO.
Niman ijkon noyaxkauan yeskej para notekitkauan.
12 ’Kemaj on levitas kitlaliskej iminma ipan intsontekon on becerros.
Sen becerro nechmakaskej para sen uentli ipampa tlajtlakojli,
niman okse becerro nechmakaskej para sen uentli yejuan nochi tlatla para on levitas kiseliskej tetlapojpoluilistli ipampa intlajtlakol.
13 Kemaj tejua tikintelketsas on levitas ixpan Aarón niman itelpochuan yejua,
niman tinechinmakas ken sen uentli yejuan tlaoolinijli yeskia para nejua nemoTEKO.
14 Ijki tikinxelos on levitas de on oksekimej israelitas para noyaxkauan yeskej.
15 Kemaj ijkuak yotikinchipajkatlalij on levitas,
niman yotinechinyaxkatij no ijki ken on uentli yejuan tlaoolinijli,
yejuamej ueliskej kalakiskej para nechtekipanoskej ipan on tabernáculo* kampa nejua ninemi,
16 pampa de intech nochimej on israelitas on levitas nochimej noyaxkauan.
Nejua yonikinselij pampa onikimpatlak ika inyenkuiyokoneuan on israelitas yejuan nonekiyaj nechinmakaskej,
17 pampa nejua onikinnoyaxkatij nochimej inyenkuiyokoneuan on israelitas niman nochimej inyenkuiyokoneuan iminyolkauan.
Ijkuak onikinmiktij nochimej on inyenkuiyokoneuan on Egipcios,
nochimej iminyenkuiyokoneuan on israelitas onikinxeloj para noyaxkauan yeskej.
18 Ijkon tej,
onikimpatlak inyenkuiyokoneuan on israelitas inka on levitas.
19 Nejua onikintlapejpenij on levitas intech on oksekimej israelitas,
niman onikinmakak Aarón niman itelpochuan para yejuamej tekitiskej impampa on israelitas ipan on tabernáculo* kampa nejua ninemi.
Yejuamej kichiuaskej para nikintlapojpoluilis intlajtlakoluan on israelitas.
Ijkon,
tla on israelitas kinisiuiskej on tabernáculo,
xitlaj* impan nochiuas tlen xkuajli.”
20 Moisés,
Aarón niman nochimej on israelitas okichijkej iuan on levitas nochi ken toTEKO okinauatij Moisés.
21 On levitas onochipajkej niman okipakkej intlakeuan.
Kemaj Aarón okinmaktilij toTEKO no ijki ken on uentli yejuan tlaoolinijli,
niman no okimakak sen uentli para okinkixtilij intlajtlakoluan on levitas,
niman ijkon onokajkej chipajkej ixpan toTEKO.
22 Sakin,
ijkuak yotlan nochiua nochi in tlajtlamach*,
on levitas opejkej kalakij ipan on tabernáculo* kampa Dios nemi para kichiuayaj intekiu.
Otekitkej ika intlanauatil Aarón niman itelpochuan.
Niman nochi okichijkej ijki ken toTEKO okinauatij Moisés ma kichiua iminuan on levitas.
On keski xipan tekitis sen levita
23 ToTEKO okinots Moisés,
niman okijlij:
24 “On levitas ijkuak kipiyaskej 25 xipan,
ijkuakon kipeualtiskej intekiu ipan on tabernáculo* kampa ninemi.
25 Niman kajkauaskej ika tekitiskej ijkuak kajxitiskej 50 xipan.
26 Ijkuak yejuamej yokajxitijkej on 50 xipan,
uelis kimpaleuiskej on yejuan iminuan tekitiyaj ipan on tekitl yejuan xmás chikauak,
ipan on tabernáculo* kampa nejua ninemi.
Pero on tekitl yejuan chikauak xok kichiuaskej.
Ijkon tikintekimakas on levitas.”