Uentli para kitiochiuaskej on tabernáculo
7
Ipan on tonajli ijkuak Moisés otlan kichijchiua on tabernáculo,
okajuichij ikan aceite niman okiteyaxkatij itech Dios iuan nochi on tlajtlamach* yejuan onkaj kalijtik.
No ijki,
okiteyaxkatij itech Dios on tlaixpan* niman on tlajtlamach* yejuan kitekitiltiaj ipan on tlaixpan*.
2 Kemaj on tlayekankej israelitas ipan cada tribu* yejuan otlapaleuijkej para okichijkej on poualistli,
oyajkej
3 niman okimakakej toTEKO ken uentli chikuasen carretas yejuan tsakutokej inyeualkan,
niman majtlaktli uan ome uakax.
In kijtosneki ika cada ome tlayekanki okitemakak sen carreta niman cada tlayekanki okimakak toTEKO sen uakax.
Nochi in okitemakakej ikalakiyan on tabernáculo.
4 Niman toTEKO okijlij Moisés:
5 “Xkinselili on carretas niman on uakaxtin,
niman xkinmaka on levitas para kitekitiltiskej ken nonekis ipan cada tekitl yejuan kichiuaskej ipan on tabernáculo* kampa nejua ninemi.
Cada se xmaka ken nonekis ipan itekiu.”
6 Yejua ika,
Moisés okinselij on carretas niman on uakaxtin,
niman okinxexelouilij on levitas.
7 Iclan* Gersón okinmakak ome carreta niman naui uakax,
ichkich ken noneki para kichiuaskej intekiu.
8 Iclan* Merari okinmakak naui carreta niman chikueyi uakax,
ichkich ken noneki para kichiuaskej intekiu.
Niman Itamar,
itelpoch on tiopixki Aarón,
kinyekanaya.
9 Pero iclan* Coat xokinmakak nion se carreta,
nion se uakax,
pampa on tlen yejuamej kiktiskej tlatiochijtli,
niman noneki sa no yejuamej kechpanojtiaskej.
10 Ijkuak okiteyaxkatikej itech Dios on tlaixpan*,
on tlayekankej ipan cada tribu* okiktikej iminuen,
niman okitlalijkej ixpan on tlaixpan*.
11 Kemaj toTEKO okijlij Moisés:
“Mojmostla ma nopatlatiakan on tlayekankej ipan cada tribu* yejuan kiktiskej iminuen para kitiochiuaskej on tlaixpan*.”
12 Ipan on achtoj tonajli,
okiktik iuen Naasón,
itelpoch Aminadab,
yejuan tlayekanki katka itech itribu* Judá.
13 Inuen katka:
sen ueyi plato tlachijchijtli ikan plata yejuan yetik katka se kilo uan tlajko,
sen ueyi taza de plata yejuan yetik katka tlajko kilo,
ijkon ken kitlajtlanij ipan on tabernáculo.
Niman nochi tentiayaj ika harina yejuan más kuajli,
niman tlanelojli katka iuan aceite para sen uentli de harina.
14 No ijki,
okuajkik sen ueyi xopijli de oro yejuan yetik katka 110 gramos niman tentiaya ikan kopajli,
niman okuajuikak
15 sen becerro,
sen borrego,
sen borreguito yejuan kipiya se xipan para sen uentli yejuan nochi tlatlas,
16 sen chivo para sen uentli ipampa tlajtlakojli,
17 niman sa ika nochi,
okuajkik sen uentli para yoltlalilistli iuan toTEKO.
Okuajuikak ome uakax,
makuijli borrego,
makuijli chivo niman makuijli borreguito yejuan se xijkayomej.
In yejua iuen Naasón itelpoch Aminadab.
18 Kampa ika ome tonajli,
okiktik iuen Natanael,
itelpoch Zuar,
yejuan tlayekanki katka itech itribu* Isacar.
19-23 On tlen okiuentlalij,
no sano ijki ken okitemakak Naasón.
24 Kampa ika yeyi tonajli okiktik iuen Eliab,
itelpoch Helón,
yejuan tlayekanki katka itech itribu* Zabulón.
25-29 No okiuentlalij sa no ijki ken on oksekimej.
30 Kampa ika naui tonajli okiktik iuen Elisur,
itelpoch Sedeur,
yejuan tlayekanki katka itech itribu* Rubén.
31-35 No okiuentlalij sano ijki ken on oksekimej.
36 Kampa ika makuijli tonajli,
okiktik iuen Selumiel,
itelpoch Zurisadai,
yejuan tlayekanki katka itech itribu* Simeón.
37-41 No okiuentlalij sano ijki ken on oksekimej.
42 Kampa ika chikuasen tonajli,
okiktik iuen Eliasaf,
itelpoch Reuel,
yejuan tlayekanki katka itech itribu* Gad.
43-47 No okiuentlalij sano ijki ken on oksekimej.
48 Kampa ika chikome tonajli okiktik iuen Elisama,
itelpoch Amiud,
yejuan tlayekanki katka itech itribu* Efraín.
49-53 No okiuentlalij sano ijki ken on oksekimej.
54 Kampa ika chikueyi tonajli okiktik iuen Gamaliel,
itelpoch Pedasur yejuan tlayekanki katka itech itribu* Manasés.
55-59 No okiuentlalij sano ijki ken on oksekimej.
60 Kampa ika chiknaui tonajli okiktik iuen Abidán,
itelpoch Gedeoni,
yejuan tlayekanki katka itech itribu* Benjamín.
61-65 No okiuentlalij sano ijki ken on oksekimej.
66 Kampa ika majtlaktli tonajli,
okiktik iuen Ahiezer,
itelpoch Amisadai,
yejuan tlayekanki katka itech itribu* Dan.
67-71 No okiuentlalij sano ijki ken on oksekimej.
72 Kampa ika majtlaktli uan se tonajli,
okiktik iuen Pagiel,
itelpoch Ocrán,
yejuan tlayekanki katka itech itribu* Aser.
73-77 No okiuentlalij sano ijki ken on oksekimej.
78 Kampa ika majtlaktli uan ome tonajli,
okiktik iuen Ahira,
itelpoch Enán,
yejuan tlayekanki katka itech itribu* Neftalí.
79-83 Niman yejua no okiuentlalij sano ijki ken on oksekimej.
84 Ijkon tej,
ijkuak okiteyaxkatijkej itech Dios on tlaixpan*,
on tlayekankej intech on israelitas okitemakakej majtlaktli uan ome platos tlachijchijtin ikan plata,
majtlaktli uan ome tasas uejueyimej tlachijchijtin ikan plata,
niman majtlaktli uan ome xopiltin uejueyimej de oro.
85 Cada plato okipix se kilo uan tlajko ika yetik,
niman cada tasa de plata okipix tlajko kilo ika yetik.
Nochi on tlajtlamach* tlachijchijtin ikan plata san se ueyi katka 27 kilos ika yetik,
ijkon ken kitlajtlanij ipan on tabernáculo.
86 On majtlaktli uan ome xopiltin de oro yejuan tentikatkaj ikan kopajli,
cada se kipiyaya 110 gramos ika yetik,
ijkon ken kitlajtlanij ipan on tabernáculo.
Nochi on oro de on xopiltin,
san se ueyi onochiu se kilo ipan 320 gramos ika yetik.
87 On yolkej yejuan para on uentli yejuan tlatlas katkaj majtlaktli uan ome becerro,
maktlaktli uan ome borrego,
majtlaktli uan ome borreguito yejuan se xijkayomej,
iuan on uentli de trigo noso cebada.
Niman no majtlaktli uan ome chivo para uentli ipampa tlajtlakojli.
88 Nochi on yolkej para uentli de yoltlalilistli katkaj 24 becerros,
60 borregos,
60 chivos,
niman 60 borreguitos yejuan se xijkayomej.
Sakin,
ijkuak yokiteyaxkatijkej itech Dios on tlaixpan*,
nochi in uentli okimaktilijkej toTEKO para on tlaixpan*.
89 Ijkuak Moisés okalak ipan on tabernáculo* kampa nemi Dios para iuan tlajtos toTEKO,
okak ika toTEKO kinotsaya intlajkotian on omemej ángeles yejuan imintoka querubines*.
Yejuamej ijkayaj tlapani ipan itsaka on yekcaja yejuan kipiya on pacto*.