Tlanauatiltin para on nazareos
6
ToTEKO okinots Moisés niman okijlij:
2 “Ijkin xkinmijli on israelitas:
Tla sen tlakatl noso sen siuatl notlajtolmaka ixpan Dios yejuan ikatlakajtli para noteyaxkatis notech nejua nemoTEKO ken sen nazareo,
3 xuelis konis vino noso itlaj okse yejuan tlaxokolijli.
Nion xuelis konis vinagre yejuan kichijchiuaj ikan vino,
noso okse tlaonijli yejuan yokixokolijkej niman tetlauantij,
nion iyayo uva.
No ijki,
xuelis kikuas uvas yejuan ayoj nion uvas yejuan tetsoltik.
4 Ipan nochi on tonaltin ijkuak nazareo yes,
xitlaj* kikuas yejuan kisas ipan itlakyo uvas,
desde ixinachyo noso ikakauayo on uvas.
5 No ijki,
xuelis noximas,
yej kinokauilis ma tsonueueyakiya,
hasta tlamis on tonaltin ika yejua onoteyaxkatij notech nejua nemoTEKO.
Ijkon tej,
nokauas tlatiochijtli san chika nemis ken nazareo.
6 Niman ipan on tonaltin,
xuelis yas itech sen mikatsintli,
7 maski mikis itataj,
inanaj,
noso sen ikniu yejuan tlakatl,
noso sen ikniu yejuan siuatl.
Xas para maka nijtlakos,
pampa nemis teyaxkatijli notech nejua nemoTEKO.
8 Nochi on tonaltin chika nemi ken nazareo,
tlayaxkatijli yes notech nejua nemoTEKO.
9 ’Tla yakaj san isijkapan mikis itech on nazareo,
niman on itson ijkon ijtlakauis yejuan okiteyaxkatij,
tla ijkon,
noneki noximas kampa ika chikome tonajli.
In kijtosneki,
nokuatexikalos ipan on tonajli ijkuak on tiopixki kitemachistis ika yochipau.
10 Niman kampa ika chikueyi tonajli,
kuajuikas ome pichontsitsimej,
noso ome kokotetsitsimej,
niman kimakas on tiopixki itech ikalakiyan on tabernáculo* kampa ninemi.
11 On tiopixki nechmakas se de yejuamej para uentli ipampa tlajtlakojli,
niman okse nechmakas para uentli yejuan nochi tlatla.
Niman in yejua kixtilis itlajtlakol pampa okiktsij sen mikatsintli.
On tonajli oksejpa nechyaxkatis itson nejua nemoTEKO.
12 Niman oksejpa peuas on tonaltin para noteyaxkatis notech nejua nemoTEKO.
On tonaltin yejuan yopanok,
xkipouaskej pampa on itson yejuan yonechyaxkatijka xok chipauak katka.
No ijki,
noneki nechuikilis sen borreguito yejuan se xijkayotl,
para sen uentli pampa onijtlakoj nixpan.
13 ’Niman ijkuak tlamis nochi on tonaltin ijkuak noteyaxkatis notech nejua nemoTEKO ken se nazareo,
noneki yas kampa ikalakiyan on tabernáculo* kampa nejua ninemi.
14 Niman nechmakas sen borreguito yejuan se xijkayotl niman yejuan xkanaj tlakokojli* ipan itlakayo para sen uentli yejuan tlatlas.
No ijki,
nechmakas se borreguita yejuan xkanaj tlakokojli* ipan itlakayo para sen uentli ipampa tlajtlakojli.
No ijki,
nechmakas sen borrego yejuan xkanaj tlakokojli* ipan itlakayo para sen uentli de yoltlalijli.
15 No ijki,
kiuentlalis se chikiutli pan yejuan tlachichijtli ika on harina yejuan más kuajli,
niman xkipiyas tlaxokolilistli* niman tlanelojli yes iuan aceite,
pan yejuan kajkanauak pero xkipiyas tlaxokolilistli* yejuan kajuichiskej ikan aceite.
Iuan nochi in uentli de pan,
no kiuentlalis trigo noso cebada,
niman vino para kitoyauaskej ipan on tlaixpan*.
16 ’On tiopixki kiuentlalis nixpan nejua nemoTEKO ken sen uentli ipampa tlajtlakojli niman sen uentli yejuan nochi tlatla.
17 Niman nechmakas on borrego para sen uentli de yoltlalijli iuan on chikiutli ikan pan yejuan xkipiya tlaxokolilistli*.
Niman no kiuentlalis uentli de trigo noso cebada niman vino para kitoyauaskej ipan on tlaixpan*.
18 ’Kemaj on nazareo nokuatexikalos ne ikalakiyan on tabernáculo* kampa nejua ninemi,
niman on itson yejuan onechyaxkatijka konchapanis ipan on tlitl kampa onkaj on uentli de yoltlalijli.
19 ’Niman sakin*,
ijkuak yonokuatexikaloj on nazareo,
on tiopixki kikuis ikechpannakayo on borrego yejuan iksik niman kitlalis ipan ima on nazareo iuan sen pan yejuan xkipiya tlaxokolilistli* yejuan onkaj ipan on chikiutli,
niman sen pan yejuan kanauak yejuan xkipiya tlaxokolilistli*.
20 Kemaj on tiopixki koolinis yolik on uentli nixpan nejua nemoTEKO.
Iyelpannakayo on yolki yejuan kooliniaj,
niman imetskojyo yejuan nechajkuilia,
on ye tlatiochijtin niman kiyaxkatiaj on tiopixki.
Niman sakin*,
ijkuak nochi in yonochiu,
on nazareo ye uelis konis vino.
21 ’In yejua tlanauatijli para se yejuan kichiua sen promesa para noteyaxkatia notech ken sen nazareo.
Yejua no uelis nechuentlalilis okseki uentli tla yejua kineki.
Pero maski ijkon kichiuas,
ika onkaj kintemakas on uentin yejuan yonechprometerouilijka.”
On tiopixkej kintiochiuaj on israelitas
22 ToTEKO okinots Moisés niman okijlij:
23 “Xkijli Aarón niman itelpochuan ika ijkuak kintiochiuaskej on israelitas,
ijkin ma kijtokan:
24 ToTEKO ma mitstiochiua niman ma mitsejeua.
25 ToTEKO ma mitsita ikan pakilistli,
niman ma mitsikneli.
26 ToTEKO ma mitstlajsojkaita niman ma mitsmaka yolseuilistli.
27 ’Ijkin kiteneuaskej notokatsin Aarón niman itelpochuan imimpan on israelitas,
niman nejua nikintiochiuas.”