On tlajtlamach* yejuan xchipauak ixpan toTEKO
5
Kemaj toTEKO okinots Moisés,
niman okijlij:
2 “Xkinnauati on israelitas ma kinkixtikan ipan on incampamento nochimej on yejuan kimajsi on kokolistli itoka lepra,
noso on yejuan ixikaj kampa tlapiasouaj,
noso nochimej yejuan xchipajkej ixpan Dios pampa okimatokakej yakaj mikatsintli.
3 Ma kinkixtikan ipan on campamento on tlakamej noso siuamej yejuan kipiyaj on kokolistli,
para ijkon xkijtlakoskej on campamento kampa iminuan ninemi.”
4 On israelitas okitlakamatkej on tlen toTEKO okinauatij Moisés,
niman okinkixtijkej nochimej on yejuan kipiyayaj on kokolistli.
Tlanauatiltin para on tlen xkuajli kitechiuiliaj
5 ToTEKO okinots Moisés,
niman okijlij:
6 “Ijkin xkinmijli on israelitas:
Ijkuak yakaj tlakatl noso siuatl xipan nechita,
niman kichiuilia yakaj tlen xkuajli,
tlajtlakoua nixpan nejua nemoTEKO.
7 On tlakatl noso on siuatl ika onkaj kinokuitis on tlen xkuajli okichiu,
niman kitlaxtlauas ken kitocaroua on tlen xkuajli okitechiuilij,
niman kitemakas makuijli por ciento más.
8 Tla on tlakatl yejuan okichiuilijkej tlen xkuajli yomik niman xkipiya nion se yejuan ken kita para yejua kitlaxtlauiliskej,
tla ijkon,
nechtlaxtlauiliskej nejua nemoTEKO niman on tomin kimakaskej on tiopixki.
No kuajuikas sen borrego,
niman on tiopixki nechmakas para ijkon kiselis tetlapojpoluilistli ipampa itlajtlakol.
9 ’Nochi on tlen ika tlatlaxtlauaj noso nochi uentli yejuan nechmakaj on israelitas nejua nemoTEKO,
itech nokauas on tiopixki.
10 Nochi uentli yejuan nechyaxkatiaj nejua nemoTEKO,
intech nokauas on tiopixkej.”
Tlanauatiltin para on chauatilistli
11 ToTEKO okinots Moisés,
niman okijlij:
12 “Ijkin xkinmijli on israelitas:
“ San ma tikonijtokan yakaj siuatl kajkayaua iueuentsin* iuan okse tlakatl,
13 niman iuan noteka sen tlakatl yejuan xiueuentsin.
Niman iueuentsin* xkimati on tlen onochiu,
pampa on siuatl okichiu on tlajtlakojli san ichtaka,
niman ijki onokau xkaman omachiyak pampa xakaj okitak ijkuak okichiu on tlajtlakojli.
14 Tla saman ijkon nochiuaskia niman iueuentsin* peuaskia sanoyej chauati pampa kinemilia ika otlajtlakoj isiuau,
noso tla saman san chauati maski tla isiuau xkipiya itlaj tlajtlakojli,
15 tla ijkon,
on tlakatl kuikas isiuau ixpan on tiopixki.
Niman kiktis sen uentli ipampa isiuau ome kilo harina de cebada.
Pero maka kitlalilis aceite nion kopajli on harina,
pampa on sen uentli de harina ipampa chauatilistli,
sen uentli para kipanextis sen tlajtlakojli.
16 ’On tiopixki kuajuikas on siuatl nixpan nejua nemoTEKO.
17 Kemaj on tiopixki kikuis achijtsin tlatiochiualatl ika sen tlaltekomatl,
niman kitlalilis achijtsin tlalkuechtli yejuan kixtis ikalijtik on tabernáculo* ipan tlajli.
18 Sakin,
kichiuas para on siuatl ma notelketsa nixpan nejua nemoTEKO,
niman kitsonxotonis.
Kemaj on tiopixki kitlalis ipan imauan on siuatl on uentli de harina ipampa on chauatilistli para kipanextis sen tlajtlakojli.
Niman on tiopixki kipiyas ipan imauan on atl chichik yejuan kuajki castigo.
19 Kemaj on tiopixki kichiualtis on siuatl ma notlajtolmaka ixpan toTEKO niman on tiopixki ijkin kijlis:
‘Tla xotimotekak iuan okse tlakatl,
nion xotikajkayau moueuentsin,
niman tla xitlaj* otikchiu yejuan xkuajli iuan okse tlakatl yejuan ipampa xok tichopauak yeskia ixpan toTEKO,
tla ijkon,
xitlaj* mopan nochiuas ijkuak tikonis in atl chichik yejuan kuajki castigo.
20 Pero tla otikajkayau moueuentsin,
tla otimotekak iuan okse tlakatl niman otikchiu tlen xkuajli,
yejua ika xok tichipauak ixpan toTEKO,
21 tla ijkon,
ToTEKO ma kichiua para mopan ma uetsi castigo imixpan nochimej on israelitas.
Mosiuayo ma posaui para xok uelis titlaskaltis.
22 Niman on castigo uajlas mopan,
ijkuak tikonis in atl yejuan kuajki itlauelil toTEKO.”
Niman on siuatl kijtos:
“Ma ijki nochiua.”
23 ’Kemaj on tiopixki kijkuilos in itlauelil toTEKO ipan sen amamoxtli* niman kipopolos ika on atl yejuan chichik.
24 Kemaj on tiopixki kichiualtis on siuatl ma koni on atl yejuan uelis kuajkis on tlauelijli,
niman tla on siuatl kipiya tlajtlakojli,
on atl yejuan konis sanoyej kitlajyouiltis.
25 Niman kemaj on tiopixki kiselilis on siuatl on uentli de harina ipampa on chauatilistli,
niman koolinis yolik nixpan nejua nemoTEKO.
Kemaj kiktis on uentli ipan on tlaixpan*.
26 Kemaj kikuis se mapichtli on uentli de harina niman kitlatis ipan on tlaixpan*.
In se mapichtli yejuan tlatla,
kijtosneki ika nochi kiuentlalia on uentli yejuan okiktilijkej.
’Ijkuak on tiopixki yokonitij on siuatl on atl chichik,
27 tla yejua okajkayau iueuentsin* iuan okse tlakatl,
on atl yejuan kuajki itlauelil toTEKO,
kichiuas para ma kitlajyouilti on siuatl niman kichiuas para isiuayo ma posaui niman para xok uelis tlaskaltis.
Niman nochimej on israelitas kitaskej on castigo itech on siuatl niman kimatiskej ika kipiya tlajtlakojli.
28 Pero tla on siuatl xkipiya tlajtlakojli,
xitlaj* ipan nochiuas niman uelis tlaskaltis.
29 ’In yejua tlanauatijli:
Ijkuak sen tlakatl kichauatilia isiuau pampa okajkayau iuan okse tlakatl,
30 noso ijkuak sen tlakatl san kichauatilia isiuau maski tla xkipiya tlajtlakojli,
on tlakatl noneki kuajuikas isiuau,
niman on tiopixki kichiuas para on siuatl ma uajla nixpan nejua nemoTEKO,
niman kichiuilis ken kijtoua in tlanauatijli.
31 Iueuentsin on siuatl xkipiyas tlajtlakojli,
pero tla on siuatl kipiya tlajtlakojli,
yejua tlajyouis ika on castigo.”