Tlanauatiltin para on esclavos
21
’In yejua on tlanauatiltin yejuan tikinmakas on israelitas:
2 ’Tla yakaj israelita kouas sen hebreo* ken se esclavo,
noneki kitekipanos san chikuasen xipan.
Ipan on ika chikome xipan,
kimakauas.
Niman xitlaj* kitlaxtlauilis para kimakauas niman yas kampa yejua kinekis.
3 Tla oyejkok iselti,
yas iselti.
Pero tla oyejkok iuan isiuau,
noneki isiuau yas iuan.
4 Tla iteko kimakas sen siuatl niman yejua kimpiyas ikoneuan;
on siuatl niman ikoneuan nokauaskej teyaxkauan* itech iteko niman on esclavo yas iselti.
5 Pero tla on esclavo kijtos ika xkineki ma kimakauakan pampa kitlajsojtla* isiuau niman ikoneuan niman iyolika nemi itech iteko niman kineki nokauas iminuan,
kemaj yejua uelis nokauas para sanken* teyaxka* yes itech iteko.
6 Ijkuak ijkon nochiuas,
iteko kuikas ne kampa kimauistiliaj Dios,
niman ompa kinisiuiskej on tsakuijlotl noso on kojtli* yejuan ipan salijtikaj on tsakuijlotl.
Kemaj ika sen tepostlakoyonajli kinakaskoyonis ipan on tsakuijlotl.
Ijkon yejua nochiuas iesclavo on iteko para nochipa.
7 ’Tla sen tlakatl kinamakas ichpoch para esclava,
on ichpochtli xuelis nomanauis ken nomanauiya sen esclavo.
8 Pero tla iteko on ichpochtli xkuelita niman xkineki kinosiuatisa,
maski ueliskia iuan nemiskia,
tla ijkon,
itataj on ichpochtli uelis kouas oksejpa.
Pero on iteko xuelis kinamakiltis on ichpochtli yakaj se yejuan xchanej.
9 Niman tla iteko on ichpochtli kinamiktia iuan itelpoch,
ika onkaj kitas ken ichpoch yeskia.
10 Niman tla on iteko okinosiuatij on ichpochtli niman sakin* kinosiuatis okse siuatl,
on yejuan achtoj iuan onen,
xuelis kixtilis nion achijtsin on tlakuajli yejuan okimakak achtoj.
Kimakas nochi tlajkuajli ken achtoj okichiu,
niman kitlakentis kuajli,
niman kuajli nemis iuan ken achtoj okichiu.
11 Niman tla xkineki kimakas nochi in yeyi tlajtlamach*,
on siuatl uelis kimakauas para yas kampa yejua kinekis,
niman xitlaj* kitlaxtlauas on tlen kiteuikiliaya.
Tlanauatiltin ika on yejuan teuijsokij noso tekokouaj
12 ’Tla yakaj kimailia okse niman miki,
no xmiktikan on yejuan otemiktij.
13 Pero tla on yejuan otemiktij xsan okinek okichiu,
yej Dios okauilij ijki ma nochiua,
noneki yas kampa nejua nimitsititis.
Ompa nomanauis para xakaj kajsis niman kimiktis.
14 Pero tla yakaj tlakatl kitlauelitas yakaj iteixmatkau niman peuas kitas kenijkiuelis kimiktis,
niman kemaj kimiktis,
on yejuan otemitij ika onkaj nenkimiktiskej maski oniyanas ijtik notabernáculo niman kajsis notlaixpan* para nomanauis.
15 ’Tla yakaj kimailis inanaj noso itataj,
ika onkaj kimiktiskej.
16 ’Tla yakaj teichtekis,
niman kinamakas on tlakatl para esclavo yes,
noso maski sanken* kipiyas imak ijkuak nenkinextiskej,
ika onkaj nenkimiktiskej.
17 ’Tla yakaj kuijuikaltia itataj noso inanaj,
ika onkaj nenkimiktiskej.
18 ’Tla omemej tlakamej nouisokij niman se temailia ikan tetl,
noso ikan matepayojli pero xtemiktia,
yej san tekaua ipan tlapechtli,
19 on tlakatl yejuan otemailij xkipiyas castigo tla on tlakatl yejuan tlakokojli* sakin* notelketsa niman nejnemi ika itopil.
Pero on yejuan otekokoj ika onkaj kitlaxtlauilis nochi on tonaltin ijkuak xuelis tekitis,
niman kitlaxtlauilis on pajtli hasta ma pajti kuajli.
20 ’Tla yakaj kimailia ika sen kojtli* iesclavo noso iesclava niman kimiktia,
ika onkaj nencastigaroskej itlajtlakol on iteko.
21 Pero tla on esclavo noso esclava nemis okse keski tonajli niman sakin* mikis,
xnoneki nencastigaroskej iteko pampa on esclavo noso esclava iyaxka.
22 ’Tla omemej tlakamej nouijsokij niman kokouaj sen siuatl yejuan koneuaj,
niman yejua kitlajkali ikoneu,
pero on siuatl xmiki,
tla ijkon,
yejuan kipiya tlajtlakojli kitlaxtlauas ichkich ken kijtos iueuentsin* on siuatl tla on jueces kijtouaj ika kuajli.
23 Pero tla mikis on siuatl,
ika onkaj nenkimiktiskej on yejuan otekokoj.
24 Tla yakaj teixtololojkokoua,
no xkixtololojkokokan.
Tla yakaj tetlanteyopeua no xtlanteyopeuakan.
Tla yakaj temateposteki,
no xmatepostekikan,
noso tla teikxiteposteki no xkikxitepostekikan.
25 Tla yakaj tetlajtlatia,
no xtlajtlatikan.
Niman tla yakaj tetsonteki,
no xtsontekikan.
Tla yakaj temailia,
no xmailikan.
26 ’Tla yakaj kimailia iesclavo noso iesclava ipan ixtololoj,
niman kaua ixtepatsaktik,
on iteko kauilis ma uiya on iesclavo noso iesclava pampa okixkokoj.
27 Noso tla kitlankixtia iesclavo noso iesclava,
ika onkaj on iteko kauilis ma uiya on itekitkau pampa okitlankixtij.
Tlanauatiltin ika on ijneualistli
28 ’Tla sen uakax kitejteuiya sen tlakatl noso sen siuatl niman kimiktia,
ika onkaj nenkimiktiskej on uakax ikan temej,
niman xnenkuaskej inakayo.
Pero maka nencastigaroskej iteko on uakax.
29 Pero tla on uakax yejua inemachis ika teteuiya,
niman iteko kimatstikaj niman xkitsakua kuajli,
niman tla sakin* kimiktia yakaj,
noneki nenkitemojmotlaskej on uakax iuan iteko hasta mikiskej.
30 Pero tla kauiliskej san ma kitlaxtlaua para kimanauis inemilis,
ika onkaj kitlaxtlauas nochi ken kinauatiskej.
31 No ijki,
nochiuas tla on uakax kitejteuiya sen siuakonetl noso sen tlakakonetl.
32 Pero tla on uakax kiteuis sen esclavo noso sen esclava,
noneki nenkimiktiskej on uakax ikan temej,
niman yejuan iyaxka* on uakax ika onkaj kitlaxtlauilis iteko on esclavo noso esclava 30 plata tomin.
33 ’Tla yakaj kitlapojkakaua sen atlaltekontli* noso kichijchiua sen atlaltekontli*,
noneki kitsakuas.
Pero tla xkitsakua niman ijtik onuetsi sen uakax noso sen poloko,
34 on yejuan iyaxka* on atlaltekontli* kitlaxtlauilis iteko on yolki pampa omik on iyolkau.
Pero inakayo on yolki yejuan omik itech nokauas on yejuan okitlaxtlau.
35 ’Tla iuakax yakaj tlakatl kiteuis iuakax okse tlakatl hasta kimiktis,
tla ijkon,
kinamakaskej on uakax yejuan otemiktij niman kinotlajkoxelouiliskej on tomin.
Niman no kinotlajkoxelouiliskej inakayo on uakax yejuan omik.
36 Pero tla on iteko kimatiya ika on uakax tlateuiya niman xkisaloua,
ika onkaj kimakas okse uakax noso kitlaxtlauas nochi kech ika patioj on uakax,
niman on uakax yejuan omik nokauas itech iteko.