On xipan ijkuak notlapojpouiya nochi teuikilistli
15
’Cada chikome xipan nenkitlapojpoluiskej nochi on tlen mechuikiliaj.
2 Para nentetlapojpoluiskej,
ijkin nenkichiuaskej:
Nochi tlakatl yejuan okitlanejtij itlaj yakaj israelita,
ika onkaj kitlapojpoluilis tlen otetlanejtijka.
Maka sa kitlajtlanilis on tlen okitlanejtijka,
pampa toTEKO otlanauatij ika ipan on chikome xipan,
ika onkaj nochimej kitlapojpoluiliskej on tlen okitlanejtijkaj.
3 On yejuan xchanej uelis nenkitlajtlaniskej ma mechkuepili on tlen mechuikilia.
Pero on yejuan israelita ika onkaj nenkitlapojpoluiliskej on tlen mechuikilia.
4 Ijki xnemiskej mayankej nemotsajlan pampa nemoTEKO Dios mechtiochiuas ipan on tlajli yejuan yejua mechmakas ken herencia.
5 ToTEKO ijkon kichiuas tla nenkitlakamatij nochi in tlanauatiltin yejuan aman nemechmaka.
6 NemoTEKO Dios melauak mechtiochiuas ijkon ken yokijtoj kichiuas.
Niman nenkipiyaskej para nenkintlanejtiskej miyekej naciones,
pero nemejuamej xkaman itlaj nemotlaneuiskej.
Niman nenkinmandaroskej miyekej naciones pero yejuamej xmechmandaroskej nemejuamej.
7 Tla nemi sen mayanki intech nemochanejkauan ipan on kalpantin de on país yejuan nemoTEKO Dios mechmakas,
maka nenmoyoltechikauaskej,
nion maka nenkitlajsojtiliskej nemotlapaleuilis on nemochanejkau yejuan mayanki.
8 Yej xpaleuikan niman ikan pakilistli xtlanejtikan nochi on tlen kipolos.
9 Maka nenkipiyaskej xkuajli nemoyojlo niman xnenkinekiskej nentetlanejtiskej itlaj pampa ye nisiu on chikome xipan ijkuak notlapojpoluis nochi teuikilistli,
niman yejua ika,
xnenkinekiskej nenkitlanejtiskej itlaj on nemochanejkau yejuan mayanki.
Xpiyakan cuidado pampa yejua uelis kinotsas nemoTEKO niman kijlis on tlen nenkichiuaj.
Tla ijkon nochiuas,
toTEKO kijtos ika nenkipiyaj tlajtlakojli.
10 Nochipa nentepaleuiskej,
niman nenkichiuaskej ikan pakilistli.
Niman tla nenkitlakamatiskej on tlanauatijli,
nemoTEKO Dios mechtiochiuas ipan nochi on tlajtlamach* yejuan nenkichiuaskej.
11 Nochipa nemiskej mayankej ipan on tlajli.
Yejua ika,
nejua nemechnauatia,
xpiyakan kuajli nemoyojlo iminuan on nemochanejkauan yejuan mayankej niman yejuan tlajyouiyaj ipan nemopaís.
On xipan ijkuak kinmakauaj on esclavos
12 ’Tla sen Hebreo tlakatl noso siuatl,
nonamaka motech para esclavo yes,
san mitstekipanos chikuasen xipan.
Niman kampa ika chikome xipan ika onkaj tikmakauas para xok moesclavo yes.
13 Niman ijkuak tikmakauas,
maka san mapijpilkatias,
14 yej tikmakas yolkej niman miyek trigo niman vino.
Tikmakas ken moTEKO Dios yomitstiochiuilij.
15 Maka xkelkaua ika tejua no mitspiyayaj esclavo ipan on tlajli Egipto,
niman moTEKO Dios omitsmanauij.
Yejua ika,
aman nimitsmaka in tlanauatijli.
16 ’Pero tla moesclavo kijtoua xkineki mitskauas pampa mitstlajsojtla niman kitlajsojtla* mofamilia niman pampa tejua no tiktlajsojtla,
17 tla ijkon,
tikuis sen tepostli itoka punzón,
niman xpepecho ipan itsakuijlou mokal niman xkoyonili inakas.
Ijkon nochipa moesclavo yes.
Ijkin tikchiuilis moesclavo noso moesclava.
18 Maka ma mitsajmana tla noneki tikmakauas moesclavo,
pampa yejua yomitstekipanoj chikuasen xipan.
Kijtosneki tlajkotipan de on kech tiktlaxtlauiliskia sen tlakeuajli.
Niman ijkon moTEKO Dios mitstiochiuas ika nochi on tlajtlamach* yejuan tikchiuas.
ToTEKO yejua iyaxkauan* nochi on okichyolkej yejuan yenkuiyomej
19 ’Nochi inyenkuiyokoneuan nemovacas niman nemoborregas yejuan okichtin,
nenkinmaxkatiskej toTEKO Dios.
’Maka tiktekitiltis on becerrito yejuan iyenkuiyou movaca,
nion maka tikximas on borreguito yejuan iyenkuiyokoneu moborrega.
20 Cada xipan tikinkuas iuan mofamilia ixpan nemoTEKO Dios ne kampa yejua kitlapejpenis para onyas itabernáculo.
21 Pero tla kipiya itlaj xkuajli ipan itlakayo,
noso koxo,
noso xtlacha,
noso kanaj tlakokojli* ipan itlakayo xuelis tikmakas toTEKO para sen uentli.
22 Kenon yolki,
uelis tikuas iuan mofamilia ipan on ueyikalpan kampa tichanti.
Niman nochimej uelis kikuaskej on yolki tla nemij chipajkej noso xchipajkej ipan iminyojlo ixpan toTEKO.
On nakatl nenkuaskej ken yeskia de de yolki gacela noso masatl.
23 Pero maka nenkikuaskej iyesyo.
Yej xtoyauakan ipan tlajli ken atl yeskia.