14
’Nemejuamej nenikoneuan nemoTEKO Dios.
Yejua ika,
maka nemotetekiskej ipan nemotlalnakayo,
nion maka xmokuatexikalokan ijkuak yakaj miki,
ken oksekimej kichiuaj,
2 pampa nemejuamej neninyaxkauan nemoTEKO Dios.
Yejua omechtlapejpenij intsajlan nochimej on tlakamej ipan in tlaltikpaktli para nemochiuaskej sen nación yejuan san yejua iyaxka* yes.
On yolkej yejuan chipajkej niman yejuan xchipajkej ixpan toTEKO
3 ’Maka nenkikuaskej nion sen yolki yejuan xchipauak ixpan toTEKO.
4 ’In yejuamej yolkej yejuan uelis nenkinkuaskej:
uakaxtin,
borregos,
chivos,
5 masamej,
gacelas,
gamos,
on tepechivos,
niman on yolkej intoka antílopes.
6 ’Uelis nenkikuaskej nochi on yolkej yejuan kuechouaj imintlakual niman istimajxaltikej.
7 Pero maka nenkinkuaskej in ken in yolkej maski kuechouaj imintlakual,
noso maski istimajxaltikej:
“Camellos,
siutin niman pepesojmeja,
pampa maski tlakuechouaj,
xistimajxaltikej.
Nochi in yolkej xchipajkej ixpan toTEKO.
8 ’On pitsomej no xchipajkej ixpan toTEKO pampa maski istimajxaltikej,
xtlakuechouaj.
Innakayo in yolkej xnenkikuaskej,
nion xnenkimatokaskej yejuan yomikkej.
9 ’De nochimej yolkej yejuan nemij ijtik atl,
san uelis nenkikuaskej yejuan kipiyaj imastlakapaltsitsiuan niman intojtominyo.
10 Pero xuelis nenkikuaskej yejuan xkipiyaj imatstlakapaltsitsiuan niman intojtominyo,
yej xkintakan ken xchipajkej ixpan toTEKO.
11 ’Uelis nenkinkuaskej nochi on totomej yejuan chipajkej.
12 Pero nemij sekimej yejuan xuelis nenkikuaskej:
on kuaktli,
on quebrantahuesos,
on tototl itoka azor,
13 on tototl itoka gallinazo,
on milano,
nion se de on halcones,
14 nion se de nochi kech kakalotl nemi,
15 on avestruz,
on pajpaktekolotl,
on tototl yejuan itoka gaviota,
nion se de on gavilanes,
16 on tekolotl,
on garza kuitlanextik,
on cisne yejuan kuaporontik,
17 on pelícano,
on buitre,
on kakalotl de mar,
18 nion on cigüeña,
on garza,
on tototl itoka abubilla,
niman on tsinakan.
19 “Nochi yolkatsitsimej yejuan patlanij xuelis nenkinkuaskej pampa xchipajkej.
20 Pero on totomej yejuan chipajkej,
kemaj uelis nenkinkuaskej.
21 “Maka xkuakan sen yolki yejuan san ijki miki,
pampa nemejuamej nentlatiochijtin itech nemoTEKO Dios.
Pero,
uelis nenkinmakaskej on xchanej yejuan chanti nemouan,
noso uelis nenkinamakiltiskej on xchanej yejuan san panoua ipan nemotlal.
Yejua kemaj uelis kikuas.
“Maka xkikxitikan sen chivito ikan ileche inanaj.
Ijkin kitemakaskej imindiezmo* on israelitas
22 “Cada xipan noneki nenkixeloskej on diezmo* de nochi kech kitlakitia nemotlatok.
23 On nemodiezmo* de trigo,
de vino,
de aceite de oliva,
niman de inyenkuiyouan nemouakaxuan niman nemoborregos,
nenkikuaskej ixpan nemoTEKO Dios ne ipan on tlajli kampa yejua kitlapejpenis kampa onyas itabernáculo kampa kitlakaitaskej itokatsin.
Ijkon nenueliskej nenkitlakaitaskej toTEKO para nochipa.
24 Tla toTEKO mechmaka miyek tlatiochiualistli,
niman nemejuamej noneki nennejnemiskej uejka para nenkiktiskej nemodiezmo* pampa nenchantij sanoyej uejka ne kampa toTEKO okitlapejpenij kampa onyas itabernáculo,
25 tla ijkon,
nemejuamej nenueliskej nenkinamakaskej on diezmo* de nochi on tlajtlamach* niman san on tomin nenkiktiskej kampa toTEKO yokitlapejpenij kampa onyas itabernáculo.
26 Ika on tomin,
ompa nenueliskej nenkouaskej on tlen nenkinemiliskej más kuajli:
uakaxtin,
borregos,
vino,
noso san katlejua tlaonijli yejuan tlaxokolijli,
san katlejua nenkinekiskej.
Niman ompa nenkikuaskej ikan pakilistli ixpan nemoTEKO Dios,
san sekan iuan nemofamilias.
27 ’Maka kaman nenkinmelkauaskej on levitas yejuan nemij ipan nemokalpanuan,
pampa yejuamej xkipiyaj imintlal ken nemejuamej.
28 ’Cada yeyi xipan nenkixeloskej para nemodiezmo* de nochi kech tlakis ipan on xipan niman xkeuakan ipan nemokalpanuan.
29 Para ijkon ijkuak uajlaskej on levitas yejuan xkipiyaj imintlal,
noso on yejuan xchanejkej yejuan chantij nemokalpan,
noso yejuan iknotsitsimej noso siuakaualtsitsimej,
uelis tlakuaskej hasta kuajli ixuiskej.
Niman tla ijkon nenkichiuaskej,
nemoTEKO Dios mechtiochiuas ipan nochi on tlajtlamach* tekitl yejuan nenkichiuaskej.